Atene so Azo Ahunda
Tongana nyen ngbo so ayeke na yaka ti Éden amu na Ève bibe ti gue nde na ndia ti Nzapa so andu keke ti hinga nzoni na ti hinga sioni?
Genèse 3:1 atene: “Ngbo ayeke na mayele ti handa ahon anyama kue ti benyama so L’Eternel Nzapa asala. Lo tene na wali, Biani, Nzapa atene, Mo lingbi te le-keke kue ti yaka pepe?” A mu atene nde nde ti fa lege so ngbo ni alingbi peut-être la ni ti sala lisoro na Ève. Mbeni oko ti atene ni ayeke so ngbo ni asala lisoro na lege ti salango tele ti lo wala afä. Na tapande, Joseph Benson, mbeni mokonzi ti lege ti vorongo na Angleterre atene: “A ba so anda ti tene mingi ahon ayeke dä ti fa so lo sala lisoro na lege ti aye tongana afä. Biani, ambeni zo atene so ngangu ti gbu li na ngangu ti sala tene ayeke la ni na popo ti asalango ye ti angbo, . . . me afä ti yeda na tene so ayeke dä oko pepe.”
Ye oko, na salango gi tele ti lo, tongana nyen ngbo ni alingbi fade ti fa na Ève so na tengo le-keke so a gbanzi, lo yeke ga tongana Nzapa, ti soro teti lo mveni ye so ayeke nzoni na ye so ayeke sioni? Na ndo ni, Ève amu mbage ti lo na lisoro ni, na kiringo tene na hundango tene ti ngbo ni. (Genèse 3:2-5) Bango ndo so atene ngbo ni asala tene gi na lege ti salango tele ti lo wala afä aye ande ti tene nga so Ève kue akiri tene na lo na lege ti afä; me nde na so, Bible atene so Ève asala tene na yanga.
Na salango tene ti ye so asi, bazengele Paul agboto mê ti afon lo Chrétien: “Me mbito asala mbi, teti peut-être mbeni ye ahanda i legeoko tongana ngbo ahanda Ève giriri na mayele ti lo, tongaso bibe ti i aga kirikiri.” Kpale so Paul asala tene ni alondo na ‘abazengele ti wataka so ayeke sala kusala na lege ti handa.’ Ye ti sioni so amara ti “akota bazengele” tongaso aduti la ni ayeke gi pepe na lege ti salango ye ti ala wala afä. A ndu nga salango tene ti ala na yanga: atene ti ala ti mayele, so ala yeke tene ti handa na ambeni zo.—2 aCorinthien 11:3-5, 13.
Atä so a sala la ni kusala na lege ti atene ti yanga ti handa na Ève na yaka ti Éden, nda ti tene ayeke dä pepe ti tene so ngbo ni mveni ayeke na akamba ti go tongana ti azo so ayeke mu lege na lo ti sala tene. Lo yeke biani na bezoin ni pepe. Tongana ange ti Nzapa asala tene na Balaam na lege ti mbeni lele, nyama ni ayeke na bezoin la ni pepe ti wara mbeni kpengba lege ti go tongana ti zo. (Nombre 22:26-31) Biani, tongana ‘lele so alingbi ti sala tene pepe asala tene na yanga ti zo,’ ngangu ti salango tene ni alondo na ndo ti azo ti yingo.—2 Pierre 2:16.
Na yâ Bible, a fa tâ lê ti créature ti yingo so asala tene na peko ti ngbo ni na Ève, a fa lo tongana “ngbo ti giriri, lo so a di iri ti lo Diable na Satan.” (Apocalypse 12:9) Go so Ève amä na so lo kiri tene na ni alondo na Satan, so “agbian tele ti lo si azo aba lo tongana ange ti lumière.”—2 aCorinthien 11:14.
[Foto na lembeti 27]
“Fade . . . i ga tongana Nzapa, i hinga nzoni na sioni”