Nyen la ayeke zia ngia na bê ti mo?
1. Nyen la ayeke zia ngia na bê ti e na hunzingo ti nze oko oko?
1 Na hunzingo ti nze oko oko tongana a hunda na azo kue ti mû rapport ti ala, nyen la ayeke zia ngia na bê ti mo? (aGal. 6:4). Atâa e yeke pionnier spécial so amû l’heure 130 na fango tënë wala mbeni wafango tënë so a yeda na lo ti mû gi penze-ngbonga 15, a lingbi e kue e duti na ngia ndali ti so e wara lege ti sara na Jéhovah na ngangu ti e kue.—Ps. 100:2.
2. Ngbanga ti nyen a lingbi e mû tere ti e mingi na kua ti Jéhovah?
2 Teti so Jéhovah ayeke Kota Gbia ti Dunia Kue, a lingbi e mû na lo anzoni ye so e yeke na ni (Mal. 1:6). A yeke ndali ti so e ye lo, ni la e mû tere ti e kue ti sara ye so bê ti lo aye. Ni la, tongana lango oko ahon wala nze oko ahon, si e hinga so e mû ngoi ti e, akode ti e nga na ngangu ti e ti sara na kua ti Jéhovah, bê ti e ayeke nzere mingi (aProv. 3:9). Ka tongana e sara ni pëpe si yingo-ti-hinga ti e afâ ngbanga na ndo ti e? A yeke nzoni e gbu li ti e ti bâ tongana nyen ti leke kpale ni.—aRom. 2:15.
3. Ngbanga ti nyen a yeke na lege ni pëpe ti haka tere ti e na ambeni zo?
3 ‘Haka tere na mbeni zo nde pëpe’: A yeke na lege ni pëpe ti tene e haka kua so e yeke sara laso na ti amba ti e wala na ti so e wani e sara ândö na ngoi so e ngbâ ngangu. Dutingo ti azo ayeke nde nde, ngangu ti e alingbi tere pëpe. Hakango tere na mbeni zo ayeke ga na mandako wala ayeke sara si zo abâ so lo yeke ye oko pëpe (aGal. 5:26; 6:4). Jésus ayeke haka lani kua ti azo pëpe. Me, lo gonda zo tongana zo ni asara ye so alingbi na ngangu ti lo.—Marc 14:6-9.
4. Pendere ye wa e lingbi ti manda na lege ti parabole ti Jésus na ndo ti atalent?
4 Na yâ ti parabole ti Jésus na ndo ti atalent, a mû na zo oko oko atalent so “alingbi na ngangu ti lo”. (Mat. 25:15). Na ngoi so wa ni akiri lo hunda na azo ni ti fa ye so ala sara, lo gonda zo so asara ye alingbi na ngangu ti lo na lo tisa lo ti duti na ngia legeoko na wa ti lo (Mat. 25:21, 23). Laso nga a yeke tongaso, tongana e ngbâ ti fa tënë ti royaume a yeke nzere na Nzapa, na e so e sara kua ni e yeke na ngia!