Mo leke tere ti mo awe ndali ti ekole?
1. Na ngoi so mo kiri na ekole, mo lingbi ti sara nyen kâ?
1 Atâa a yeke kozo guengo ti ala na ekole la wala a ninga awe, ala amaseka, ala yeke kiri ti tingbi na akpale kâ. Me ambeni lege azi nga na ala ti “fa tënë ti témoin na ndo ti tâ tënë.” (Jean 18:37). Mo leke tere ti mo nzoni awe ti fa tënë?
2. Nyen la mo sara ti leke tere ti mo ndali ti ekole?
2 Ti tene aye kue so mo sara na yâ ti gigi ti mo aga nzoni, Jéhovah, babâ na mama ti mo nga na ngbâa be-ta-zo so ayeke sara ye na ndara afa ye na mo (aProv. 1:8; 6:20; 23:23-25; aÉph. 6:1-4; 2 Tim. 3:16, 17). Peut-être mo hinga awe aye so ayeke ku mo na ekole. So mo hinga awe ye so Nzapa ahunda na mo ti sara nga na ye so ayeke ku mo kâ, leke tere ti mo ti fa tënë (aProv. 22:3). Gbu li ti mo na ndo ti atënë nga na anzoni wango so Bible amû so ayeke na yâ ti avolume use ti buku Les jeunes s’interrogent nga na ati so ayeke sigigi lakue na yâ ti a-article ti Réveillez-vous! so ague oko na ni.
3. Na yâ ti aye wa mo lingbi ti fa tënë na ekole?
3 Na ekole kâ mo lingbi ti fa tënë na alege mingi. Tongana amba ti mo abâ nzoni yungo bongo ti mo nga na lekengo tere ti mo pendere, sarango ye ti mo nga na atënë ti yanga ti mo, lege so mo yeke ne na ala nga na awafango mbeti, na même anote ti mo, na nga tongana ala bâ so mo yeke zo so ahinga ye so lo ye na yâ ti gigi ti lo, peut-être ambeni ayeke hunda mo: “Nyen la mo yeke ti mo nde tongaso so?” (Mal. 3:18; Jean 15:19). So lege la azi na mo so ti fa tënë na ala na ti fa aye so asara si mo yeke tongaso (1 Tim. 2:9, 10). Na yâ ti ngu ni kue, peut-être mo yeke tingbi na akpale tongana sarango amatanga ti kodoro wala ambeni matanga nde. Tongana a hunda mo ngbanga ti nyen mo yeke sara ni pëpe, fade mo yeke tene gi atënë so ge? “Na bungbi ti e kâ, e yeke sara ka ni pëpe; mbi yeke Témoin ti Jéhovah.” Wala mo yeke mû lege so azi na mo ti fa tënë na ndo ti Babâ ti mo ti ndoye, Jéhovah? Tongana mo leke tere ti mo nzoni alingbi na awango ti Jéhovah, mo yeke duti ande nduru ti fa tënë na amba ti mo a-élève, na awafango mbeti nga na ambeni zo nde.—1 Pi. 3:15.
4. Ngbanga ti nyen mo gi bê ti mo pëpe so mandango mbeti ti mo ayeke gue ande nzoni na ngu so?
4 Atâa so peut-être mo yeke gi bê ti mo kete na ndo ti guengo na ekole, hinga so azo mingi so aye si mandango mbeti ti mo ague nzoni ayeke nduru ti mû maboko na mo. Nga e yeke na ngia ti bâ so alege la azi na mo so ti fa tënë na ekole. Tongaso, sara mbeto pëpe na leke tere ti mo ndali ti ekole!