Atënë so azo ahunda

Eskê ambage ti “lengo ti yingo” kue la a fa ni na aGalate 5:22, 23 so?

Aversê so afa anzoni sarango ye gumbaya ti aChrétien: “Lengo ti yingo ayeke ndoye, ngia, siriri, kangango bê ti ku, sarango nzoni na zo, nzoni bê, mabe, sarango ye na ngangu pëpe, kangango nzara ti bê.” Me a lingbi e bâ pëpe so gï anzoni sarango ye so la yingo ti Nzapa alingbi ti mû maboko na e ti duti na ni.

Bâ ye so bazengele Paul atene na yâ ti aversê so aga kozo: “Akusala ti mitele ayeke . . . lango-sioni, sioni ye, sarango sioni ye sân kamene, vorongo yanda, sarango yorö, kengo terê, tiri, kota bê, sungbango na ngonzo lakue, papa, kangbi, tënë ti secte, sarango bê ti ye, nyongo sämba ahon ndö ni, pumba ti kirikiri nga na ambeni ye tongaso.” (aGal. 5:19-21). Tongaso, Paul alingbi lani ti fa ambeni ye so ayeke “akusala ti mitele”, tongana ati so lo sara tënë ni na aColossien 3:5. A yeke nga legeoko tongaso na ndö ti anzoni sarango ye gumbaya so Paul afa ni na aGalate 5:22, 23. Tongaso, Paul afa lani pëpe anzoni sarango ye kue so yingo vulu alingbi ti mû maboko na e ti duti na ni.

Ye so asigi polele tongana e haka lengo ti yingo so Paul afa na ye so lumière alë so lo sara tënë ni na congrégation ti Éphèse. Lo tene: “Ye so lumière alë ayeke mara ti alege nde nde kue ti nzoni bê, alege nde nde kue ti mbilimbili nga na ti tâ tënë.” (aÉph. 5:8, 9). Biani, “nzoni bê,” legeoko na mbilimbili nga na tâ tënë, ayeke mbage ti “ye so lumière alë”, me a yeke nga mbeni mbage ti “lengo ti yingo”.

Legeoko nga, Paul awa Timothée ti “tomba peko ti mbilimbili, vorongo Nzapa na bê kue, mabe, ndoye, gbungo ngangu nga sarango ye na ngangu pëpe”, anzoni sarango ye omene (1 Tim. 6:11). Gï aye ota na popo ni (mabe, ndoye nga na sarango ye na ngangu pëpe) la Paul azia na popo ti ambage ti “lengo ti yingo”. Ye oko, Timothée ayeke lani biani na bezoin ti sara ye mbilimbili, ti voro Nzapa na bê kue nga ti gbu ngangu, na lo hinga so lo bezoin yingo ti Nzapa ti mû maboko na lo ti sara aye so.—Bâ nga aColossien 3:12; 2 Pierre 1:5-7.

Tongaso, aGalate 5:22, 23 afa pëpe anzoni sarango ye kue so aChrétien adoit ti duti na ni. Yingo ti Nzapa alingbi ti mû maboko na e ti duti na ambage gumbaya ti “lengo ti yingo” so a fa ni. Me gbâ ti anzoni sarango ye ayeke dä so e bezoin ti duti na ni na ngoi so e yeke ga aChrétien so ayeke abiazo nga e yeke “yü fini zo so a sara lo alingbi na ye so bê ti Nzapa aye na so ague oko na tâ lege ti mbilimbili nga na tâ lege ti dutingo be-ta-zo.”—aÉph. 4:24.