Mbeni fini article ndali ti tongo nda ti a-étude

1. Fini article wa ayeke sigigi ande na yâ ti Tour ti Ba Ndo ti fango na tënë? na a leke ni ngbanga ti nyen?

¹ Na tongo nda ti nze ti peko, mbeni fini article ayeke sigigi ande na yâ ti Tour ti Ba Ndo ti fango na tënë ti mû maboko na e ti to nda ti a-étude. Li ti tënë ni ayeke, “Bâ ye so Bible afa.” Kite ayeke dä pëpe so tongana ambeni zo adiko ni ayeke nzere na ala, me a leke a-article so ti sara na lisoro na zo.

2. Ambeni ye wa la ayeke na yâ ti a-article so?

² Aye so ayeke na yâ ni: Ali ti tënë ni nga na akete li ti tënë ni ayeke ahundango tënë so mo yeke hunda na zo ni na ngoi ti lisoro ni. A sû aversê so atënë ni aluti na ndo ni na yâ ti mbeti ni, me a fa atënë ti yâ ni pëpe ti mû lege na zo ni ti diko ni na yâ ti Bible. Aparagraphe ni ayeke nduru tongaso si ala lingbi ti sara lisoro na ndo ni même tongana ala luti lutingo. Ambage oko oko ti article ni agboto lê na ndo ti buku Bible afa si tongana lege ayeke dä ala lingbi ti kiri na étude ni na yâ ni.

3. Na ngoi so e yeke gue da na da, tongana nyen e lingbi ti sara kusala na article so ti to nda ti mbeni étude?

³ Lege ti sara kusala na ni: Na ngoi so mo yeke fa apériodique, mo lingbi ti hunda mbeni tënë so andu bê ti zo na ndo ti tënë so ayeke na yâ ti article ni. Na tapande, na yâ ti Tour ti Ba Ndo ti lango oko ti janvier na Français, article ni ayeke sara tënë na ndo ti nene ti Bible. Mo lingbi ti hunda zo ni: “Mo bâ ti mo Bible tongana Mbeti ti Nzapa wala tongana gi mbeni nzoni senge buku? [Zia zo ni akiri tënë.] Mbi yeke na mbeni pendere tënë na ndo ti tënë so.” Fa na lo kozo hundango tënë ni, diko kozo paragraphe, na diko versê ni na yâ ti Bible. Kiri mo diko hundango tënë ni, na hunda na zo ni ti fa ye so lo pensé na ndo ni. Ala manda wungo ti aparagraphe ni alingbi na ni, na ala sara lisoro na ndo ti ahundango tënë so a zia numéro na tere ni. Kozo ti gue, fa na lo numéro ti hundango tënë ti peko na mä tere na lo ti kiri ti sara lisoro na ndo ni. Sara ngangu yenga oko oko ti kiri ti sara lisoro na ndo ti article ni juska na ngoi so mo lingbi ti mû na lo mbeni fini périodique ni. Mbeni ye so e lingbi ti sara ayeke ti tene na zo ni so e ye ti mû maboko na lo ti manda Bible. Tongaso, sara kua na article ni ti fa na lo tongana nyen a yeke sara étude ni.

4. Na ngoi so e kiri ti sara avizite, tongana nyen e lingbi ti sara kusala na a-article so?

⁴ Mo lingbi nga ti sara kua nzoni na fini article so, tongana mo gue ti bâ azo so mo yeke mû ka na ala apériodique nga tongana mo kiri ti bâ avizite ti mo. Mo lingbi ti tene: “Mbeni fini ye ayeke na yâ ti Tour ti Ba Ndo so. Zia mbi fa na mo tongana nyen ti sara kua na ni.” E sambela ti tene fini article so amû lege na azo mingi ti “si na tâ hingango ye na ndo ti tâ tënë.”​—1 Tim. 2:4.