MBENI TËNË TI YÂ TI BIBLE

Nzapa apardonné asiokpari so a sara ni ândö

Jéhovah apeut ti pardonné e gï na lege ti ye so a futa ti zi azo so Jésus afuta ni na mênë ti lo (aÉph. 1:7). Me Bible atene: “Nzapa afa mbilimbili ti lo wani na gigi ngbanga ti so lo yeke pardonné asiokpari so a sara ni ândö”, so ti tene kozo si Jésus amû ye so a futa ti zi azo (aRom. 3:25). Tongana nyen la Jéhovah apeut ti pardonné asiokpari kozo si a futa ye ti zi azo nga lo ngbâ ti duti Nzapa ti mbilimbili?

Jéhovah amû zendo so mbeni “hale” ayeke sö azo so ayeke na mabe na Lo nga na azendo ti Lo. Na ngoi so lo mû zendo so, a yeke lani mo bâ mo tene lo mû awe ye so a futa ti zi azo (Gen. 3:15; 22:18). Nzapa ahinga lani biani so tongana ngoi ni alingbi, oko Molenge ti lo so lo ye lo mingi ayeke yeda ti mû ye so a futa ti zi azo (aGal. 4:4; aHéb. 10:​7-10). Na ngoi so Jésus ayeke lani na sese, Jéhovah amû na lo ngangu ti pardonné asiokpari kozo si a mû ye so a futa ti zi azo. Jésus apeut lani ti pardonné asiokpari ti azo so amä na bê ndali ti so lo hinga so sacrifice so lo yeke mû ayeke kanga ndö ti asiokpari ti ala. —Mat. 9:​2-6.