A-article so alingbi ti mû maboko na e na fango tënë
1. Ndali ti araison use wa a sigigi na a-article “Lisoro na mbeni zo”?
1 Ngoi na ngoi, a yeke wara na yâ ti Tour ti Ba Ndo so e yeke fa na tënë mbeni article so li ni ayeke “Lisoro na mbeni zo.” A yeke sigigi na a-article so ndali ti araison use: Ti fa Bible na azo na mbeni lege so anzere na ala, nga a fa na e tongana nyen ti kiri tënë na kode na azo na ndo ti ambeni atënë (1 Pi. 3:15). Tongana nyen la e lingbi ti sara kusala nzoni na a-article so?
2. Tongana nyen la e lingbi ti sara kusala na a-article so na fango tënë?
2 Sara kusala na ni na fango tënë: Mo lingbi ti bata a-Tour ti Ba Ndo so a-article so ayeke na yâ ni. Tongana mbeni zo so asara nzara ti tënë ni wala mbeni wamandango Bible ahunda mbeni tënë wala lo ye ti kanga lege na lisoro ni, fa na lo article so ague oko na tënë ti lo ni, nga hunda ti sara lisoro na ndo ni. Tongana mo yeke na Tour ti Ba Ndo so pëpe, so na yâ ni a yeke wara article so ague oko na tënë ti lo ni, peut-être mo lingbi ti téléchargé ni na ndo ti jw.org.
3. Tongana nyen la e lingbi ti sara lisoro na ndo ti mbeni oko ti a-article so na mbeni zo?
3 Tongana nyen la mo lingbi ti sara lisoro na ndo ti mbeni oko ti a-article so na mbeni zo? Ambeni ita ayeke hunda na zo ni ti diko na kota go atënë ti zo so ayeke ti lo Témoin pëpe so, me aita ni ayeke diko ti ala atënë ti zo so ayeke Témoin ni. Aita ni abâ so ti sara lisoro na ndo ti a-article so alingbi ti ga na aye ti nzoni ngbanga ti so ayeke mû lege na zo ni ti hinga aye so e mä na bê na ni sân ti zia ngonzo na bê ti lo.—Deut. 32:2.
4. Tongana nyen la e lingbi ti sara kusala na a-article so ti tara tere ti e wani?
4 Tara tere ti mo nga fa ni na ambeni zo: Na ngoi so mo yeke diko a-article so, sû na mbeti aversê, atapande, nga akpengba tënë so ayeke na yâ ni. Bâ nga fason so a sara na tënë ni. Na pekoni tara ti sara ye alingbi na ni na ngoi so mo yeke fa tënë (aProv. 1:5; 9:9). Mbeni ita-wali atene: “Dikongo a-article so akpa mandango ye na tere ti mbeni ‘nzoni’ pionnier so e yeke fa tënë legeoko na lo, so ahinga lakue tâ mbilimbili tënë ti tene!”
5. Tongana nyen la e lingbi ti mû maboko na azo so e manda Bible na ala ti leke ala ndali ti fango tënë?
5 Mo lingbi nga ti sara kusala na atapande ti yâ ti a-article so ti mû maboko na azo so mo yeke manda Bible na ala ti leke ala ndali ti fango tënë. Ala diko atënë ni legeoko, hunda na wamandango ye ni ti duti tongana zo so ayeke fa tënë na mo. Na sarango tongaso, awamandango Bible ni ayeke hinga ande tongana nyen ti sara tënë ti mabe ti ala na kode (aCol. 4:6). Biani, a-article so ayeke mbeni oko ti alege so Jéhovah ayeke mû maboko na e ti sara kusala ti e “kue” ti fango tënë.—2 Tim. 4:5.