Eskê Harmaguédon ayeke komanse ande na Israël? Bible atene nyen na ndö ni?

Tongana ti so Bible afa, Harmaguédon ayeke pëpe mbeni bira so ayeke passé gï na mbeni kodro, me a yeke mbeni bira so ayeke passé na yâ ti dunia kue na popo ti agouvernement ti azo na Nzapa.

• “Atënë so alondo na asioni yingo . . . a gue na mbage ti agbia ti sese kue so azo ayeke dä, ti bungbi ala oko ndali ti bira ti kota lâ ti Nzapa, Lo so ngangu ti lo ahon angangu kue. . . . A bungbi ala na ndo so a iri ni na yanga ti Hébreu, a tene: Harmaguédon.”—Apocalypse 16:14, 16.

Tënë “Harmaguédon” alondo na yanga ti Hébreu Har Meghiddôn, so ndani aye ti tene “Hoto ti Méguiddo.” Méguiddo ayeke lani mbeni gbata so ayeke na yâ ti territoire ti Israël ti ândö. Ndali ni la ambeni zo apensé so Harmaguédon ayeke tï ande na Israël. Me, mbeni ndo na Méguiddo wala mbeni mbage ti ndo na Moyen-Orient alingbi pëpe ti bungbi ‘agbia ti sese kue so azo ayeke dä’ nga na aturugu ti ala.

A sara lani mbeti ti Apocalypse “na lege ti afä” wala na lege ti atapande (Apocalypse 1:1). Harmaguédon aye ti sara tënë ti mbeni vrai ndo tongaso ape, me aye ti sara tënë ti mbeni ye so ayeke asi na yâ ti dunia kue so amara ayeke bungbi terê ti ala ti ndangba ni ti ga contre komandema ti Nzapa.—Apocalypse 19:11-16, 19-21.