Ye ti Manda 5

Andeko ti Nzapa Ayeke Duti ti na Yâ Paradis

Fade Paradis ayeke kpa pepe sese so e duti dä fadeso. Nzapa aye lâ oko pepe si sese ni asi na wusuwusu, vundu, pasi nga na pono. Na yâ ngoi so ayeke ga, Nzapa ayeke sala si sese aga mbeni paradis. Fade Paradis ayeke kpa nyen? Zia e ba ye so Bible atene:

Azo ti nzoni. Paradis ayeke duti ande ndo ti andeko ti Nzapa. Fade ala yeke sala aye ti nzoni na popo ti ala. Ala yeke duti na fini alingbi na ambilimbili lege ti Nzapa.—aProverbe 2:21.

Kobe asi singo. Na yâ ti Paradis, fade nzala ayeke sala zo mbeni pepe. Bible atene: “Fade ale-kobe [wala, kobe] awu mingi na ndo sese.”—Psaume 72:16, NW.

Apendere da nga na kusala so amu ngia. Na ndo sese so aga Paradis, fade sewa oko oko kue ayeke duti na da ti lo mveni. Zo kue ayeke sala mbeni kusala so aga na tâ ngia.—Esaïe 65:21-23.

Siriri na ndo sese kue. Fade zo ayeke tiri na ayeke kui na yâ ti bira mbeni pepe. Tene ti Nzapa atene: “[Nzapa a] sala si bira awe.”—Psaume 46:9, 10 (46:8, 9, NW).

Nzoni seni. Bible amu zendo so: “Fade mbeni wakodoro oko [ti Paradis] atene pepe: ‘Tele ti mbi aso.’ ” (Isaïe 33:24, NW) Nga, fade mbeni zo so tele ti lo anze, wala so aba ndo pepe, amä ndo pepe wala alingbi ti sala tene pepe ayeke duti dä pepe.—Esaïe 35:5, 6.

Pasi, vundu, na kui ayeke hunzi. Tene ti Nzapa atene: “Fade kui ayeke mbeni pepe, fade mua wala wuluwulu wala pasi ayeke mbeni pepe. Angbele ye ahon awe.”—Apocalypse 21:4, NW.

Fade a lungula azo ti sioni. Jéhovah amu zendo so: “Ti azo ti sioni, fade alungula ala na sese; nga ti awahanda, fade agboto ala na ndo ni.”—aProverbe 2:22, NW.

Fade azo ayeke ndoye nga ayekia tele na popo ti ala. Fade ye ti kirikiri, sioni komandema, salango bê na kengo zo ayeke duti mbeni pepe. Fade azo ayeke duti beoko na asala ye alingbi na ambilimbili lege ti Nzapa.—Esaïe 26:9.