Mbeni ngbene mbeti so a-aidé e laso
Gbâ ti azo ane Bible ndali ti so atënë ti yâ ni andu vorongo Nzapa. Me, Bible afa gï na e lege ti voro Nzapa awe ape, a fa na e aye mingi ahon so. Awango ti yâ ni apeut ti aidé e na yâ ti gigi ti e ti lâ oko oko.
Na tapande, bâ aye ti nzoni so ambeni zo awara ndali ti so ala diko Bible nga ala sara ye alingbi na awango ti yâ ni.
“Gigi ti mbi aga nzoni mingi. Fason so mbi yeke pensé na ni achangé nga mbi yeke na siriri ti bê. Mbi yeke na ngia mingi.”—Fiona.
“Na mandango Bible, mbi hinga vrai ye ti sara na yâ ti gigi ti mbi nga gigi ti mbi ayeke na sens.”—Gnitko.
“Gigi ti mbi aga tâ nzoni mingi; a yeke simple fadeso, nga mbi yeke na temps mingi ti duti na terê ti asewa ti mbi.”—André.
Mara ti atapande tongaso, a yeke wara ni gbani. Azo mingi abâ so na yâ ti Bible, a yeke wara gbâ ti awango so apeut ti aidé e na yâ ti gigi ti lâ oko oko.
Zia e bâ tongana nyen la Bible apeut ti aidé e . . .
Ti duti na nzoni seni
Ti duti na siriri ti bê
Ti duti na nzoni songo na sewa nga na akamarade
Ti sara kua nzoni na nginza ti e
Ti duti na nzoni songo na Nzapa
Ambage so ayeke ga na peko ayeke fa ande so Bible ayeke mbeni mbeti so alondo na Nzapa so apeut ti aidé mo na yâ ti gigi ti mo ti lâ oko oko.