Sara kusala na ni na alege kue so azi
1. Tract Mo ye ti hinga tâ tënë? ayeke mû maboko na e ti sara nyen?
1 A sigigi na tract Mo ye ti hinga tâ tënë? ti mû maboko na e ti to nda ti a-étude. Me, a yeke nga mbeni nzoni gbakuru ti kua so e lingbi ti sara kua na ni ti lu tâ tënë (Zo-ti. 11:6). Bâ ambeni wango so alingbi ti mû maboko na e ti sara kua na ni nzoni.
2. Tongana nyen e lingbi ti to nda ti lisoro na lege ti tract so?
2 Ti to nda ti lisoro: Mo lingbi ti mû tract ni na zo ni na mo fa na lo ahundango tënë omene so ayeke na ndo ni na mo hunda lo: “Na popo ti ahundango tënë so, ati so wa la mo hunda tere ti mo na ni awe?” Tongana mo mä kiringo tënë ti zo ni awe, ala bâ na yâ ti tract ni akiringo tënë ti Bible na ndo ti oko ti ahundango tënë so lo soro na ala diko mbeni versê oko. Diko wala sara nduru tënë na ndo ti atënë so ayeke na peko ti tract ni, na fa na lo buku Bible afa. Même tongana lo mû buku ni pëpe, lo mû tract ni awe, so alingbi ti zia nzara ti tâ tënë na yâ ti bê ti lo.—Mat. 13:23.
3. Tongana zo ni ayeke na kua mingi, nyen la e lingbi ti sara?
3 Tongana zo ni ayeke na kua mingi: Mo lingbi ti tënë: “Teti so mo yeke na kua mingi, mbi yeke zia na mo tract so. Akota hundango tënë omene so azo ayeke hunda na tere ti ala ayeke na yâ ni nga a fa ye so Bible atene na ndo ti ahundango tënë so oko na oko kue. Ti peko, tongana e wara tere mo lingbi ti fa na mbi tënë ti bê ti mo na ndo ni.”
4. E lingbi ti tene nyen na ndo ti tract ni na ngoi so e yeke fa tënë na ndo ti lege?
4 Na ngoi ti fango tënë na ndo ti lege: Mo lingbi ti tene: “Bara mo. Mo hunda tere ti mo lâ oko awe na mbeni oko ti ahundango tënë so? [Zia zo ni akiri tënë.] Na yâ ti mbeti so, e yeke wara akiringo tënë ti Bible so ayeke polele nga so adë bê.” Tongana zo ni ayeke na ngoi, mo lingbi peut-être ti sara lisoro na lo na ndo ti mbeni kiringo tënë ni oko so ayeke na yâ ti tract ni na même ti fa na lo buku Bible afa.
5. Na ambeni ngoi, tongana nyen e lingbi ti sara kua na tract so na ayanga-da so azo ni ayeke dä pëpe?
5 Tongana zo ayeke na yanga-da ni pëpe: Na ambeni territoire, ambeni wafango tënë ayeke zia ka ambeti na ayanga-da so azo ni ayeke da pëpe na mbeni place so gi azo ti da ni la alingbi ti bâ ni. Tongana a yeke ye so a yeke sara ka na yâ ti congrégation ti mo la, na ambeni ngoi mo lingbi nga ti sara tongaso na tract Mo ye ti hinga tâ tënë? Tongana mo kiri ti bâ zo ni, mo lingbi ti tene: E ga lani ge, e wara zo oko pëpe ni la e zia tract so na gbe ti porte ti ala. Na popo ti ahundango tënë so ti so wa la mo ye ti wara kiringo tënë ni?”
6. Nyen la asara si tract Mo ye ti hinga tâ tënë? ayeke mbeni nzoni gbakuru ti kua ti fango tënë?
6 Tract Mo ye ti hinga tâ tënë? ayeke fa tâ tënë na mbeni lege so akpengba pëpe, so zo agbu nda ni hio. A gbu bê ti azo ti abungbi ti vorongo Nzapa kue nga na azo so ngobo ti sarango ye ti ala ayeke nde nde. Sarango kua na ni ayeke ngangu pëpe; même amaseka na afini wafango tënë kue alingbi ti zia ni na azo. Tongana lege azi na mo ti sara kua na ni, mo yeke sara ni?