Leke afini zo ti gbu ngangu na gbele kangango lege
1 Tongana azo ato nda ti manda Bible na ala ‘ye ti tambela na lege ti batango tënë ti Nzapa’, ala ga fadeso ye so Satan ayeke gi ti kinda ni (2 Tim. 3:12). Kengo ndo alingbi ti ga na mbage ti azo so ala sara kusala na ala ndo oko, akamarade ti ekole wala avoizin. A lingbi ti ga ngangu na afini zo mbilimbili tongana afami, na sioni bê pëpe, alondo ti ke ala.—Mat. 10:21; Marc 3:21.
2 A fa giriri tënë ti kengo ndo: A lingbi afini zo ahinga so sarango ngangu ayeke ku ala na ayeke ye so afa so ala yeke atâ disciple ti Christ (Jean 15:20). A lingbi ti si so kengo ndo alondo na azo so ahinga tënë na ndo ti aTémoin ti Jéhovah nzoni pëpe. Zia ala hinga so kota ngia ayeke ga tongana azo asara ye ti kamene na ala teti so ala yeke adisciple ti Jésus na ala mä Nzapa (Kus. 5:27-29, 40, 41). Dë bê ti ala so na ndoye Jéhovah ayeke mû maboko na ala (Ps. 27:10; Marc 10:29, 30). Tongana ala ngbâ be-ta-zo, fade ala mû mbage ti Jéhovah na ndo ti tënë ti zo so ayeke na droit ti komande dunia kue.—aProv. 27:11.
3 Kusala ti tâ hingango ye: Fa na awamandango Bible ti mo nene ti ngbâ ti wara tâ hingango ye atâa akpale wa ala tingbi na ni. Na lege ti kengo ndo, Satan agi ti kanga lege si tënë so ala manda awara ndo ti duti na yâ ti bê ti ala pëpe (aProv. 4:23; Luc 8:13). A lingbi ala ngbâ ti manda ti hinga Tënë ti Nzapa nzoni tongaso si gere ti ala aluti ngangu na yâ ti mabe.—Ps. 1:2, 3; aCol. 2:6, 7.
4 A hunda gbungo ngangu: Tongana mbeni ye ti ngangu asi, gbungo ngangu ayeke kota ye na alingbi ti ga na anzoni ye (Luc 21:16-19). Tongana afini zo agbu ngangu na gbele kangango lege, ala yeke wara ye ti nzoni teti ala mveni nga teti ambeni zo. Ala yeke bâ so Jéhovah ayeke na ngangu ti iri tënë nzoni mingi na ndo ti ala so agbu ngangu.—Jacq. 1:12.
5 Bazengele Paul ayeke na ngia tongana aita ti lo na Thessalonique ague na li ni na lege ti yingo. Lo mû merci na Nzapa teti ala, ala so mingi ni lo mû maboko na ala giriri ti ga na yâ ti tâ tënë (2 aThes. 1:3-5). E nga, e lingbi ti wara oko ngia so tongana e leke awamandango Bible ti e ti luti na gbele kangango lege na ti gbu ngangu.