Jésus ayeke hunzi ande sarango ye ti sioni na zo

Jésus ahinga so sarango ye ti sioni na zo nga na injustice ayeke sara si azo abâ pasi. A bi lani tënë ti mvene na li ti lo, a pika lo atâa so lo sara ye ti sioni ape, a sara ye na lo na lege ni ape, a gue na lo na gbele ngbanga, a dë ngbanga ti kuâ na li ti lo nga lo kui mbeni sioni kuâ. Atâa so lo sara ye ti sioni ape, lo yeda na bê ti lo wani ti “mû fini ti lo tongana ye so a futa ti zi azo mingi.” (Matthieu 20:28; Jean 15:13). So Jésus ayeke fadeso Gbia ti Royaume ti Nzapa, na yâ ti kete ngoi, lo yeke sara ande si sarango ye na zo na lege ni amû ndö ti sese kue nga lo yeke hunzi ande sarango ye ti sioni na zo biani biani.—Ésaïe 42:3.

Bible afa tongana nyen la azo ayeke vivre ande na peko ti so Jésus ayeke sara ye so:

• “Azo ti sioni ayeke duti dä encore ape; mo yeke bâ ande place so ala yeke lani dä, me ala yeke duti dä encore ape. Me azo so asara terê ti ala kete, sese ayeke ga ye ti ala, na ala yeke duti na ngia mingi na yâ ti siriri so amû ndo.”—Psaume 37:10, 11.

Tongana nyen la e peut ti fa so e kiri singila ndali ti aye kue so Jésus asara ndali ti e laso nga na yâ ti angoi so ayeke ga? Mbeni lege ni ayeke ti gi ti hinga ye mingi na ndö ti “nzoni tënë ti Royaume ti Nzapa” so Jésus asara tënë ni lani (Luc 4:43). Diko article “Royaume ti Nzapa ayeke nyen?”