Abungbi ti fango tënë
1. Ngbanga ti nyen a yeke nzoni ti tene a leke yâ ti kusala ti fango tënë?
1 Jésus ayeke mbeni tapande ti zo so aleke yâ ti kusala ti fango tënë ti Royaume nzoni si a lë lengo. Laso nga, ala so ayeke bâ lege ti fango tënë na ndo ti sese kue aye mingi si a sara kusala so na oko lege so. Ni la, a yeke na lege ti abungbi ti fango tënë si acongrégation ti ndo ti sese kue ayeke leke yâ ti agroupe ti ala ti awafango tënë ti Royaume nzoni si a fa tënë.—Mat. 24:45-47; 25:21; Luc 10:1-7.
2. A yeke sara nyen na ngoi ti abungbi ti fango tënë?
2 Mbeni pendere ye so a leke: A leke abungbi ti fango tënë ti mû wango na azo so aga, ti fa na ala ye so a lingbi ala sara tongana ala gue ti fa tënë. A lingbi ti sara lisoro kete na ndo ti brochure Gingo nda ti tënë ti Nzapa lâ oko oko tongana versê ti lango ni so andu fango tënë. Ngoi na ngoi, a lingbi ti sara lisoro na ndo ti ambeni tënë ti yâ ti Kusala ti Royaume, ti buku Comment raisonner wala Ekole ti Kusala ti leke azo kue so aga ndali ti fango tënë na lango ni so. A lingbi ti sara nga nduru démonstration na ndo ti mbeti so a yeke fa na azo. Kozoni si a hunzi na sambela, a lingbi zo oko oko kue ahinga zo so lo na lo ayeke fa tënë nga ndo so ala yeke gue ti fa tënë dä. A lingbi bungbi ni ahon penze-ngbonga 15 pëpe. Nga kete na pekoni, a yeke nzoni azo kue amû lege ti territoire ti ala.
3. Zo wa la ayeke bâ lege ti abungbi ti fango tënë?
3 Lege so a leke na abungbi ni: Surveillant ti kusala la ayeke bâ lege ti abungbi ti fango tënë, na lo si ayeke mû li ni dä. Asurveillant ti groupe, wala aita so ayeke mû maboko na ala, ayeke gue na agroupe ti ala na yâ ti territoire na anda-yenga. Ambeni ancien wala awakua ti mungo maboko alingbi ti gue na agroupe ni na yâ ti territoire ni na yâ ti asenge lango ni. Asurveillant ti agroupe ayeke sara kusala maboko na maboko na surveillant ti kusala ti wara territoire mingi ndali ti agroupe ti ala si ala fa tënë da na da na yâ ti anda-yenga ni. Na yâ ti yenga ni, surveillant ti kusala ayeke bâ si ala so ayeke mû li ni na yâ ti agroupe ti fango tënë ahinga ndo so a lingbi aita ague afa tënë dä.
4-6. (a) So a zia na sese abungbi ti fango tënë, a yeke ti tene a sara nyen na nda ni? (b) Aye wa a lingbi a bâ ni kozoni si a zia na sese abungbi ti fango tënë?
4 Ndo so a yeke nzoni a sara abungbi ni dä nga na ngoi ni: Ahon ti tene congrégation ni kue la si abungbi na ndo oko, mingi ni a yeke nzoni ti tene a sara abungbi so na ambeni ndo so alingbi na ni. A yeke nzoni a duti na ando nde nde ti yâ ti territoire ni, mingi ni na yâ ti ada ti aita, si a fa tënë na yâ ti territoire ni kue nzoni. A lingbi nga ti sara ni na aDa ti Royaume. Mingi ti acongrégation ayeke sara ka bungbi ti fango tënë na yâ ti Da ti Royaume na lango ti dimanche na peko ti bungbi. A lingbi a sara kue si lege ti territoire ni ayo mingi pëpe. Ni la, ngoi na ngoi, a lingbi ti kiri ti bâ wala ando so a soro ndali ti abungbi ti fango tënë angbâ lakue ti mû lege na aita ti fa tënë na yâ ti territoire ni nzoni nga ti hunzi ni kue.
5 A yeke nzoni a bâ territoire ni nzoni ti hinga ngoi wa la alingbi biani ti tene a sara na abungbi ti fango tënë nga fani oke na yâ ti yenga ni wala na yâ ti lango so a soro ndali ni. Ahundango tënë so ge alingbi ti mû maboko ti bâ ndo so a lingbi ti sara abungbi ti fango tënë ni dä nga lawa.
6 Territoire wa a lingbi a fa tënë dä mingi? Ngoi wa la a yeke nzoni ti tene a fa tënë da na da? Na alakui, a lingbi ti fa tënë da na da wala ti sara avizite? A lingbi a zia na tableau ti congrégation atënë kue so andu fango tënë. E awafango tënë ti Royaume, e kue e ye si a fa tënë na yâ ti territoire ti e kue, tongaso si e nga kue e lingbi ti tene oko tënë ti Paul so, lo tene: “Mbi yeke pëpe na mbeni ndo so angbâ senge”.—aRom. 15:23.
7. Ye wa a lingbi ita so a soro lo ti mû li ni na yâ ti bungbi ti fango tënë asara?
7 Lege so a lingbi a mû li ni na ngoi ti abungbi ti fango tënë: Ita so a soro lo ti mû li ni na yâ ti abungbi so, a lingbi lo leke tere ti lo nzoni ndali ni, na tongaso lo fa so lo bâ ni na nene ni. A lingbi a to nda ni na l’heure, a duti mbeni ye so aita alingbi ti manda ye dä nga a yo mingi pëpe (penze-ngbonga 10-15 tongaso). Kozoni na bungbi ni, a lingbi ita so ayeke mû li ni ahinga ando so a lingbi a fa tënë dä. Tongana bungbi ni ahunzi awe, a hunda pëpe ti ku azo so aga na peko, me tongana a zia na mbeti ndo so aita ni ayeke gue ti fa tënë dä, ye so alingbi ti mû maboko. Gi hio na pekoni, a yeke nzoni aita kue amû lege ti territoire ti ala. Tongana a leke yâ ti bungbi ni nzoni si azo amanda ye dä, ye so alingbi ti fa na azo kue so aga ye so a lingbi ala sara ti fa tënë na yâ ti lango ni.—aProv. 11:14.
8. Tongana nyen azo so aga na abungbi ti fango tënë alingbi ti sara kusala maboko na maboko na aita so amû li ni?
8 Guengo na abungbi ti fango tënë: A yeke kota ye ti sara kusala maboko na maboko (aHéb. 13:17). Tongana lege ayeke dä, a yeke nzoni ita so amû li ni abâ wala a lingbi mbeni ita tongaso afa tënë na mbeni ita. A yeke nzoni ti tene aita so ayeke na akode mingi aduti dä ti mû maboko na afini zo wala ala so ayeke na kode mingi pëpe. Na ambeni ngoi, aita so ayeke nduru ti sigigi na aita nde nde alingbi ti wara ye ti nzoni mingi (aProv. 27:17; aRom. 15:1, 2). A yeke nzoni azo kue asara ngangu ti si na l’heure. Tongana e bâ abungbi so na nene ni nga e ne aita ti e, ye so ayeke pusu e ti gbian aye so a hunda ndali ni.—2 aCor. 6:3, 4; aPhil. 2:4.
9. Na ngoi ti abungbi ti fango tënë, apionnier alingbi ti mû maboko na alege wa?
9 Mungo maboko ti apionnier: Mungo maboko ti apionnier na abungbi ti fango tënë ayeke kota ye nga akpengba azo kue. E hinga so apionnier ayeke na aye mingi ti sarango ni. Nde na akua ti ala ti mandango Bible na azo nga na sarango avizite, lâ oko oko ala yeke bâ lege ti asewa ti ala nga ala yeke sara akua ti nginza. Tongaso, zia si apionnier apensé pëpe so a hunda ti tene ala ga na abungbi kue ti fango tënë so congrégation aleke, mbilimbili tongana a yeke sara ni lâ oko oko. Ye oko, ala lingbi peut-être ti ga na ambeni lango ti abungbi ni. E lingbi ti tene so abungbi ti fango tënë ayeke mû maboko ti leke aita nzoni, nga hingango ye so apionnier ayeke na ni na ndo ti Bible nga na akode ti ala na fango tënë alingbi ti mû maboko mingi na atanga ni. So ala yeke fa tënë lakue asara si ala wara akode mingi. Ala lingbi ti kangbi akode so na ambeni zo. Mungo mbage ti ala na nzara ni na fango tënë nga na abungbi ti fango tënë asara si ala yeke mbeni nzoni tapande ti mû pekoni. E kiri singila na ala mingi ndali ni.
10. Ngbanga ti nyen a yeke na lege ni ti tene awafango tënë kue amû mbage ti ala na abungbi so na bê ti ala kue?
10 Tongana ti so Jésus na adisciple ti lo asara lani, laso a yeke sara kota mbage ti kusala ti fango tënë ti Royaume na lege ti fango tënë da na da. A leke abungbi ti fango tënë ti tene e kpengba tere na popo ti e nga si e sara kusala so nzoni. A yeke nzoni awafango tënë kue asara kue ti mû mbage na bungbi so (Kus. 5:42; 20:20). Zia si e kue e sara tongaso na bê ti e kue, na e hinga biani so Jéhovah ayeke iri tufa mingi na ndo ti e. E yeke zia nga ngia na bê ti Mokonzi ti e, Jésus Christ, na ngoi so e yeke fa nzoni tënë ti Royaume ti Nzapa.—Mat. 25:34-40; 28:19, 20.