Wara Ngia na yâ Hingango Ye ti Mo na ndo Jéhovah
“Ngia ayeke mingi ahon na ala so amä Tene ti Nzapa na ala bata.”—LUC 11:28.
1. Lawa Jéhovah ato nda ti sala lisoro na azo?
JÉHOVAH andoye azo na lo bi bê mingi na ndo nzoni duti ti ala. Tongaso, a yeke ye ti dongo bê pepe so lo yeke sala lisoro na ala. Lisoro so ato nda ni na yaka ti Éden. Genèse 3:8 atene na mbeni ngoi, “na lakui,” Adam na Ève ‘amä yanga ti Jéhovah Nzapa.’ Ambeni zo atene a yeke la ni na yâ salango ye ti Jéhovah ti sala lisoro na Adam na ngoi ni so, peut-être lâ na lâ. Atä ye ni ayeke tongana nyen, Bible afa polele so Nzapa amu ngoi pepe gi ti mu wango-tene na kozo koli, me nga ti fa na lo ye so a lingbi lo hinga si lo yö kungba ti lo nzoni.—Genèse 1:28-30.
2. Tongana nyen kozo koli na kozo wali azi tele ti ala mveni na gbe ti fango lege ti Jéhovah, na ye nyen asi na pekoni?
2 Jéhovah amu na Adam na Ève fini, komandema na ndo anyama, na ngangu ti komande sese kue. A yeke gi ye oko si a ke na ala ti sala la ni: a lingbi ala te pepe lê ti keke ti hinga nzoni na ti hinga sioni. Na pekoni so Satan ahanda ala, Adam na Ève ake komandema ti Nzapa. (Genèse 2:16, 17; 3:1-6) Ala soro ti sala ye na bê ti ala mveni, na sorongo teti ala mveni ye so ayeke nzoni na ye so ayeke sioni. Na salango tongaso, na lege ti buba, ala zi tele ti ala mveni na gbe ti fango lege ti Wasalango ala so ayeke ndoye. Aye so asi na pekoni ayeke la ni sioni mingi teti ala na teti amolenge ti ala so ade ti dü ala pepe. Adam na Ève aga mbakoro nga na nda ni ala kui na dutingo na beku oko pepe ti kiri na fini mbeni. Ahale ti ala awara siokpari tongana ye ti héritier, na kui aga na pekoni.—aRomain 5:12.
3. Tongana nyen Jéhovah asala lisoro la ni na Caïn, na tongana nyen Caïn asala ye na pekoni?
3 Atä kengo yanga so asi na Éden, Jéhovah angbâ lakue ti sala lisoro na azo so lo leke. Caïn, kozo molenge ti Adam na Ève ti koli ayeke la ni na yâ kpale teti so siokpari ayeke ndulu ti hon ndo ti lo. Jéhovah agboto mê ti lo so lo yeke gue ti wara kpale ti sioni na lo wa lo ti “sala nzoni.” Caïn ake wango ti ndoye so, na lo fâ ita ti lo ti koli. (Genèse 4:3-8) Tongaso, akozo zo ota kue so ayeke la ni na ndo sese ake nzoni fango lege so alondo na lo so amu na ala fini, Nzapa so amu fango-lege na azo ti lo si ala lingbi wara ye ti nzoni dä ala mveni. (Esaïe 48:17) So tâ vundu si ye so azia na bê ti Jéhovah!
Jéhovah Afa Tele ti Lo na Abe-ta-zo ti Giriri
4. Na ndo tene so andu ahale ti Adam, ye nyen Jéhovah ahinga na bê kue, nga na batango tene so na li, tokua ti beku wa lo mu?
4 Atä so Jéhovah ayeke na anda ti tene kue ti kaï salango lisoro na azo, lo sala tongaso pepe. Lo hinga na bê kue so ambeni zo na popo ti ahale ti Adam ayeke yeda, na ndara, na fango lege ti Lo. Na tapande, tongana lo fâ ngbanga la ni na ndo Adam na Ève, Jéhovah asala tene ti gango ti mbeni “hale” so ayeke kanga lege na Ngbo, Satan Diable. Na pekoni, fade a mboko li ti Satan na a fâ lo. (Genèse 3:15) Prophétie so aduti mbeni tokua so amu ngia, ti beku teti ‘ala so amä Tene ti Nzapa na abata.’—Luc 11:28.
5, 6. Na alege wa Jéhovah asala lisoro na azo ti lo kozoni si kozo siècle ti N.E. asi, na tongana nyen ye so aga na ala aye ti nzoni?
5 Jéhovah afa ye so bê ti lo aye na ababâ ti sewa be-ta-zo ti giriri, tongana Noé, Abraham, Isaac, Jacob, na Job. (Genèse 6:13; Exode 33:1; Job 38:1-3) Na pekoni, na lege ti Moïse lo zia na sese mbeni bungbi ti andia teti mara ti Israël. Ndia ti Moïse aga na ye ti nzoni teti ala na alege mingi. Batango ni amu lege na Israël ti duti nde na tanga ti amara kue, tongana azo so a zia ala nde teti Nzapa. Nzapa amu zendo na azo ti Israël so tongana ala bata Ndia ni, fade lo hiri deba nzoni na ndo ala pepe gi na lege ti mitele me nga na lege ti yingo, na salango si ala ga royaume ti aprêtre, na mbeni mara ti nzoni-kue. Ndia ni amu même akpengba-ndia na ndo kode ti dutingo na seni nga ti tengo kobe, akode so amaï nzoni seni. Ye oko, Jéhovah agboto nga mê ti ala na ndo asioni kpale so alingbi ti ga na peko ti kengo yanga.—Exode 19:5, 6; Deutéronome 28:1-68.
6 Tongana ngoi ayeke hon, a zia na ndo molongo ti abuku ti Bible ambeni buku nde so a sû na gbe ti yingo. Atondo ti giriri asala tene na ndo salango ye ti Jéhovah na mbage ti amara. Abuku ti suma-tene afa na gigi alengo ti lo na mbeni lege so ayeke pendere mingi. Abuku ti prophétie afa kozoni tongana nyen ye so bê ti Jéhovah aye ayeke ga tâ tene. Akoli be-ta-zo ti giriri amanda na asala ye alingbi na ambeti so asû na gbe ti yingo. Mbeni oko asû tene so na mbeti: “Tene ti mo ayeke lampe teti gere ti mbi, na lumière teti lege ti mbi.” (Psaume 119:105, NW) Na ala so ayeke ndulu ti mä tene, Jéhovah amu fango lege nga na lumière ti gbu nda ti ye.
Lumière ni Akiri Aza Ngangu
7. Atä so Jésus asala la ni aye ti kpene, a hinga lo kozoni teti ye wa, na ngbanga ti nyen?
7 Ti si na kozo siècle, abungbi ti lege ti vorongo ti aJuif azia angobo ti salango ye ti azo na ndo ti Ndia. A sala kusala nzoni pepe na Ndia, na a hon ti duti lingu ti lumière, a ga ye so ane mingi ngbanga ti angobo ti salango ye so. (Matthieu 23:2-4) Ye oko, na ngu 29 N.E., Jésus asigigi tongana Messie. Kusala ti lo ayeke la ni pepe gi ti mu fini ti lo teti azo me nga ti “sala tene ti témoin ti tâ tene.” Atä lo sala aye ti kpene, a hinga lo kozoni kue tongana “Wafango ye.” Fango ye ti lo ayeke la ni tongana lumière so aza na yâ bingo ti yingo so avuko bibe ti azo. Jésus mveni atene na lege ni: “Mbi yeke lumière ti sese.”—Jean 8:12; 11:28; 18:37, NW.
8. Abuku wa a sû ni na gbe ti yingo na kozo siècle ti N.E., na tongana nyen a ga na ye ti nzoni na akozo Chrétien?
8 Na pekoni, a zia na ndo ni a-Évangile, ambaï osio so andu fini ti Jésus, nga na buku ti Kusala so ayeke mbeni tondo na ndo guengo na li ni ti lege ti vorongo ti aChrétien na peko ti kuâ ti Jésus. A yeke wara nga ambeti so adisciple ti Jésus asû na gbe ti yingo, nga Apocalypse so ayeke buku ti prophétie. Ambeti so, tongana a bungbi na Mbeti ti Nzapa so a sû ni na yanga ti Hébreu, alingbi wungo ti abuku kue ti Bible. Na lege ti mungo maboko ti ambeti so asû na gbe ti yingo na so a bungbi ni na ndo oko, aChrétien alingbi ti “hinga legeoko na azo kue ti be-vulu, ye so ayeke kota ti lê ni, yongo ni, yongo ni na nduzu, na yongo ni na gbe ti sese” ti tâ tene. (aEphésien 3:14-18) Ala lingbi fade ti wara “bibe ti Christ.” (1 aCorinthien 2:16) Ye oko, akozo Chrétien so agbu nzoni kue pepe nda ti ambage oko oko kue ti aye so Jéhovah aleke ti sala. Bazengele Paul asû mbeti na afon lo wamabe: “Teti fadeso e ba ye mbilimbili kue pepe, legeoko tongana zo aba ye na tatara.” (1 aCorinthien 13:12) Mara ti tatara tongaso ayeke fa ande na gigi gi ambage ti aye ni me pepe anzene nzene ye ni kue. Mbeni kota gbungo nda ti Tene ti Nzapa ayeke ga na peko.
9. Lumière wa asigigi na ngoi ti “lâ ti nda ni”?
9 Laso, e yeke na yâ ti mbeni ngoi so a di iri ni “lâ ti nda ni,” mbeni “ngoi ti kpale na ti ngangu.” (2 Timothée 3:1, NW) Prophète Daniel afa kozoni so na ngoi ni so ‘tâ hingango ye ayeke wu mingi.’ (Daniel 12:4) Tongaso, Jéhovah, Kota Wasalango lisoro, amu maboko na azo ti bê ti mbilimbili ti gbu nda ti Tene ti lo. Azo mingi mingi fadeso ahinga so a zia Christ Jésus awe na ndo mbata ti Gbia na ngu 1914, na yayu so lê aba pepe. Ala hinga nga so na yâ ngoi kete, fade lo yeke hunzi sioni kue na lo sala si sese aga mbeni kota paradis. Laso, a yeke fa kpengba mbage ti nzo tene ti Royaume so na ndo sese kue.—Matthieu 24:14.
10. Na yâ asiècle so ahon, tongana nyen azo mingi asala ye na gbele wango ti Jéhovah?
10 Biani, na yâ mbaï Jéhovah afa na azo ti sese ye so bê ti lo aye na ye so lo leke ti sala. Tondo ti Bible asala tene ti azo mingi so amä tene, asala ye alingbi na ndara ti Nzapa, na awara deba-nzoni ndali ni. A sala tene ti ambeni zo so ake wango so Nzapa amu na lege ti ndoye, na mungo lege ti Adam na Ève, lege so aga na futingo. Jésus afa ye so tongana lo sala tene ti alege use na lege ti fä. Oko ni ague na futingo. A kono, a yeke kota, na azo so ake Tene ti Nzapa ayeke tambela dä mingi. Mbeni lege ni nde ague na fini ti lakue lakue. Atä so a yeke kete, a yeke lege ti azo mingi pepe so ayeda na Bible tongana ye so ayeke biani, Tene ti Nzapa, na ala sala ye alingbi na ni.—Matthieu 7:13, 14.
Ba na Nene ni Ye so E Yeke na Ni
11. Hingango ye nga na mabe ti e na yâ Bible ayeke fä ti nyen?
11 Mo yeke na popo ti azo so asoro lege so ague na fini? Tongana a yeke tongaso, kite ayeke pepe so mo ye ti ngbâ dä. Tongana nyen mo lingbi ti sala ni? Gbu li lakue, na ngia na bê na ndo aye ti nzoni so hingango atâ tene ti Bible aga na ni na yâ fini ti mo. Yengo dä ti mo na nzo tene ayeke fä ti deba nzoni ti Nzapa. Jésus afa ye so tongana lo sambela na Babâ ti lo na lege ti atene so: “Mbi mu merci na Mo, O Babâ, Seigneur ti yayu na ti sese, teti Mo honde ye so na awandara na azo ti mayele, na Mo fa nda ni na akete molenge.” (Matthieu 11:25) Awagingo susu na azo ti kamata lampo agbu nda ti fango ye ti Jésus, atä so amokonzi ti lege ti vorongo, so ahinga ye mingi, agbu nda ni pepe. Jésus akiri atene: “Zo oko pepe alingbi ti ga na mbi gi tongana Babâ, so ato mbi, agboto lo.” (Jean 6:44, NW) Tongana mo wara lege ti hinga Bible, mo mä na bê na mo bata afango ye ni, ye so ayeke fä so Jéhovah agboto mo. So ayeke nda ti tene ti duti na ngia.
12. Na yâ alege wa Bible amu lumière?
12 A yeke wara na yâ Tene ti Nzapa atâ tene so ayeke zi zo, na so amu lumière. Ala so ayeke sala ye alingbi na hingango ye ti Bible asigigi awe na gbe ti tene ti atoro, afango ye ti wataka, na hingango ye pepe so ayeke komande fini ti azo kutu mingi. Na tapande, hingango tâ tene na ndo âme ayeke zi e na gbe ti mbito so a tene akinda alingbi ti sala sioni na e, wala so a tene azo ti e so e ndoye si akui fadeso awe ayeke hu pono. (Ezéchiel 18:4) Hingango tâ tene na ndo a-ange ti sioni amu maboko na e ti kpe
akpale ti sioni so aga na peko ti salango ye ti ayingo sioni. Fango ye na ndo londongo ti awakinda ayeke dë bê ti ala so aglisa na yâ kuâ azo ti ala so ala ndoye. (Jean 11:25) Aprophétie ti Bible afa na e ndo so e yeke dä na yâ ngoi, nga a sala si e zia bê kue na azendo ti Nzapa teti gigi ti kekereke. A kiri akpengba beku ti e ti duti na fini teti lakue lakue.
13. Tongana nyen batango Tene ti Nzapa ayeke ga na ye ti nzoni na e na lege ti mitele?
13 Akpengba-ndia ti Nzapa so ayeke na yâ Bible afa na e ti duti na fini na mbeni lege so aga na aye ti nzoni na lege ti mitele. Na tapande, e manda ti ke akusala so asala sioni na tele ti e, aye tongana nyongo manga na mungo ambeni mbangi nde. E kpe nyongo samba ahon ndo ni. (2 aCorinthien 7:1) Batango andia ti Nzapa na ndo nzoni lege ti tambela ayeke bata zo nde na asioni kobela so aga na lege ti bungbingo ti koli na wali. (1 aCorinthien 6:18) Na batango wango ti Nzapa ti kpe ndoye ti nginza, e yeke futi pepe siriri ti e ti bibe, tongana ti so azo mingi asala, na tombango peko ti amosoro. (1 Timothée 6:10) Na lege wa mo wara ye ti nzoni na lege ti mitele ndali ti batango Tene ti Nzapa na yâ fini ti mo?
14. Ngangu wa yingo ti nzoni-kue ayeke sala na ndo fini ti e?
14 Tongana e sala ye alingbi na Tene ti Nzapa na yâ fini, e yeke wara yingo ti nzoni-kue ti Jéhovah. E yeke gi ti lë salango ye so akpa ti Christ, so apendere lengo tongana be-nzoni na bê ti ndoye amu lege ti hinga ni. (aEphésien 4:24, 32) Yingo ti Nzapa alë nga na yâ e alengo ti lo tongana ndoye, tâ ngia, siriri, be-nze-pepe, nzobe, bê ti sala nzoye, be-biani, tâ be-ti-molenge, na ngangu ti kanga nzala ti tele. (aGalate 5:22, 23) Alengo so ayeke maï tâ ngia na songo so nda ni ayeke dä teti ambeni zo, so andu nga azo ti sewa. E wara ngangu ti bibe so amu maboko na e ti luti na gbele aye ti ngangu na bê so akpengba. Mo ba tongana nyen yingo ti nzoni-kue ayeke sala nzoni ngangu na ndo fini ti mo?
15. Tongana e sala si fini ti e ague legeoko na ye so bê ti Nzapa aye, tongana nyen e lingbi ti wara ye ti nzoni na pekoni?
15 Na ngoi so e yeke sala si fini ti e alingbi na ye so bê ti Jéhovah aye, e yeke kpengba songo ti e na lo. E yeke hinga na bê ti e kue mingi ahon so lo hinga dutingo ti e na lo ndoye e. Na lege ti aye so asi na e na yâ fini, e manda so lo yeke mu maboko na e na yâ angoi ti ngangu. (Psaume 18:19 [18:18, NW]) E ba so lo yeke mä biani asambela ti e. (Psaume 65:3 [65:2, NW]) E zia bê ti e na ndo fango lege ti lo, na hingango biani so a yeke ga ande na ye ti nzoni na e. Na e yeke na pendere beku so na ngoi so Nzapa adiko, fade lo sala si abe-ta-zo ti lo aga mbilimbili-kue na lo mu na ala matabisi ti fini ti lakue lakue. (aRomain 6:23) Disciple Jacques asû na mbeti: “I ga ndulu na Nzapa, na fade Lo ga ndulu na i.” (Jacques 4:8) Mo ba so songo ti mo na Jéhovah akpengba na ngoi so mo ga ndulu na lo?
Mbeni Mosoro so Alingbi Pepe ti Haka ni na Mbeni Ye Nde
16. Aye wa aChrétien ti kozo siècle agbian na yâ fini ti ala?
16 Paul adabe ti aChrétien ti kozo siècle so a sa yingo na ndo ti ala so ambeni na popo ti ala ayeke la ni azo ti pitan, azo so asala lango sioni, akoli so asala lango sioni na mbeni koli, awanzi, azo so bê asala ala, angba ti samba, awazonga, na azo ti gbu ye na ngangu. (1 aCorinthien 6:9-11) Tâ tene ti Bible apusu ala ti gbian akota ye na yâ fini ti ala; ‘a sukula ala awe.’ Tara ti ba tongana nyen fini ti mo alingbi ti duti tongana atâ tene so azi zo, so mo manda na yâ Bible ayeke fade dä pepe. Kite a yeke pepe so tâ tene ayeke mbeni mosoro so alingbi pepe ti haka ni na mbeni ye nde. So tâ ngia si e yeke na ni so Jéhovah asala lisoro na e!
17. Tongana nyen a mu kobe ti yingo na aTémoin ti Jéhovah na ngoi ti abungbi ti aChrétien?
17 Na ndo ni, bi bê kete na ndo ye ti nzoni so e wara na yâ ti songo ti e ti aita ti amara nde nde! “Ngba ti be-ta-zo na ti ndara” amu kobe ti yingo na ngoi so alingbi, so andu aBible, apériodique, na ambeni mbeti nde na ayanga ti kodoro mingi. (Matthieu 24:45-47, NW) Na yâ ti ngu 2000 so ahon, na ngoi ti abungbi ti kongregation, aTémoin ti Jéhovah na yâ akodoro mingi aba angbongboro tene ti akota buku miombe ti mbage ti Mbeti ti Nzapa so a sala na yanga ti Hébreu. Ala gbu li na ndo fini ti azo 40 ti Bible so asala tene ti ala na yâ buku Étude perspicace des Écritures. Tongana a kangbi yâ ti buku Koli so Ahon Tanga ti Azo Kue osio, ala manda mbage ni oko na popo ni, nga ala yeke la ni ndulu ti hunzi buku E Bi Bê na Prophétie ti Daniel! A manda nga a-article bale ota na omene ti Tour ti Ba Ndo, nde na a-article 52 so ayeke aye ti manda. Na ndo ni, a mu kobe na azo ti Jéhovah na lege ti a-numéro 12 ti Kusala ti Royaume nga na lege ti adiskur nde nde so andu akota tene ti Bible, na so a sala na yenga oko oko. So tâ mosoro ti hingango ye ti yingo si a zia na gbele azo!
18. Na alege wa e wara mungo maboko na yâ ti kongregation ti aChrétien?
18 Na ndo sese kue, akongregation ahon 91 000 amu maboko nga na wango ti kpengba zo na lege ti abungbi nga na dutingo na ndo oko. E wara nga ngia na yâ maboko so aChrétien biazo, so ayeke ndulu ti mu maboko na e na lege ti yingo, ayeke mu. (aEphésien 4:11-13) Biani, e wara ye ti nzoni mingi na warango hingango ye na ndo tâ tene. A yeke ye ti mungo ngia ti hinga Jéhovah na ti sala na lo. Ba tongana nyen atene so ti wasungo psaume ayeke biani tâ tene: “Ngia ayeke na azo so L’Eternel [“Jéhovah,” NW] ayeke Nzapa ti ala.”—Psaume 144:15.
Mo Dabe Mo?
• Jéhovah asala lisoro na azo wa kozo na ngoi ti aChrétien?
• Tongana nyen lumière ti yingo aza mingi ahon na kozo siècle? Na ngoi ti laso?
• Aye ti nzoni wa aga na lege ti salango ye alingbi na hingango ye na ndo ti Jéhovah?
• Ngbanga ti nyen e yeke na ngia na yâ hingango ye ti e na ndo Nzapa?
[Afoto na lembeti 22, 23]
Jéhovah afa ye so bê ti lo aye na Moïse, Noé, na Abraham
[Foto na lembeti 23]
Na ngoi ti e, Jéhovah abi lumière na ndo Tene ti lo
[Afoto na lembeti 24]
Bi bê na deba nzoni so e wara na yâ songo ti aita ti mara nde nde!