Ye so a leke ndali ti awafango tënë
1 Na ngu 1938, bungbi ti Jéhovah azia mbeni fini ye na sese. A tisa acongrégation ti gue na a-assemblée ti zone, so a iri ni fadeso akota bungbi ti circonscription. Ngbanga ti nyen? Mbeti so a iri ni l’Informateur (so ayeke fadeso Kusala ti Royaume) ti janvier 1939 amû kiringo tënë so: “A-assemblée so ayeke mbeni mbage ti ye so bungbi ti Jéhovah aleke ti fa lege na kusala ti fango tënë ti Royaume. Atënë so a yeke fa kâ ayeke kota ye mingi teti e oko oko si e sara kusala so a mû na e nzoni.” Na ngu 1938 awafango tënë ti Royaume kue ayeke gi lani 58 000. Na ngu 2009 wungo so ague na li ni mingi ahon 7 000 000. Ye so afa polele so akota bungbi ti circonscription ayeke sara kusala ti ala ti mungo maboko na awafango tënë ti “sara kusala so a mû na ala”!
2 Mama-tene ni: E yeke ku kungo kapa ti kota bungbi so ayeke to nda ni na ngu ti kusala so ayeke ga nga na awango so a yeke mû ande. Mama-tene ni ayeke “Ala yeke ti dunia so pëpe” na a gboto ni na Jean 15:19. Ambeni diskur so ayeke mû ande biani maboko na awafango tënë ayeke so wa? Na samedi e yeke mä ande diskur so atene, “Kusala ti ngoi kue abata e: Tongana nyen?” E yeke mä nga ande mbeni diskur na mbage ota so atene, “Zia nyama ti ngonda ni asara ngangu na ndo ti mo pëpe,” “Zia kota wali-ndumba ni asara ngangu na ndo ti mo pëpe,” “Zia awadengo buze so ayeke tambela na nduzu asara ngangu na ndo ti mo pëpe.” Na dimanche e yeke mä ande mbeni diskur na ambage mingi so li ti tënë ni ayeke “Ndoye Jéhovah, me dunia so pëpe.” Ambeni diskur ni ayeke “E ngbâ ti duti ‘tongana awande nga azo so aga ti sara kodoro ti ninga pëpe’” na “Gbu ngangu! Mo lingbi ti hon dunia so na ngangu.”
3 Na peko ti so lo gue na mbeni kota bungbi ti circonscription so a sara ade ti ninga pëpe, mbeni ita-wali so awoko na lege ti fango tënë atene so kapa so amû lege na lo ti kiri ti bâ dutingo ti lo wani na ti mû desizion “ti sigigi na fango tënë na ti zia ti gi araison!” Kite ayeke pëpe so kapa ti kota bungbi ti circonscription ti fini ngu ti kusala so ayeke mû ande maboko na e oko oko kue ti ye Jéhovah ahon ti ye dunia so (1 Jean 2:15-17). Sara kue ti duti dä na ti dengi mê nzoni si mo bâ nzoni mingi na lege ti ye so a leke na ndoye teti awafango tënë!
[Ahundango tënë ti manda na ye]
1. Fini ye wa abâ gigi na ngu 1938? Ndani ayeke nyen?
2. Atënë wa a yeke fa ande na kota bungbi ti circonscription ti e ti fini ngu ti kusala so?
3. Aye ti nzoni wa e lingbi ti wara na guengo na kota bungbi ti circonscription?