BATA NI
Bata ye so Mbeti ti Nzapa afa na ndo ti tënë ti mungo amolenge ti e na afami
“‘Placer’ ses enfants — Est-ce la voie de la sagesse?” ayeke lani mbeni pendere article na yâ ti Tour ti Ba Ndo ti 1 septembre 1988 na Français. Mingi ti awafango tënë so ayeke sara kusala na Kusala ti Royaume ti Bê na Do ti Afrika aga aTémoin ti Jéhovah na ngoi so article so asigigi lani awe. A kiri na ndo ti ambeni tënë ti yâ ti article so ge ti mû maboko na e ti hinga bango ndo ti Jéhovah na ndo ti tënë so.
1. Bibe wa azo ayeke na ni na ndo ti amolenge?
1 Ndani so ala yeke mû amolenge ti ala na afami. Atâa so bango ndo ti azo na ndo ti aye so a bâ a tene ayeke kota ye ayeke changé changengo, ti azo ti Afrika, molenge ayeke gi ti babâ na mama so adü lo pëpe. Nde na so, molenge ni ayeke ti afami kue. A bâ so a-omba, amama-kete na mama-kota, akoya, ababâ-kete na ababâ-kota, a-âta nga na ambeni fami ni ayeke na droit nga na ngangu na ndo ti amolenge ni. Tongana ti so mbeni mato ti mbage ti Do ti Afrika atene: “Zo oko la ayeke dü molenge, me azo ti batango ni ayeke mingi.”
2, 3. a) A-raison wa la ayeke pusu ababâ na amama ti mû amolenge ti ala na afami? b) Tongana ti so encadré ni afa, be-nzoni wa Nzapa alingbi pëpe ti sara ni na amolenge so ayeke na gbe ti ambeni zo nde?
2 Tongaso, tongana mbeni ye ti ngangu asi, na tapande tongana babâ na mama ti molenge ni akui, afami ni ayeke duti nduru ti yeda ti mû molenge ni ti bata lo. Me, kozo ndani so azo ayeke mû amolenge ti ala na afami ti bata ni ayeke ka kpale ti nginza. Tongana sewa ni ayeke na yâ ti yere na amolenge ni ayeke mingi, babâ na mama ni alingbi ti bâ so ambeni molenge ni alingbi ti bâ nzoni tongana ala yeke na ndo ti ambeni fami so duti ti ala ayeke nzoni. Ala tene ti ala so a yeke duti ande ngangu pëpe na afami ni so ti futa ekole ti amolenge ni, ti vo na ala bongo, ti vo yorö na ala nga ti mû na ala kobe. Tongaso, a yeke pëpe ngbanga ti so babâ na mama ni aye amolenge ni pëpe, me, a yeke nzara ti mungo ye ti nzoni na amolenge ni la apusu ala ti mû amolenge ni na ambeni zo nde ti bata ni.
3 Mbeni nda ti tënë ni ayeke so babâ na mama ni aye si amolenge ni amanda mbeti nzoni. Peut-être mbeni ekole ayeke nduru pëpe na ndo so sewa ni ayeke dä. Teti so a lingbi ti duti ngangu na sewa ni so ti gue ti lango nduru na ekole ni so, babâ na mama ni alingbi ti bâ so a yeke nzoni ti tokua molenge ni na afami so ayeke nduru na ekole ni so.
4. Na ndo ti tënë ti batango amolenge, fa akpengba wango ti Bible use so a yeke nzoni afa lege na aChrétien.
4 Aye ti yingo ayeke kota ye. Nzoni duti ti molenge ni na lege ti yingo la ayeke kota ye ahon atanga ni kue. Na lege ti ndara, Nzapa ahunda na ababâ na amama ti bâ lege ti abezoin ti amolenge ti ala na lege ti yingo ala wani. Nzapa amû wango na ababâ na amama so ayeke na Israël lo tene: “A lingbi komandema so mbi mû na mo laso aduti na bê ti mo; na fade mo fa tënë ni na amolenge ti mo biani, na mo sara tënë ti komandema so, tongana mo yeke duti na da ti mo, tongana mo yeke tambela na lege, tongana mo gue ti lango, na tongana mo londo.” (Deut. 6:6, 7). Bazengele Paul amû nga mara ti wango tongaso na ababâ so ayeke aChrétien lo tene: “Ala son bê ti amolenge ti ala pëpe, me ala ngbâ ti bata ala na lege ti sengo ndo nga na awango ti gbotongo mê so alondo na Jéhovah.”—aÉph. 6:4.
5. Ti mû amolenge na mbeni zo nde ti bata alingbi ti ga na kpale wa na lege ti yingo?
5 Me tongana nyen si a lingbi ti bata molenge “na lege ti sengo ndo nga na awango ti gbotongo mê so alondo na Jéhovah” tongana lo yeke na gbe ti afami so ahinga Jéhovah pëpe? Tongaso, a yeke na lege ti ndara pëpe ti dö abezoin ti molenge ni na lege ti yingo ti zia ndali ti tënë ti nzoni mandango mbeti!
6. Ti mû molenge na mbeni sewa so ayeke voro Jéhovah ti bata la ayeke sara si akpale kue ahunzi? Ngbanga ti nyen?
6 Ka tongana molenge ni ayeke na gbe ti amba ti e so e na ala e yeke voro Jéhovah? Atâa so a yeke nzoni ahon ti so molenge ni ayeke na gbe ti azo so ayeke voro Jéhovah pëpe, ye so ayeke nga nzoni pëpe na yâ ti aye mingi. Molenge ni alingbi ti gi lakue ti hon ndo ti akota gbiango ye so andu dutingo ti lo, atënë ti bê ti lo nga na lege so lo yeke gbu li ti lo. Ambeni molenge atï na yâ ti kota vundu wala ala to nda ti sara aye ti kirikiri nga ala mû peko ti asioni kamarade. Ambeni ayeke encore na nzara ti aye ti yingo kete pëpe.
7. a) Ti tene ababâ na amama afa na molenge ti ala ti ndoye Jéhovah, a hunda nyen? b) Kpengba ye so molenge ni alingbi ti girisa ni ayeke nyen?
7 Tongana ti so ababâ na amama ahinga, ti yôro na yâ ti bê ti mbeni molenge ndoye teti Jéhovah, a hunda kode, kangango bê nga na ngoi mingi. Tongana a yeke ngangu na babâ na mama ti molenge ni so ahinga lo nzoni mingi ato nda ni na ngoi so ala dü lo, a yeke duti ngangu mingi ahon na mbeni koli na wali ti bata mbeni molenge so ala la adü lo pëpe! Teti so aye alingbi ti sara si molenge ni agirisa beku ti lo ti fini ti lakue lakue, a lingbi ababâ na amama abâ tënë so nzoni nga ala sambela ti bâ wala a yeke biani nzoni ti mû molenge na mbeni zo nde ti bata ni.
8. Ti lingbi na 1 Timothée 5:8, kusala wa ababâ na amama alingbi ti dö ni ti zia pëpe?
8 Ni la, a yeke ti ababâ na amama ti tene ala wani abâ na lege wa ala lingbi ti sara ye a lingbi na 1 Timothée 5:8 so atene: “Ti tâ tënë ni, tongana mbeni zo abata azo ti lo pëpe, na mbilimbili azo ti da ti lo, lo dö lege ti mabe lo zia awe, na sioni ti lo ahon ti zo so amä na bê pëpe.” Tongana ala wani alingbi pëpe ti mû na molenge ti ala aye ti mitele so lo yeke na bezoin ni, a lingbi ala sara kue si molenge ni awara aye so lo yeke na bezoin ni na lege ti yingo na mbeni lege so ayeke nzoni ahon, atâa dutingo ti ala ayeke tongana nyen.
9. Tongana ababâ na amama so ayeke aChrétien asara ye lakue alingbi na awango ti Bible, ala yeke wara aye ti nzoni wa?
9 Amolenge ayeke mbeni matabisi so Jéhovah Nzapa amû (Ps. 127:3). Tongaso, bâ amolenge ti mo tongana mosoro na zia ala ngbâ na tere ti mo. Ye ala na zia nga si ala ye mo. Mû maboko na ala ti tene ala ga akoli na awali so akpengba na lege ti yingo, teti na sarango tongaso, ala yeke wara tufa ti Nzapa teti lakue lakue. Peut-être mo lingbi ti tene ande oko tënë so Jean atene lani na ndo ti amolenge ti lo na lege ti yingo lo tene: “Tongana mbi mä a tene amolenge ti mbi angbâ ti tambela na yâ ti tâ tënë, mbeni ye nde ti pusu mbi ti kiri singila mingi ahon aye so ayeke dä pëpe.”—3 Jean 4.