Mo na sewa ti mo aleke tere ti ala awe ti sö kua?
1 Gango tâ tënë ti aprophétie ti Bible afa polele so hunzingo ti sioni sese so ayeke nduru mingi. E yeke laso na ngoi ti ye ti ngangu so ayeke legeoko na ti so ayeke kozoni na Moa (Mat. 24:37-39). Noé asö kuâ na futingo sese ti giriri ngbanga ti so lo ‘tambela na Nzapa.’ (Gen. 6:9). Noé afa na sewa ti lo ye so Jéhovah ahunda, ndani la ala nga kue asö fini ti ala lani. Na lege wa e lingbi ti mû tapande ti Noé na ti leke sewa ti e ti sö kuâ na futingo ti aye ti sioni ti laso?
2 Wafango tënë ti mbilimbili: Noé agbu ngangu teti angu 40 ti si na 50 tongana “zo ti fa tënë ti mbilimbili.” (2 Pi. 2:5). Wala azo so ayeke nduru na Noé ayeke na gbe ti ngangu ti a-ange so ake yanga na amû tere ti zo wala pëpe, e hinga ye dä pëpe; ye oko, fango tënë ti Noé aga ye ti ngia na lê ti ala. Mingi ni, azo ayeke sara nzara ti tënë ti e pëpe na ala yeke he e, ye so afa biani so aye ti ngoi so aga nduru ti hunzi awe (2 Pi. 3:3, 4). Ye oko, nde na azo ti ngoi ti Noé, azo mingi ayeke yeda na ngangu so e yeke sara ti fa tënë, na ala yeke ‘gue tongana ngu so asua’ ti voro Jéhovah (Es. 2:2). Fade e ‘sö e mveni na ala so amä e’ gi tongana e gbu ngangu (1 Tim. 4:16). Bâ tongana nyen a yeke kota ye teti ababâ na amama ti fa na amolenge ti ala, na lege ti tënë ti yanga ti ala nga na tapande ti ala, nene ti londo hio ti sara kusala ti fango tënë!—2 Tim. 4:2.
3 Lo sara “tongaso”: Songo kûa ti Noé na sewa ti lo aluti gi na ndo ti sarango ye alingbi na aye so Jéhovah afa (Gen. 6:22). A yeke nga kota ye teti e laso ti duti nduru ti “mä tënë” so alondo na Bible nga na ngbâa be-tâ-zo (Jacq. 3:17). Na yâ ti mbeni sewa, amolenge ni so akono awe ada bê ti ala na lege so babâ ti ala asara ye alingbi na awango so alondo na bungbi ti Jéhovah. Na tapande, yenga na yenga lo manda tënë ti Nzapa na sewa ni nga lo gue na ala na fango tënë tongana ti so a hunda. Lo sara kue ti gue na amolenge ni oko na oko na fango tënë yenga na yenga. So lo leke na bê ti lo ti sara “tongaso” asara ngangu mingi na ndo ti amolenge ti lo. Tongana ala ga kota, omene na popo ti ala ayeke fadeso anzoni wakua ti Jéhovah.
4 Hunzingo ti aye ti ngoi so ayeke si ande gi fade fade (Luc 12:40). Na mungo tapande ti Noé nga na dutingo na mabe na yâ salut ti Nzapa, fade e na sewa ti e, e yeke duti biani nduru!—aHéb. 11:7.