Eskê aTémoin ti Jéhovah ayeke na ambeni ndia so andu tënë ti fréquentation?

A-Témoin ti Jéhovah ahinga so andia nga na amama-ndia so ayeke na yâ ti Bible apeut ti aidé ala ti mû anzoni desizion so anzere na Nzapa nga ayeke ga na aye ti nzoni na ala (Ésaïe 48:17,18). E la e sigi na andia nga na amama-ndia so ape, me e yeke gi ti sara ye alingbi na ni na yâ ti gigi ti e. Bâ tongana nyen la ambeni mama-ndia so andu tënë ti fréquentation.a

• Mariage ayeke mbeni songo so abungbi koli na wali teti lakue lakue (Matthieu 19:6). So e aTémoin ti Jéhovah e bâ fréquentation tongana mbeni ye so ayeke mû lege na azo ti sara mariage, e yeke bâ ni tongana ye ti ngia ape.

• Gï azo so ngu ti ala alingbi ti sara mariage la adoit ti fréquenté mba. Azo ni so ‘akpengba koli wala wali awe,’ wala ala hon ngoi so nzara ti bungbingo koli na wali ahon ndö ti ala ngangu.​—1 aCorinthien 7:36.

• Azo so ayeke fréquenté mba apeut ti sara mariage. Me, ambeni zo so asara divorce si ague nde na bango ndo ti Nzapa, ala yeke libre ti kiri ti sara mariage ape ndali ti so ndia ti Nzapa afa so oko ye so amû lege na zo ti sara divorce ayeke gï tënë ti lango-sioni.​—Matthieu 19:9.

• A lingbi aChrétien so aye ti sara mariage asara ni gï na yâ ti Seigneur (1 aCorinthien 7:​39). E aTémoin ti Jéhovah e comprendre so tënë ni so aye pëpe ti sara tënë ti azo so abâ na nene ni aye so e mä na bê na ni, me aye ti sara tënë ti aTémoin ti Jéhovah so awara batême awe, so ala use kue amä na bê na a-oko ye nga ala yeke sara ye alingbi na ni na yâ ti gigi ti ala (2 aCorinthien 6:14). Nzapa ayeke fa lakue na awakua ti lo ti sara mariage gï na azo so amä na bê na aye so ala mä na bê na ni (Genèse 24:3; Malachie 2:11). Laso nga kue, azo so ayeke gi nda ti aye abâ nga so tënë ni so ayeke na lege ni.b

• A lingbi amolenge amä yanga ti ababâ na amama ti ala (aProverbe 1:8; aColossien 3:20). Amolenge so angbâ ti lango na ndo ti ababâ na amama ti ala, ala yeke mä nga yanga ti ababâ na amama ti ala na ndö ti desizion so andu tënë ti fréquentation. Mango yanga ti ababâ na amama ni andu nga desizion so ala yeke mû na ndö ti ngu so mbeni molenge-koli wala mbeni molenge-wali apeut ti komanse ti fréquenté nga na akua so amolenge ni apeut ti sara.

• Ti sara ye alingbi na amama-ndia so, a yeke na Témoin oko oko ti soro ti fréquenté mbeni zo nga ti hinga zo wa la lo ye ti fréquenté lo. Ye so ague oko na mama-ndia so atene: “Zo oko oko ayeke yô ande kungba ti lo wani.” (aGalate 6:5). Me, mingi ti azo so aye ti fréquenté mba ayeke gi awango ti ndara na mbage ti azo so akpengba na lege ti yingo nga so aye nzoni ti ala.​—aProverbe 1:5.

• Mingi ti ambeni sarango ye so azo so ayeke fréquenté mba ayeke sara ayeke akota siopkari. Na tapande, Bible ahunda na e ti kpe lango-sioni. Ye so andu gï bungbingo koli na wali ape me andu nga ambeni sarango ye so ayeke na lege ni ape so azo so ade ti sara mariage ape ayeke sara ni, na tapande, ti gbu terê ti mbeni koli wala wali, bungbingo koli na wali na yanga wala na ngbonda (1 aCorinthien 6:9-11). Kozo na mariage, ambeni sarango ye so ayeke zingo nzara ti bungbingo koli na wali même tongana azo ni asara lango-sioni ape ayeke “sioni ye” na lê ti Nzapa (aGalate 5:19-21). Sarango lisoro na ndö ti aye so andu lango-sioni ayeke “abuba tënë” so Bible ake nga ni.​—aColossien 3:8.

• Bê ti zo wala zo ti yâ ni ayeke handa zo mingi (Jérémie 17:9). A peut ti pusu mbeni zo ti sara aye so lo hinga so ayeke sioni. Ti tene bê ti ala ahanda ala ti sara aye so ayeke sioni ape, a lingbi azo so ayeke fréquenté mba akpe ti duti gï ala oko, tongaso si ala tï na yâ ti lango-sioni ape. Ti kpe ti sara ambeni ye ti sioni, a yeke kota ye ti tene ala duti na milieu ti azo nga tongana ala yeke gï ala use, a lingbi mbeni zo aduti dä (aProverbe 28:26). A lingbi aChrétien so ayeke akumbamba ahinga so ti gue na ndö ti asite Internet ti gi mbeni zo ti sara mariage na lo ayeke ga na akpale mingi, ndali ti so ala yeke sara songo na mbeni zo so ala hinga lo nzoni ape.​—Psaume 26:4.