Mbeni kota zo ti eglize awara kiringo tënë na ahunda ti lo

Mbeni lâ Eliso, so ayeke Témoin ti Jéhovah, ayeke manda Bible na mbeni wali na yanga-da ti lo, na mo ye ti bâ wali ni awara vizite ti ambeni zo use so lo ku terê ti lo na ni ape: Mbeni kota zo ti eglize na wali ti lo la aga. Na pekoni, Eliso aga ti mä so a sara yenga use awe la, koli na wali ni so aperdre oko molenge ti ala ti koli so ayeke na ngu 34.

Na temps so Eliso atene na ala condoléances ndali ti so ala perdre molenge ti ala ti koli, kota zo ti eglize ni so na wali ti lo akomanse ti toto ngangu. Na pekoni, na ngonzo kota zo ti eglize ni atene: “Mbi comprendre ape ngbanga ti nyen la Nzapa azia lege si mara ti tara tongaso asi na e! Ngbanga ti nyen la lo mû tâ oko molenge ti mbi so? A sara angu 28 awe la, mbi yeke sara na Nzapa, mbi sara gbâ ti anzoni ye, na a yeke tongaso so la lo futa mbi? Ngbanga ti nyen la Nzapa afâ molenge ti mbi?”

Eliso afa na couple ni so Nzapa la afâ molenge ti ala ni ape. Nga lo sara lisoro na ala na ndö ti ye so a futa ti zi azo, zingongo ti akuâ, nga ndani so Nzapa azia lege na aye ti sioni ti si. Kota zo ti eglize so na wali ti lo atene na Eliso so lo mû na ala tâ kiringo tënë na ahundango tënë so ala sambela ti wara ni.

Na yenga so aga na pekoni, kota zo ti eglize so na wali ti lo akiri aga, na ala kue aduti dä na temps so Eliso ayeke manda Bible na wali so lo na lo ayeke manda ka Bible so. Eliso na wali ni angbâ ti manda lani chapitre 7 ti buku Bible afa nyen biani? so li ti tënë ni ayeke “Tâ beku teti azo ti mo so akui.” Couple ni amû lani mbage mingi na lisoro ni.

Ambeni ngoi na pekoni, kota zo ti eglize so na wali ti lo ague na mbeni kota bungbi so ayeke nde, so aTémoin ti Jéhovah asara na Tbilisi (Géorgie). Ye so lani agbu bê ti ala mingi ayeke ndoye nga na beoko so ala bâ ni na popo ti aTémoin ti Jéhovah; teti angoi mingi ala sara effort lani ti mû maboko na azo ti eglize ti ala ti duti na asarango ye use so, me kue gbä.