Lettre ti Bebungbi
Aita so e ye ala mingi:
So pasa ti tene iri ti Gbia ti Dunia Kue, Jéhovah, ayeke na ndo ti e! Iri so angbâ kpu na kpu, ayeke girisa pëpe na mbeni ti lingbi na ni ayeke pëpe. Jéhovah wani la amû iri so na e, na a yeke mbilimbili na ngu 1931 si azo ahinga e na iri so (És. 43:10). A yeke na lege ni ti tene e pika kate ti e lakue so e yeke aTémoin ti Jéhovah.
Zabolo azia pëpe ti tara ti miro iri ti Nzapa. Azo so ayeke na gbe ti ngangu ti lo ane iri ti Jéhovah pëpe. Babylone, Ngangu gbata, bungbi ti anzapa ti wataka ti dunia kue, ake iri ti Nzapa na lo zi ni na yâ ti aBible mingi. Me ti Jésus, lo yä na nduzu iri ti Babâ ti lo, lo zia ni na kozo ndo na yâ ti tapande ti sambela so lo fa na adisciple ti lo. Lo tene: “A lingbi ala sambela tongaso: ‘Babâ ti e so mo yeke na yayu, zia a sara si iri ti mo aga nzoni-kue.’ ” (Mat. 6:9). Mbeni lâ, na yâ ti mbeni sambela so lo sara na bê ti lo kue na Babâ ti lo, lo tene: “Mbi fa iri ti mo polele na azo so mo mû na mbi na yâ ti dunia so.” (Jean 17:6). Teti so e ye ti mû tapande ti Jésus, e leke na bê ti e ti fa iri ti Jéhovah na ngangu ti e kue na ndo ti sese kue.
Versê ti ngu 2009, “Fa nda ti tënë ni kue na ndo ti nzoni tënë”, apusu e ti sara kusala ti e kue (Kus. 20:24). Kite ayeke pëpe so Jéhovah airi tënë nzoni mingi na ndo ti angangu so e sara na yâ ti ngu ti kusala so ahon. A fa tënë ngangu na ndo ti sese kue ti mû gonda nga na nengo na iri ti Jéhovah. Fini wungo ti awafango tënë so ayeke fadeso 7 313 173 abungbi lego ti ala ti fa tënë na azo kue, nga ala fa ye na azo ti nzoni bê so ayeke gi ti leke akpale so ala yeke wara lâ na lâ. Wungo ti azo 18 168 323 so aga na Dango bê na kuâ ti Christ afa so azo kutu mingi angbâ ti tene a di iri ti Jéhovah na ndo ti ala kozo si nda ti aye ti ngoi so ayeke sioni so asi.
Tongana Jéhovah angbâ ti mû lege na e, e yeke ngbâ ti fa nzoni tënë ti Royaume na ngia na bê, na sarango kusala na aye kue so ayeke dä ti ndu azo na yâ ti territoire ti e (Mat. 24:14; Marc 13:10). Atâa a yeke fango tënë da na da, na ndo ti lege, na lege ti lettre nga na pikango singa wala na alege kue so azi na e, zia e sara ye kue so ayeke na ngangu ti e ti sara si azo ahinga iri ti Jéhovah na ye so lo leke ti sara.
E yeke na araison mingi ti hinga na bê ti e kue so na yâ ti kete ngoi Jéhovah ayeke sara si iri ti lo aga nzoni-kue (Ezéch. 36:23). Ngoi ayeke ga nduru nduru so fade a yeke kanga yanga ti azo kue so azonga iri so. So mbeni lango ti gloire si ayeke duti ande teti awakua be-ta-zo ti Jéhovah kue, so asara si azo ahinga iri ti Jéhovah na ayä na nduzu droit ti lo komande dunia kue!
So Jéhovah ayeke bâ lege ti azo ti lo na ndoye asigigi polele na ngoi ti a-assemblée ti district na internationale so li ti tene ni ayeke “Ala lango pëpe!” so a sara ni na ndo ti sese kue na ngu 2009. Akota bungbi so ayeke mbeni kpengba ye so asi na yâ ti mbaï ti bungbi ti e, na a pusu e ti tene lê ti e akpengba ti ku lâ ti Jéhovah.—Marc 13:37; 1 aThes. 5:1, 2, 4.
Biani, Jéhovah ayeke nzoni; lo sara si e wu tere na benyama so fini pere ayeke dä; lo fa lege na e na tere ti ngu so asua na ngangu pëpe.—Ps. 23:1, 2; 100:2, 5.
Zia ala hinga so Jéhovah angbâ ti iri tënë nzoni na ndo ti ala na ngoi so ala ngbâ ti duti na ye mingi ti sara na yâ ti kua ti Royaume na yâ ti anze so ayeke ga!
E tokua ndoye ti e na aita na ndo ti sese kue,
Aita ti ala,
Bebungbi ti aTémoin ti Jéhovah