Kobe ti Seigneur: Mbeni matanga so amû gonda na Nzapa

A MÛ yanga na aChrétien ti sala Matanga ti Dango Bê na kui ti Christ. A hiri nga matanga ni so “Kobe ti Seigneur”. (1 aCorinthien 11:20). Ye nyen apika bê ti zo mingi na ndo tënë ti matanga so? Lawa si a lingbi a sala ni? Na a lingbi a sala ni tongana nyen?

Jésus Christ azia na sese matanga so na bï ti Pâque ti aJuif ti ngu 33. Pâque ayeke lani mbeni matanga so a yeke sala ni gi fani oko na yâ ngu oko, na lango 14 ti nze ti aJuif so a hiri ni Nisan. Ti hinga lango ti Pâque ni, aJuif ayeke ku na popo ti nze ti mars na avril, lango so lâ ayeke su teti angbonga 12 tongaso, na bï nga ayeke ninga teti angbonga 12. Kozo sigingo ti fini nze ndulu na lango ni so ayeke fa tongo nda ti nze ti Nisan. Tongaso, a yeke diko lango 14 na pekoni si a yeke wara lango ti Matanga ti Pâque so a yeke sala ni na peko ti lindango ti lâ.

Jésus asala lani Matanga ti Pâque na adisciple ti lo. Na pekoni so lo tene na Judas Iscariote ti sigigi, lo zia na sese Matanga ti Kobe ti Seigneur. Matanga so amû place ti Pâque ti aJuif, so ti tene a lingbi a sala ni gi fani oko na yâ ti ngu oko.

Évangile ti Matthieu afa peko ti ye so asi lani so tongaso: “Jésus akamata mapa, Lo hiri tënë nzoni dä, Lo fâ yâ ni; na Lo mû na adisciple, Lo tene, I kamata so, i te; so ayeke tele ti Mbi. Lo kamata kopo, Lo mû merci, Lo mû na ala, na Lo tene, I kue [i] nyon; teti so ayeke mênë ti Mbi, mênë ti mbele so a sa na sese teti azo mingi teti pardon ti siokpari.”​—Matthieu 26:26-28.

Ambeni atene so Jésus achangé lani mapa ni si a ga tâ tele ti lo mveni na lo changé vin ni ti ga tâ mênë ti lo. Me ti tâ tënë ni, mbeni ye oko achangé na yâ tele ti lo ti zo pëpe tongana lo mû lani mapa so na adisciple ti lo ti te. Abazengele ni ayeke te lani tâ tele ti Jésus ni wala ala yeke nyon tâ mênë ti lo? Ên-ën, teti ndia ti Nzapa ake ti tene zo amû tele ti mba ti lo zo ti te ni tongana kobe (Genèse 9:3, 4; Lévitique 17:10). Na Luc 22:20, Jésus atene: “Kopo so ayeke fini mbele na yâ mênë ti Mbi, mênë so [a yeke] sa teti i.” So aye ti tene so kopo ni achangé tele ti lo ti ga “fini mbele” ni? A lingbi ti duti tongaso pëpe teti mbele ayeke gi senge mango tele na popo ti ambeni zo, me a yeke pëpe mbeni tâ ye tongaso, so zo alingbi ti gbu ni na maboko.

Tongaso, mapa ni nga na vin ni ayeke gi ti fa ambeni ye awe. Mapa ni ayeke fä ti tele ti Christ so siokpari oko ayeke dä pëpe. Jésus asala kusala lani na tanga ti mapa so angbâ na peko ti Pâque so lo na adisciple ti lo asala. A sala mapa ni na mama ni pëpe (Exode 12:8). Bible asala kusala na mama ti mapa ti fa tënë ti siokpari wala ti ye so ayeke buba ye bubango. Tongaso, mapa ni aduti fä ti tele ti Jésus so siokpari oko ayeke dä pëpe na so lo mû ni tongana sandaga teti azo.​—Matthieu 16:11, 12; 1 aCorinthien 5:6, 7; 1 Pierre 2:22; 1 Jean 2:1, 2.

Bengba vin ni aduti ti lo fä ti mênë ti Jésus. A yeke mênë so la amû lege na fini mbele ti sala kusala. Jésus atene so mênë ti ni ayeke yuru “teti pardon ti siokpari.” Na lege ti mênë so, azo alingbi ti ga nzoni na lê ti Nzapa na ti te fini mbele ni na lo (aHébreu 9:14; 10:16, 17). Mbele ni so azi lege na ambeni Chrétien be-ta-zo so wungo ti ala asi 144 000 ti gue na yayu. Kâ, ala yeke sala kusala tongana agbia na aprêtre ti ga na aye ti nzoni na azo kue ti sese.​—Genèse 22:18; Jérémie 31:31-33; 1 Pierre 2:9; Apocalypse 5:9, 10; 14:1-3.

Azo wa la ayeke na droit ti te mapa na ti nyon vin ti Kobe ti Seigneur? Ti bâ ni nzoni, gi ala so ayeke na yâ ti fini mbele so si alingbi ti te mapa na ti nyon vin, so ti tene ala so beku ti ala ayeke ti wara fini na yayu. Yingo vulu ti Nzapa si ayeke fa na ala so a soro ala awe ti ga agbia na yayu (aRomain 8:16). Ala te nga mbeni mbele na Jésus ti duti na tele ti lo na yâ Royaume ti lo.​—Luc 22:29.

Me ti ala so beku ti ala ayeke ti wara fini ti lakue lakue na yâ paradis na ndo sese, a ku nyen na mbage ti ala na ngoi ti matanga so? Ala yeke sala tongana ti so Jésus ahunda, so ti tene ala yeke ga nga na Matanga ti Kobe ti Seigneur ni. Me ala yeke te ti ala mapa ni wala ala yeke nyon ti ala vin ni pëpe; ala yeke ga dä gi ti bâ tongana nyen aye ni ayeke tambela na ti fa singila ti ala na lege so. A si na lango 14 ti nze ti Nisan ti ngu oko oko, aTémoin ti Jéhovah ayeke bungbi ka teti Matanga ti Kobe ti Seigneur. Atâa so gi wungo ti ala kete si atene so ala yeke na beku ti gue na yayu, matanga ni ayeke tâ kota ye mingi teti aChrétien kue. A yeke mbeni lango so zo kue alingbi ti gbu li na ndo kota ndoye so ahon aye kue, ndoye so Jéhovah Nzapa na Jésus Christ afa na mbage ti e.​—Jean 3:16.