Mû maboko na mba ti mo na fango tënë ahon ti duti kpô
1. Tongana nyen e lingbi ti duti na mara bibe so bazengele Paul ayeke na ni na ngoi so e yeke fa tënë legeoko na aita ti e?
1 Bazengele Paul abâ ngoi so lo mû ti duti na tere ti amba ti lo aChrétien tongana mbeni lege so azi na lo ti ‘kpengba tere na popo ti ala’. (aRom. 1:12). Tongana mo na mbeni mba ti mo ayeke fa tënë, mo yeke mû ngoi ni so ti kpengba lo nga ti mû maboko na lo? Ahon ti duti gi kpô, ngbanga ti nyen mo fa na lo pëpe ye so amû maboko na mo ti ga mbeni nzoni wafango tënë?
2. Nyen la e lingbi ti sara ti zi mbeto na bê ti ita so e yeke fa tënë legeoko na lo, nga ngbanga ti nyen a yeke kota ye?
2 Tara ti zi mbeto na bê ti lo: Mo lingbi ti hinga so mingi ti awafango tënë ayeke sara mbeto gi na bango lê ti ala wala na mango totongo ti go ti ala. E lingbi ti kpengba ala na lege so e yeke gonda ala na bê ti e kue. Na ambeni lege wa e lingbi ti zi mbeto na yâ ti bê ti amba ti e? Mbeni surveillant so ayeke gue na ndo nde nde atene na mbeni ita so lo na lo asigigi na fango tënë so ni kue lani ni yeke na mbeto nga so ni sambela ti hon ndo ni. Mbeni ita-koli nde afa ye so amû maboko na lo ti hon ndo ti mbeto, lo tënë: “Mbi yeke to nda ni na hengo kete ngia. Na ambeni ngoi a lingbi mbi sambela ti wara mungo maboko ti sara ni.” Nyen la amû maboko na mo lani ti fa tënë sân ti sara mbeto? Fa ni na ita so mo na lo ayeke fa tënë legeoko.
3. Na ngoi so e yeke fa tënë, nyen la e lingbi ti fa na mba ti e ti mû maboko na lo ti ga mbeni nzoni wafango tënë?
3 Fa na lo ambeni kode ti mo: Mo leke awe mbeni kozo tënë wala mbeni hundango tënë so akpengba pëpe, peut-être mbeni ye so asi na ndo so mo yeke dä, so alingbi ti mû maboko na mo ti to nda ti mbeni nzoni lisoro? Mo leke mbeni kode ti fango tënë na atënë ti mo wani so aga na mo aye ti nzoni? Fa ni na mba ti mo so mo na lo ayeke fa tënë (aProv. 27:17). Na ngoi so ala yeke kiri ti sara mbeni vizite, fa na mba ti mo ni aye so mo leke ti sara tënë na ndo ni nga tongana nyen mo yeke sara ni. Na peko ti so ala hunzi ti sara mbeni étude, mo lingbi ti fa na lo nda ni so mo soro mbeni tënë, mbeni versê, wala mbeni kode ti fango ye tongaso ti lingbi na bezoin ti wamandango ye ni.
4. Ngbanga ti nyen a lingbi e bi bê ti e ti mû maboko na amba ti e awafango tënë?
4 Akozo Chrétien aluti lani mingi pëpe gi na ndo ti mungo maboko na azo so amä na bê pëpe. Ala bâ lani so ayeke nga kota ye mingi ti mû maboko na mba na ti kpengba tere na popo ti ala (Kus. 11:23; 15:32). Bazengele Paul afa ye lani na maseka Timothée na lo wa lo ti fa nga na ambeni zo aye so lo manda ni (2 Tim. 2:2). Tongana e girisa pëpe ti mû maboko na amba ti e aChrétien na ngoi ti fango tënë, e yeke zia gi ngia na bê ti ala pëpe wala ti tene ala ga gi anzoni wafango tënë pëpe, me e yeke zia nga ngia na bê ti Babâ ti e ti yayu.—aHéb. 13:15, 16.