Kusala so ayeke kota mingi ahon atanga ni
1. Bango kusala ti e na nene ni ayeke pusu e ti sara nyen?
1 Ngbanga ti nyen a hunda na e lakue ti mû ngoi ti e, ngangu ti e nga na aye so e yeke na ni ti fa na tënë? Ngbanga ti so mbeni kusala ti hon ni ayeke pëpe! Tongana e gbu li na ndo ti kota ngangu so kusala so ayeke na ni, fade nzara ti mû mbage ti e na kusala so a yeke kiri ti sara ni pëpe akiri ti kono.—Kus. 20:24.
2. Na lege wa fango tënë ti e asara si iri ti Jéhovah so ayeke kota aga nzoni-kue?
2 A sara si iri ti Jéhovah aga nzoni-kue: Kua ti fango tënë afa so Royaume ti Jéhovah so Jésus ayeke na ndo ni ayeke mû ande place ti angorogbia kue ti azo na ayeke leke akpale ti azo kue (Mat. 6:9, 10). Jéhovah alingbi na gonda teti gi lo oko la alingbi ti zi e na yâ ti siokpari na kuâ (És. 25:8; 33:24). Teti so iri ti lo ayeke na ndo ti e, ambeni zo so ayeke bâ nzoni sarango ye ti e nga na nzara so e yeke na ni na yâ ti kusala ni alingbi ti mû gonda na lo (1 Pi. 2:12). So ngia si e yeke na ni ti fa na azo ti sese kue iri ti Kota Gbia Jéhovah!—Ps. 83:19; Gen. 22:14.
3. Aye ti nzoni wa azo so ayeda na tënë ti Royaume ayeke wara?
3 A sö fini: Jéhovah “[a]ye si zo oko akui pëpe, me lo ye si azo kue achangé bê ti ala.” (2 Pi. 3:9). Me, ka tongana zo ti fa ye na ala ayeke pëpe, tongana nyen si azo alingbi ti hinga ye so Jéhovah abâ ni tongana nzoni wala sioni tambela? (Jonas 4:11; aRom. 10:13-15). Tongana azo ayeda na nzoni tënë, fini ti ala ayeke ga nzoni tongana ala zia asioni sarango ye (Mi. 4:1-4). Na ndo ni, ala yeke na ngia ti duti na beku ti fini ti lakue lakue. Fango tënë na fango ye na azo asö fini ti e na ti azo so amä e (1 Tim. 4:16). So kota kusala ti mungo nengo na zo si e yeke na ni na yâ ti kusala so ahon atanga ni kue!
4. Ngbanga ti nyen a yeke nzoni e dë pëpe na kua ti fango tënë ti Royaume na ti sarango adisciple?
4 Na yâ ti kete ngoi, kota ye ti vundu ayeke ga na futingo na ndo ti dunia so aye ti kirikiri ayeke dä. A yeke si gbagburu tongaso. Azo so amû mbage ti Jéhovah ayeke sö fini ti ala ande. Tongaso, fango tënë na sarango adisciple ayeke kota kusala mingi so a lingbi a sara ni hio, mbeni nzoni kusala so ayeke tambela na ndembe so. Zia kusala so aduti na kozo ndo na yâ ti fini ti e!—Mat. 6:33.