Gi azo so alingbi
1. Tongana nyen e lingbi ti fa so e bâ na nene ni kusala ti e ti fango tënë?
1 Lani na sese ge, Jésus asara kue ti fa na azo ti tâ be-ti-molenge nzoni tënë so ayeke dë bê (És. 61:1, 2). E so e yeke alembe ti Christ nga na awatokua ti lo, e nga kue e yeke na pasa laso ti gi nzoni na yâ ti territoire ti e azo so alingbi nga ti zia lege ni pëpe.—Mat. 10:11; 2 aCor. 5:20.
2. Paul agbian lani yâ ti akode ti lo tongana nyen, nga ye wa asi na pekoni?
2 Gbian yâ ti akode ti mo: Lani bazengele Paul ayeke gue ka kozoni kue na yâ ti asynagogue ti fa tënë na aJuif nga na aprosélyte (Kus. 14:1). Me, na kodoro ti Philippe, lo na Silas ague ti gi azo na ndo so ‘ala bâ ti ala atene mbeni ndo ti sambela ayeke dä.’ Kâ, ala fa tënë na mbeni bungbi ti awali nga mbeni oko na popo ti ala, so iri ti lo ayeke Lydie, ayeda hio na tâ tënë.—Kus. 16:12-15.
3. Nde na fango tënë da na da, e lingbi ti fa tënë na ambeni lege wa?
3 Nde na fango tënë da na da, mo lingbi ti fa tënë na azo na ando ti kungo abus? acar? ataxi? na yâ ti aparc? na ando ti kusala? na alege so azo ayeke hon ka dä mingi nga na ando ti dengo buze? Peut-être na lege ti alettre wala téléphone mo lingbi ti fa tënë na ando so azo ni ayeke gi na yâ ti akota gbagba nga na ando so zo ayeke li ka dä kirikiri pëpe. Ti sara kua na lê ti mo na ti gbian aye alingbi na ni ayeke mû maboko na mo ti duti na “ye mingi ti sara na yâ ti kusala ti Seigneur”.—1 aCor. 15:58.
4. Tongana territoire ti congrégation ti e akono pëpe, ambeni ye wa e lingbi ti sara?
4 Awafango tënë mingi awara lege ti kono yâ ti kusala ti ala na guengo na ambeni congrégation nde na yâ ti kodoro ti ala wani wala na kodoro wande. Ambeni amanda mbeni fini yanga ti kodoro ti fa tënë na ambeni wande so ayeke na yâ ti territoire ti ala.
5. A lingbi e bâ ngoi so e yeke dä laso tongana nyen? A lingbi e gi ti sara nyen?
5 A lingbi e kue e bata na li ti e so “yaka ni ayeke dunia so”. (Mat. 9:37; 13:38). Teti so a ga nduru awe ti futi sioni dunia so, a lingbi e oko oko kue e bâ dutingo ti e nzoni, akode ti e nga na pasa so e yeke na ni ti kono yâ ti kusala ti e. Jéhovah atene so tongana e zia aye ti Royaume na kozo ndo, lo yeke iri ande tënë nzoni na ndo ti ngangu kue so e yeke sara ti kono yâ ti kusala ti e.—Mat. 6:33.