Fi gobo na lege ti ndara
1 Bazengele Paul atene: “Lege so mbi yeke kpe na loro ayeke kirikiri pëpe. Lege so mbi yeke fi gobo ayeke ti pika yâ ti pupu pëpe.” (1 aCor. 9:26). Lo ye ti fa tongana nyen la lo zia lê ti lo mingi gi na ndo ti aye ti yingo. Me, ti bâ ni nzoni, atënë ni so andu nga fango tënë. E ye si fingo “gobo” so e yeke fi na ni, so ti tene ngangu so e yeke sara, e sara ni na ndara si a ga na aye ti nzoni. E lingbi ti sara ni tongana nyen?
2 E gue na ando so azo ayeke dä: Paul na amba ti lo awafango tënë afa lani tënë na ando so ala hinga so ala yeke wara azo dä (Kus. 5:42; 16:13; 17:17). Ti e nga tongana mingi ti azo ti territoire ti e ayeke na yanga-da ti ala gi na lakui, a lingbi ti duti nzoni ngoi ti fa tënë da na da. Na ndo so mo yeke dä, azo ayeke ka mingi na ando so abus na ataxi aluti dä? Peut-être na ndapre na ngoi so azo ni ayeke gue na kua wala na lakui na ngoi so ala yeke kiri na yanga-da. Na ngoi wa la azo asi yâ ti agara nga na ando so a yeke kä ye dä? Na angoi tongaso fango tënë na ndo ti lege alingbi ti lë lengo mingi.
3 E fa tënë na yâ ti territoire ti e na ndara: A yeke nga nzoni ti fi gobo na lege ti ndara tongana a ndu lege so e yeke fa na tënë na yâ ti territoire ti e. Na tapande, ahon ti tene gbâ ti awafango tënë afa tënë na ndo oko, so bango ndo na ndo ni amû kua nga na ngoi mingi, a yeke peut-être nzoni ti kangbi ala na agroupe. Legeoko nga, tongana e yeke fa tënë na ando so ayo na agbata, zia si agroupe ni aduti gbani pëpe tongaso si e fa tënë na yâ ti territoire ni kue nga si e wara lege ti fa tënë na azo mingi. Mo lingbi ti wara territoire ti mo wani nduru na da ti mo? si mo mû ngoi mingi pëpe ti gue dä.
4 Jésus ahaka awafango tënë na “awagingo azo.” (Marc 1:16, 17). Na tapande, mbeni zo ti gingo susu ayeke bi gbanda gi ndali ti nzara ni pëpe me a yeke ti gbu na asusu. Tongaso, anzoni zo ti gingo susu ayeke gue na ando so ala hinga atene ala yeke wara asusu dä nga ala hinga lawa si asusu ni ayeke sigigi mingi, na ala yeke ku pëpe ti bi gbanda ti ala ni. Biani, ala yeke sara ye na lege ti ndara. Zia e nga kue e sara tongaso na fango tënë.—aHéb. 6:11.
[Ahundango tënë ti manda na ye]
1. Kozo mbeti ti aCorinthien 9:26 andu fango tënë tongana nyen?
2. Tongana nyen e lingbi ti mû tapande ti Paul na amba ti lo awafango tënë na ngoi so e yeke soro ngoi nga na ndo so e ye ti fa tënë dä?
3. Fa lege so e lingbi ti fa na tënë na yâ ti territoire ti e na lege ti ndara.
4. Nyen la ayeke mû maboko na e ti ga anzoni ‘wagingo azo’?