Anduru mbeti so a honde na gbe ti machine ti sukulango na bongo

Na peko ti so Zarina awara batême lo ga Témoin ti Jéhovah, lo londo na Russie lo kiri na kodro ti lo, so ayeke na yâ ti Asie centrale. Lo leke lani na bê ti lo ti bata amolenge ti lo ti wali use alingbi na ye so lo manda na ndö ti Nzapa. Ndali ti so lo yeke na kpale ti nginza, lo na babâ na mama ti lo, ita ti lo ti koli na wali ti lo alango na yâ ti da oko. Babâ na mama ti lo atene na lo ti fa pëpe tënë ti Nzapa na amolenge ti lo. Ala tene nga na amolenge ti lo ni ti sara lisoro na ndö ti Bible na mama ti ala ape.

Zarina agbu li ti lo mingi ti bâ tongana nyen la lo peut ti aidé amolenge ti lo ni ti manda ye na ndö ti Jéhovah (aProverbe 1:8). Lo sambela Jéhovah na bê ti lo kue ti wara fango lege nga na ndara. Na pekoni lo sara ye alingbi na sambela ti lo: lakue lo yeke mû lani amolenge ni lo na ala atambela, na lo sara lisoro na ala na ndö ti apendere ye so Nzapa asara. Anduru tambela so ala sara azia na yâ ti amolenge ni nzara ti hinga ye na ndö ti Zo so acrée aye kue.

Na pekoni, Zarina agi ti bâ tongana nyen la lo peut ti fa ye na amolenge ti lo na lege ti buku Bible afa nyen biani?a Lo recopié aparagraphe nga na ahundango tënë ti buku ni na lê ti anduru mbeti. Lo sara nga ambeni tënë nde na terê ni ti aidé amolenge ni ti mä yâ ti atënë ni nzoni. Na pekoni lo honde anduru mbeti ni nga na mbeni crayon na gbe ti machine ti sukulango na bongo na yâ ti douche. Tongana amolenge ni ayeke na yâ ti douche ni, ala yeke diko aparagraphe ni nga ala sara akiringo tënë ni na lê ti mbeti.

So Zarina asara kua na kode so, lo wara lege ti manda lani achapitre use ti buku Bible afa na amolenge ti lo. Kete na pekoni, lo na amolenge ti lo ni awara mbeni ndo ti lango na ala quitté ague dä. Lo yeke libre fadeso ti fa ye na amolenge ti lo sân ti tene mbeni zo agbanzi na lo ti sara ni. Na octobre 2016, amolenge ni use kue awara batême, na ala yeke na ngia so mama ti ala asara ye lani na ndara nga na hange, tongaso si lo wara lege ti fa ye na ndö ti Nzapa na ala.