Atënë so i hunda

◼ A yeke na lege ni ti tene Témoin ti Jéhovah abâ lege ti kaïngo kobela ti lo na mbeni da-nganga wala mbeni ndo ti batango ambakoro so ayeke ti azo ti nzapa ti sese so?

Ambeni bungbi ti anzapa ayeke na ada-nganga wala ando ti batango ambakoro so ayeke bâ lege ti seni ti azo. Mingi ni, ando tongaso ayeke ti maï akusala ti Kota Babylone pëpe (Apoc. 18:2, 4). A sara peut-être ando ni kozoni kue ti mû lege na abungbi ti anzapa so ti gi na nginza. Laso, ti ambeni da-nganga ni, gi iri ti nzapa ni si ayeke na ndo ni, me ti ambeni, azo ti Eglize ni si ayeke bâ tënë ti mingi ti akusala ni.

Tongana mbeni Témoin ti Jéhovah aye ti bâ lege ti kaïngo kobela ti lo na mbeni da-nganga wala ndo ti batango ambakoro so azo ti nzapa ti sese so ayeke sara kua dä, a yeke na lo ti bâ tënë ni, wala lo yeke gue kâ wala pëpe. Yingo-ti-hinga ti mbeni zo alingbi ti mû lege na lo ti gue, me ti mbeni alingbi ti duti nde (1 Tim. 1:5). Ambeni ye alingbi ti sara ngangu na ndo ti desizion so mbeni zo ayeke mû na ndo ti tënë ni, na a yeke nzoni ti gbu li dä.

Na tapande, mbeni da-nganga wala ndo ti batango ambakoro so azo ti nzapa ti sese so asara kua dä alingbi ti duti gi oko da-nganga so ayeke nduru na ndo so e lango dä. Wala tongana mbeni nde nga ayeke dä so ayeke nduru na e, ti nzoni ni alingbi ti duti gi ti azo ti nzapa ni. Mara ti da-nganga tongaso, so iri ti Eglize ni si ayeke na ndo ni, alingbi ti duti gi oko ndo so aye ti kusala ni ayeke nzoni na ayeke bâ lege ti kobela ti azo nzoni; wala a lingbi ti duti gi oko ndo so wanganga ti mo ayeke sara kua dä. Na mbage, a lingbi ti si so ada-nganga ti anzapa ti sese so alingbi ti yeda na bango ndo ti mbeni Chrétien na ndo ti tënë ti mungo mênë, nde na da-nganga ti mbeni zo wala ti letäa so alingbi ti yeda pëpe. So ayeke ambeni tënë so a lingbi mo bâ ni kozoni si mo hinga mbilimbili da-nganga wa mo lingbi ti gue dä.

Tongana mo ye ti gue ti bâ lege ti seni ti mo na mbeni da-nganga wala ndo ti batango ambakoro so azo ti nzapa ti sese so ayeke sara kua dä, zia mo bâ ni gi tongana kusala so mo yeke futa zo na pekoni. Mo lingbi ti bâ kusala ti azo ti nzapa so tongana mbeni ye so ayeke tongana dengo buze, na ti futa kusala so ala sara na tere ti mo ayeke pëpe mungo nginza ndali ti maïngo kusala ti nzapa ti wataka. A yeke tongana mo futa mbeni kusala so zo asara na mo wala mo vo mbeni ye vongo.

Tâ tënë, na yâ ti aye tongaso, a lingbi mo Chrétien mo zi lê ti mo mbilimbili si mo mû mbage pëpe na kusala ti nzapa ti wataka. Nga, a lingbi mo hinga so azo ayeke iri ka azo ti nzapa so asara kua na yâ ti ada-nganga tongaso na airi tongana “Mûpe” wala “Mamère”, na alingbi mo sara ni pëpe (Mat. 23:9). Bâ ni gi tongana mbeni kusala ti dengo buze so ala yeke sara, so amû lege na mo ti bâ tënë ti seni ti mo, awe.

Tongana a yeke ti gbanzi mo na da-nganga ni, fa so mo yeke Témoin ti Jéhovah na mo ye si a-ancien ti kongregation ti mo aga lakue ti bâ mo. Ye so ayeke mû lege ti hinga so fade mo yeke wara mungo maboko na lege ti yingo na ngoi so mo yeke kâ.​—1 aThes. 5:14.

A yeke nzoni asewa ti mo, a-ancien na ambeni zo ti yâ ti kongregation abâ lege ti nzoni duti ti aita mbakoro na lege ti yingo, ala so alango na ando ti batango ambakoro, mbilimbili ando so ayeke ti azo ti nzapa ti sese so. Bingo bê nzoni na ndo ti tënë so ayeke duti ande kota mungo maboko na aita so aga mbakoro awe, na a yeke sara si a yôro ala pëpe na yâ ti asambela wala ambeni kusala nde so azo ti nzapa ni ayeke sara na ndo ni.

Na batango atënë so na li ti e, fade zo oko oko ayeke bâ aye kue so andu tënë so, na fade lo mveni lo mû desizion ti lo na ndo ti tënë ti guengo ti bâ lege ti seni ti lo na mbeni da-nganga wala ndo ti batango ambakoro so ayeke ti azo ti nzapa ti sese so.​—aGal. 6:5.