‘Kobe na ngoi ni so alingbi’
1 Na peko ti kota bungbi ti lango oko, e yeke tene ka: “A yeke tâ ye so e yeke na bezoin ni la!” Mbeni surveillant ti circonscription atene so na peko ti kota bungbi so e londo ti sara so, ambeni ita ti circonscription ti lo afa nzara so ala yeke na ni ti mû mbage ti ala mingi na fango tënë. Mbeni surveillant ni atene: “A mû maboko na e ti gbu li ti e nzoni na ndo ti ngoi so e yeke dä tongana e yeke kiri ti bâ aye so e soro na yâ ti fini ti e.” Mbeni nde atene: “Gbâ ti awafango tënë atene ti ala so a yeke mbeni dango bê teti ala, ti hinga wala ala yeke zia lê ti ala na ndo ti fango tënë so ayeke tâ kota ye mingi.” Kota bungbi ti lango oko so ahon amû maboko na mo tongana nyen?
2 Kapa ti kota bungbi ti lango oko ti ngu ti kusala so ayeke ga ayeke duti nga tâ ye so e yeke na bezoin ni. Mama-tene ni ayeke “Gue na mbage ti Jéhovah ti bata tere ti mo” so aluti na ndo ti Psaume 118:8, 9. Ambeni tënë so a yeke sara tënë na ndo ni ayeke: “Na lege wa Jéhovah ayeke ndo ti bata tere na ngoi ti aye ti vundu”, “Mû maboko na azo ti bata tere na gbe ti kpangbi ti Jéhovah”, “Ga ndo ti batango tere tongana ti Jéhovah”, “Amaseka, ala zia bê ti ala kue na Jéhovah!” na “Paradis ti e ti yingo: ye so Jéhovah amû ti bata na e.”
3 Tongana nyen ti bâ nzoni na lege ti kapa so: Tongana a fa lango ni awe, leke tere ti mo nzoni ndali ni, nga tisa azo so mo yeke manda Bible na ala ti tene mo na ala ague. Ti “gbu ngangu na ngoi so [e] yeke lë lengo”, a lingbi e bata ye so e mä (Luc 8:15). Tongaso dengi mê nzoni na kapa ni, na mû akete note so abâ akota tënë ni nga na ambeni wango so mo ye ande ti sara ye alingbi na ni na yâ ti fini ti mo nga na fango tënë. Na peko ti kota bungbi ni, mû mbeni ngoi ti sara lisoro na sewa ti mo na ndo ti kapa ni nga bâ ambeni mbilimbili lege so mo na sewa ti mo alingbi ti sara ye alingbi na aye so a fa.
4 Legeoko tongana ti mbeni kobe so a tö ni anzere na asara nzoni na tere ti zo, a leke kota bungbi ti lango oko ti ngu so tâ na ndoye nga a gbu li nzoni la a leke ni. Zia Jéhovah airi tënë nzoni na ndo ti angangu so mo yeke sara ti gue na kota bungbi so na ti bâ nzoni na lege ti kobe so a mû na awafango tënë “na ngoi ni so alingbi”.—Mat. 24:45.
[Ahundango tënë ti manda na ye]
1. Kota bungbi ti lango oko so ahon amû maboko na mo nga na ambeni zo tongana nyen?
2. Atënë wa e yeke mä ande na kapa ti kota bungbi ti lango oko ti ngu ti kusala ti peko?
3. Na lege wa e yeke wara tâ ye ti nzoni na guengo na kota bungbi so?
4. Ngbanga ti nyen a yeke nzoni e ku kota bungbi ti e ti lango oko kungo?