3. Ngbanga ti nyen la anzoni zo ayeke bâ pasi?
Ndani so a yeke kota ye ti wara kiringo tënë ni
Na lê ti e azo a yeke na lege ni ape ti bâ so anzoni zo ayeke bâ pasi. A sara si ambeni zo apensé so a yeke senge senge ye ti duti nzoni zo.
Gbu li na ndö ti tënë so
Ambeni zo amä na bê so akpale ayeke si na e so, a yeke ye so Nzapa la adiko. Ti ambeni, ala tene so Nzapa ayeke sara kua na pasi ti punir asioni zo wala ti tara mabe ti anzoni zo. Me ambeni nde atene so zo apeut ti comprendre nzoni kue ape ngbanga ti nyen la anzoni zo ayeke bâ pasi. Ye oko, atënë ni so asara si ambeni hunda abâ gigi:
Tongana aye so ayeke si na e, a yeke aye so a diko ni kozo awe, ka ngbanga ti nyen la e yeke sara kue ti duti na nzoni seni nga ti mû anzoni desizion?
Tongana Nzapa ayeke pensé na azo, eskê lo peut tâ ti sara kua na pasi ti tara mabe ti ala?
TI HINGA YE MINGI NA NDÖ NI
Gue na ndö ti jw.org, na bâ vidéo Ngbanga ti nyen la Nzapa azia si azo abâ pasi?
Ye so Bible afa
Pasi ayeke punition ti Nzapa ape.
Nde na so, mingi ti apasi ni asi na azo gï kirikiri; fani mingi asi na azo ndali ti so ala yeke na place so mbeni sioni ye apassé dä nga na mbeni ngoi so ala ku ti terê ti ala na ni ape.
“Azo so akpe loro mingi la ayeke sö benda lakue pëpe, wala awangangu la ayeke sö benda lakue na yâ ti bira pëpe, wala azo ti ndara la ayeke wara kobe ti te lakue pëpe; a yeke nga azo so ahinga mbeti la ayeke wara mosoro lakue pëpe, wala azo so ahinga ye la ye ti ala ayeke ga lakue nzoni pëpe, ndali ti so ye so ala ku terê ti ala na ni pëpe alingbi ti si na ala kue na ngoi kue.”—ZO-TI-FA-TENE 9:11.
Siokpari so ayeke na terê ti e asara si e yeke bâ pasi.
Mingi ni ti azo, tënë “siokpari” aye ti sara tënë ti mbeni sioni ye so zo asara. Me ti Bible, a ye nga ti sara tënë ti dutingo so a dü e kue na ni, atâa e yeke nzoni zo wala sioni zo.
“Na ngoi so a dü mbi, tënë ayeke na li ti mbi awe, na mbi yeke wasiokpari ngbene ye so mama ti mbi amû ngo ti mbi.”—PSAUME 51:5, Kete tënë na gbe ni.
Siokpari so ayeke na terê ti e abuba dutingo ti e.
Siokpari so e yeke na ni abuba songo ti e na Zo so acréé e, me abuba nga nzoni songo ti e na tanga ti aye so Nzapa acréé. Ye so aga na kota kpale na zo oko oko kue.
“Tongana mbi ye ti sara ye so ayeke mbilimbili, ye so ayeke sioni la si ayeke na yâ ti mbi.”—A-ROMAIN 7:21.
“Création kue angbâ gï ti dema legeoko na ti bâ pasi legeoko.”—A-ROMAIN 8:22.