Tour ti Ba Ndo na Réveillez-vous!: ambeti-sango so ayeke fa tâ tënë
1 Na France, mbeni wali so adiko ambeti-sango ti e asara lettre so, lo tene: “Mbi de maseka, mbi yeke zo ti sese ti Afrika na mbi gue na ekole ayo pëpe. Mbi komanse ti diko ambeti-sango ti ala ade ti ninga pëpe. Atënë ti yâ ni agbu bê ti mbi mingi, na a sara si mbi hinga nene ti dikongo mbeti. Singila mingi na ala so mbi wara lege ti hinga afini mbupa mingi, na mbi lingbi fadeso ti sû mbeti na afaute mingi pëpe. Bê ti mbi adö mingi ti bâ so ala yeke sara tënë ti aye nde nde na ndo ti azo, na ndo ti sese nga na Wasarango ye. Ambeti so afa ye polele na azia na yâ ti zo nzara ti dikongo mbeti. A yeke ngangu ti wara mbeni zo so ayeke na akode ti fa ye na azo nde nde kue gi na ngoi oko. Bê ti mbi akiri adö ti hinga so aye so ala sara so ayeke ti wara nginza na pekoni pëpe, me gi ti sara si a hinga iri ti Jéhovah. Mbi hinga so Jéhovah ayeda na ye so ala yeke sara so, na mbi kiri singila na ala. Zia Wasarango ye angbâ ti mû ngangu na ala ti fa ye.”
2 Ti mo ayeke tongana nyen? Mbeni article ti Tour ti Ba Ndo wala ti Réveillez-vous! andu fini ti mo? Tongana ayeke tongaso, kite ayeke pëpe so mo ye biani ti kiri singila ndali ti ambeti-sango ti e. Mo lingbi ti fa singila ti mo tongana nyen? Gi tongana mo yeke diko apériodique oko oko kue so ayeke sigigi. Mo lingbi nga ti sara ni, tongana lege ayeke dä, ti kangbi apendere mbeti so na azo mingi. Mo yeke sara ni tongana nyen?
3 Zia mbeni lango nde ti kangbi apériodique: Kusala ti Royaume ti octobre 1952 atene: “Nzoni lege ti kangbi apériodique ti e ayeke ti sara ni da na da nga na yâ ti amagazin. Tongaso Société ahunda ti tene lakue na lango ti kangbingo apériodique, e kangbi da na da nga na yâ ti amagazin.” Laso, wango so angbâ lakue na ngangu. Ti mingi ti acongrégation, nzoni lango ni ayeke samedi. Tongaso, zia congrégation oko oko asoro mbeni lango wala mbeni lakui ti fa tënë na apériodique da na da, na yâ ti amagazin, na ndo ti lege, nga ti gue na ni na azo so e yeke mû ka apériodique na ala. Nyen la wafango tënë oko oko alingbi ti sara ti kangbi apériodique mingi?
4 Gi ti hinga na li ambeni tënë ti yâ ti apériodique ni: Diko apériodique ni kozo si. Tongana mo diko article oko oko kue awe, hunda tere ti mo: ‘Article so ayeke nzere ande na zo wa?’ Gbu li na ndo ti mbeni nduru tënë so mo lingbi ti tene na mbeni zo ti pusu lo ti diko article ni. Nde na lango so azia ni nde ti kangbi na apériodique, ngbanga ti nyen mo mû lakue ambeni numero ti apériodique na tere ti mo pëpe? Ye so alingbi ti mû lege na mo ti fa ni na azo na ngoi so mo yeke gue na voyage, wala mo yeke gue ti vo ye, wala mo yeke sara lisoro na mbeni mba ti mo na place ti kua, avoizin, wala tongana ndia amû lege na mo, akamarade ti mo ti ekole na awafango mbeti na mo.
5 Sara tënë nduru: Tour ti Ba Ndo ti 1 décembre 1956 atene: “Na ngoi so e yeke gi ti mû apériodique na azo, ti sara tënë nduru ayeke nzoni mingi. Ye so e ye ayeke ti kangbi apériodique mingi. Fade apériodique ni ‘asara tënë’ na ndo ti ala wani.” Ambeni wafango tënë abâ so ayeke nzoni ti soro tënë ti yâ ti mbeni article na ti sara tënë nduru na ndo ni, na ala fa périodique ni.
6 Tongana e zia apériodique na mbeni zo si e hon, apériodique ni alingbi ti “sara tënë” na ambeni zo nga. Na Irlande mbeni wamandango mbeti na senda-gi adiko Tour ti Ba Ndo ti 1 septembre 1991, so mbeni Témoin ti Jéhovah amû na babâ ti lo. Atënë ti yâ ti article ni azia nzara ti tâ tënë na yâ ti lo. Gi na peko ti so lo diko Tour ti Ba Ndo ni, lo pika singa na ita ni. Hio, ita ni ato nda ti manda Bible na lo. Maseka wali so awara batême na juillet 1993 na kota bungbi ti district “Fango ye ti Nzapa”. E sara kue ti fa apériodique na azo na yanga-da ti ala, na apériodique ni alingbi ti sara tënë na azo. Mbeni surveillant so ayeke gue na ndo nde nde afa mbeni kode so akpengba pëpe, lo tene: “Mû apériodique ni na maboko ti mo.” Tongana tënë so mo yeke tene andu bê ti wamango mo pëpe, peut-être afoto ti ndo ti apériodique ni alingbi ti sara si zo ni amû ni.
7 Duti nduru ti gbian yâ ti akode ti mo: (Bâ 1 aCorinthien 9:19-23). Mo leke ambeni nduru tënë ti tenengo ni. Bata na li ti mo mbeni article so alingbi ti nzere na akoli, nga mbeni so alingbi ti nzere na awali. Ti amaseka, mo lingbi ti fa na ala article: “Les jeunes s’interrogent . . . ” Duti nduru ti gbian nga yâ ti akode ti mo tongana mo yeke fa tënë na apériodique. Na ndo ni, tongana a yeke lango ti kangbingo apériodique, mo lingbi ti bâ so fango tënë na lakui alingbi ti duti mbeni nzoni ngoi ti kangbi apériodique da na da.
8 Zia na gbele mo mbeni wungo ti apériodique ti kangbi ni: Supplément ti Kusala ti Royaume ti mai 1984 na Français, so li ti tënë ni ayeke “Des périodiques qui montrent le chemin de la vie” atene: “E wa awafango tënë, so tongana mbeni ye akanga lege na ala pëpe, ala lingbi ti zia na gbele ala ti kangbi nze na nze wungo ti apériodique 10; apionnier alingbi ti zia na gbele ala ti kangbi ni 90. Tâ tënë, nze oko oko, ambeni wafango tënë a lingbi ti kangbi apériodique mingi ahon so, tongaso zo oko oko wani alingbi ti zia mbeni gbâ ti wungo ni na gbele lo ti kangbi ni. Me, tënë ti seni, sarango ye ti azo ti ambeni territoire wala ndali ti ambeni raison nde, ambeni ita alingbi ti kangbi apériodique mingi pëpe. Ye oko, kusala so mo yeke sara na Jéhovah ayeke biani kota ye mingi (Mat. 13:23; Luc 21:3, 4). Kota ye ni ayeke gi ti zia na gbele e mbeni wungo ti apériodique ti kangbi ni.”
9 E kiri singila mingi so Jéhovah “Nzapa ti tene-biani” azia ngbâa be-ta-zo so ayeke sara ye na ndara nga Bebungbi ti mû na e apériodique so (Ps. 31:6). Tongana Jéhovah aye, apériodique so ayeke ngbâ lakue ti ndu biani bê ti azo, ti fa andia ti lo na ndo ti nzoni sarango ye nga ti fa tâ tënë ti Bible. Ambeti so ayeke ngbâ lakue ti gboto lê ti azo na ndo ti gango tâ tënë ti aprophétie so afa so e yeke na yâ ti ngoi so Royaume ti Nzapa ato nda ti komande awe, na fade a yeke sara ye so bê ti Nzapa aye na ndo ti sese, nga a yeke gboto lê na ndo ti wungo ti atâ wakua ti Jéhovah so ayeke gue na li ni mingi (Mat. 6:10; Apoc. 11:15). So tâ mosoro si a yeke na yâ ti Tour ti Ba Ndo na Réveillez-vous! Zia e gbu angoi kue ti fa na azo ti tâ be-ti-molenge nene ti ambeti ti e so ayeke ndu fini ti azo na so a yä na nduzu atâ tënë ti Royaume ti Nzapa.
[Ahundango tënë ti manda na ye]
1. Tongana nyen ambeti-sango ti e apika bê ti mbeni maseka-wali?
2. Tongana nyen si mo lingbi ti fa singila ti mo ndali ti ambeti-sango ti e?
3. Acongrégation alingbi ti sara nyen ti kangbi apériodique mingi?
4. Tongana nyen ti gi ti hinga na li ambeni tënë ti Tour ti Ba Ndo na ti Réveillez-vous! alingbi ti mû lege na mo ti kangbi apériodique?
5. Na ngoi ti fango apériodique, ti sara tënë nduru ayeke ga na aye ti nzoni wa?
6. Nyen la afa so a yeke nzoni ti zia apériodique na azo na yanga da ti ala?
7. Na ngoi so mo yeke kangbi apériodique, tongana nyen mo lingbi ti duti nduru ti gbian yâ ti akode ti mo?
8. Nyen la mo lingbi ti sara ti kangbi apériodique mingi nze na nze?
9. Ambeti-sango ti e ayeke fa tâ tënë. Tongana nyen si e lingbi ti fa singila ti bê ti e na Jéhovah ndali ni?