Mbi yeke fa tënë mingi?
1. Mbeni Chrétien so ayeke be-ta-zo a lingbi ti gi bê ti lo na ndo ti nyen?
1 Lâ oko mo hunda tere ti mo tongaso awe? Peut-être fango tënë ti mo akiri na peko ngbanga ti so ngu ti mo ague na li ni mingi, mo yeke na kpale ti seni, wala mo yeke na ye mingi ti sara teti sewa ti mo, asara si mo nze. Mbeni ita-wali so ayeke na amolenge ota atene so, na ambeni ngoi lo bâ so lo mû pëpe tâ ye so a lingbi lo mû na Jéhovah, teti ngoi nga na ngangu so lo yeke mû ti bâ na lege ti sewa ti lo asara si lo lingbi ti fa tënë mingi pëpe. Nyen la ayeke mû ande maboko na e ti duti na nzoni bango ndo na ndo ti tënë so?
2. Jéhovah aku nyen na mbage ti e?
2 Ye so Jéhovah aku na mbage ti e: Kite ayeke pëpe so, e kue e ye ti fa tënë mingi. Me kota kangbi ayeke ka lakue na popo ti ye so e ye ti sara na ye so e lingbi biani ti sara. So e ye ti sara mingi afa pëpe so a lingbi awe. A lingbi e girisa pëpe so Jéhovah ahinga akatikati ti e nzoni mingi, na lo yeke hunda na e gi ye so e lingbi ti sara (Ps. 103:13, 14). Nyen la lo ku na mbage ti e? Lo ye si e sara na lo na âme ti e kue, e mû na lo ye ti nzoni kue so e lingbi ti mû.—aCol. 3:23.
3. E lingbi ti hinga ngangu so e yeke sara na fango tënë tongana nyen?
3 Nyen la alingbi ti mû maboko na e ti hinga tâ ye so e lingbi ti sara? E lingbi ti hunda na Jéhovah ti mû maboko na e ti duti na nzoni bango ndo na ndo dutingo ti e (Ps. 26:2). Mbeni zo so nga alingbi ti mû maboko na mo, a lingbi ti duti mbeni kamarade ti mo so ayeke mbeni Chrétien so akpengba na lege ti yingo, so mo zia bê ti mo na lo, so ahinga mo nzoni mingi na so ayeke na mbeto pëpe ti tene na mo so a lingbi mo gbian aye na yâ ti duti ti mo (aProv. 27:9). Nga, girisa pëpe, teti so dutingo ti zo ayeke changé changengo, e yeke wara ye ti nzoni tongana e gi ti bâ dutingo ti e ngoi na ngoi.—aÉph. 5:10.
4. A lingbi e bâ adango bê ti Bible na ndo ti fango tënë tongana nyen?
4 Lege so e yeke bâ na atënë so a tene na e: Na ngoi ti mbeni kpengo loro, azo so ayeke bâ kpengo loro ni ayeke dekongo ka ti pusu azo ni ti sara ngangu. Ndani ayeke ti pusu azo ti kpengo loro ni ti si na ndo so ala yeke gue dä, me pëpe ti sara si ala nze. Legeoko nga, awango na adango bê so aluti na ndo ti Bible, so a mû na e na ngoi ti abungbi nga na yâ ti ambeti ti e ti ‘fa tënë, ti ngbâ na ndo ni’ ayeke teti nzoni ti e na aye ti tene pëpe so na ambeni lege, angangu so e sara ayeke kete (2 Tim. 4:2). Na kite pëpe, a lingbi e hinga so tongana e ngbâ ti sara ngangu ti e kue, fade Jéhovah ayeke girisa pëpe ‘kusala nga na ndoye’ ti e.—aHéb. 6:10.