Kusala so afa na gigi tâ mabe!
1. Aye ti ngangu wa Jésus asara tënë ni?
1 Abazengele adengi mê lani ti mä Jésus tongana lo yeke sara tënë ti singo ti lo na ti hunzingo ti aye ti fadeso. Lo tene so fade aye ti ngangu ayeke si na ndo ti azo ti sese kue: bira, nzara, yengingo ti sese na akobela ti futi kodoro. Na pekoni, Jésus atene so fade azo ake adisciple ti ni, asara ngangu na ala, na afâ ala. Fade aprophète ti wataka alondo na ala yeke handa azo mingi. Fade ndoye ti azo mingi aga dê.
2. Ngbanga ti nyen a yeke ye ti dongo bê ti bâ so a fa nzo tënë na ndo ti sese kue?
2 Atâa aye ti vundu so kue, bê ti abazengele adö ti mä Jésus tongana lo tene na pekoni so fade a fa nzo tënë ti Royaume ti Nzapa na ndo ti lê sese kue (Mat. 24:3-14). Laso, bê ti e adö ti bâ gango tâ tënë ti kpengba prophétie so. Atâa so e yeke na yâ ti ngoi ti ngangu, aTémoin ti Jéhovah ayeke na nzara mingi ti fa nzo tënë. Même so ndoye ti azo ti sese so adê dengo, ti e angbâ ti za zango. Kamême so e yeke ye ti ke na lê ti “amara kue”, e yeke fa tënë na mingi ti amara kue.
3. Ye wa apika bê ti mo na yâ ti tondo ti kusala so a sara na ndo ti sese kue?
3 A nzere mingi ti kiri ti bâ kusala ti aTémoin ti Jéhovah ti ngu so ahon tongana ti so a fa na lembeti 3-6! A yeke ti ngu 16 ni si ala sara ngbonga ngbundangbu oko na ndo ni ti fa tënë na ti sara adisciple. Kusala so afa na gigi tâ mabe pëpe? Wungo ti apionnier ague na li ni nduru na 6 na ndo ti ala ngbangbo oko; ti awakua ayeke 3 na ndo ti ala ngbangbo oko, na ti a-étude ayeke 4 na ndo ti ala ngbangbo oko. Wungo ti azo so awara batême ayeke 20 na ndo ti ala ngbangbo oko tongana a haka ni na ti ngu so ahon. A pika bê ti bâ so azo nduru na kutu mbasambala ayeke sara na Jéhovah na bê ti ala kue. Ye tongaso ade ti si lâ oko pëpe na yâ ti mbaï ti azo! Tongana mo bâ atableau so, ye wa mbilimbili apika bê ti mo?
4. Akpale wa mbeni koli ahon ndo ni tongana lo yeke gi ti kamata batême?
4 Atâa so awungo so afa na yâ ti atableau so apika bê, zia e hinga so ala yeke fä ti azo so afa kusala ti mabe ti ala na gigi. Ba tapande so. Guillermo akono na sese ti Bolivie. A dü lo na 1935 na lo to nda ti sara kua na yâ ti yaka ti coca na ngoi so lo yeke na ngu gumbaya. Ngbene ye so lo de kete, lo te kugbe ti coca ti tene tere ti lo ayapu na peko ti angungu kua so lo sara. Na pekoni, lo nyon sämba mingi nga na manga. Na ngoi so lo hinga ye so Jéhovah aku na mbage ti lo, Guillermo azia ti nyon manga na ti nyon sämba ahon ndo ni. Kota kpale ni ayeke ti zia tengo kugbe ti coca so lo ninga na yâ ni. Lo sambela lege mingi na lo wara lege ti hon ndo ni. Tongana lo vi peko ti lo na asioni ngobo so kue awe, lo kamata batême. Lo tene: “Fadeso mbi ga nzoni awe na mbi yeke na ngia.”
5. Nzara ti bê ti mo ayeke so wa?
5 Tâ tënë, Jéhovah ayeke bibe na azo. Lo ye si azo kue achangé bê ti ala (2 Pi. 3:9). So ayeke nga ye so bê ti e aye la. Zia si bê ti e apusu e ti sara ye kue so e lingbi ti sara ti ngbâ ti mû maboko na azo so bê ti ala ayeke nzoni ti hinga Jéhovah na ti ndoye lo tongana e.