Fa ye na lege so akpengba pëpe
1. Mbeni kpengba lege ti fa ye na zo polele nga nzoni ayeke so wa?
1 Mbeni lege ti fa ye na zo nzoni ayeke ti sara ni na mbeni kode so akpengba pëpe. Tongana e gbu li na ndo ti lege so Kota Wafango ye, Jésus, afa ye na ni alingbi ti sara si “kode [ti e] ti fa ye na zo” aga nzoni.—2 Tim. 4:2; Jean 13:13.
2. Fango ye na lege so akpengba pëpe aye ti tene nyen? na ye ti peko ti fango ye tongaso ayeke so wa?
2 Sara tënë na lege so akpengba pëpe: Na yâ ti tënë so Jésus afa na ndo ti hoto, e yeke na ambeni ngangu tâ tënë so lâ oko zo atene pëpe, atâ tënë so a fa pekoni na mbeni lege so akpengba pëpe (Mat., chap. 5-7). Azo mingi mingi so amä giriri Jésus ‘li ti ala akpe ngbanga ti kode ti fango ye ti lo.’ Aturugu so a tokua ala ti gbu lo atene: “Mbeni zo asara tënë tongaso lâ oko pëpe.” (Mat. 7:28, 29; Jean 7:46). E yeke na bezoin ti tene ambupa so akpengba, wala ti mû ayongoro tapande si e ndu bê ti azo nzoni na tâ tënë pëpe. E lingbi ti fa tënë ti Nzapa polele na zo na sarango kusala na atënë so azo kue ahinga ni nzoni.
3. Ngbanga ti nyen ambeni zo aye ti fa ye ahon ndo ni na awamango ala? na tongana nyen ti kpe ni?
3 Hinga wungo ti tënë so mo gue ti fa: Jésus abi bê na awamango lo na bango kozoni wungo ti atënë so lo lingbi ti fa na ala na ngoi ni (Jean 16:12). A lingbi e bâ ndo nzoni na e gbian yâ ti fango ye ti e ti lingbi na dutingo ti azo ni, mbilimbili tongana e fa tënë na asewa ti e, afini zo so aye tâ tënë, wala na amolenge. A yeke nzoni e bata si e fa ye ahon ndo ti ala pëpe même tongana e bâ so ala dengi mê na e nzoni. Fade azo ti nzoni bê angbâ ti manda ti hinga tâ Nzapa, Jéhovah.—Jean 17:3; 1 aCor. 3:6.
4. Ngbanga ti nyen a yeke nzoni ti bâ gi akota tënë ti ye so e manda ahon anzene nzene tënë?
4 Bâ gi akota tënë ni: Jésus ayôro anzene nzene tënë mingi pëpe na yâ ti fango ye ti lo ti tene ye so lo fa aga kirikiri pëpe. Lâ ni so lo tene: “Ala kue so ayeke na yâ ti asende ti kuâ ayeke . . . sigigi”, a yeke pëpe ngoi ti tene lo fa na azo tënë mingi na ndo ti aye use so ayeke ku azo so fade a zingo ala (Jean 5:28, 29). Na ngoi so e yeke manda Bible na mbeni zo, a yeke nzoni e bâ gi akota tënë ni na e kanga nzara ti yôro na yâ ti lisoro ni asenge tënë so andu mandango ye ni pëpe.
5. Ye ti nzoni wa e yeke wara tongana e fa ye na lege so akpengba pëpe?
5 Singila mingi na Jéhovah so afa na e ye kue so e ye ti hinga na mbeni lege so akpengba pëpe! (Mat. 11:25). A lingbi e leke na bê ti e ti fa ye na lege so akpengba pëpe, na e duti na ngia ti sara mbeni kusala so alë mingi.