“I sara si tënë ti yanga ti i ayeke lakue . . . na ingo”
1 “I sara si tënë ti yanga ti i ayeke nzoni lakue, i leke na ingo, si i lingbi hinga lege ti kiri tënë na azo oko oko kue.” (aCol. 4:6). Ti zia ingo na yâ ti tënë ti e aye ti tene ti soro atënë so ayeke nzoni na ti sara tënë ni na mbeni lege so fade anzere na zo so ayeke mä e. A yeke kota ye mingi ti sara tongaso na ngoi so e yeke fa tënë.
2 Tapande ti Jésus: Tongana lo yeke wu tere ti lo na tere ti mbeni dungu, Jésus amû li ni ti sara tënë na mbeni wali ti Samarie so aga ti tö ngu ni. Fani mingi na ngoi ti lisoro ni, wali ni asigigi na ambeni tënë so afa kengo tere so ayeke na popo ti aJuif na azo ti Samarie a ninga awe. Wali ni atene azo ti Samarie ayeke ahale ti Jacob, me aJuif atene ti ala so azo ti Samarie ayeke ahale ti awande. Ahon ti tene Jésus ake tënë ti lo ni, lo sara kue si lisoro ni anzere. Ye so asi na pekoni ayeke so lo wara lege ti fa tënë, na ye so aga na ye ti nzoni na wali ni nga na azo ti gbata ni.—Jean 4:7-15, 39.
3 Na ngoi so e yeke fa tënë, a lingbi e bata ye so na li ti e: ti fa “tene-nzoni ti nzoye”. (aRom. 10:15). E ye ti fa na wamango e apendere tënë so ayeke na yâ ti Bible na so akpengba zo, me pëpe ti fa na lo so e kasa atënë so lo mä na bê dä. Tongana lo fa mbeni bango ndo so ayeke na lege ni pëpe, a yeke nzoni kiringo tënë ti e aluti na ndo ni pëpe. Mbeni ye ayeke na yâ ti tënë ti lo so e lingbi ti yeda na ni wala ti gonda lo ndali ni? E lingbi peut-être ti diko mbeni versê na ti hunda lo: “Mo tara lâ oko awe ti bâ so ye ni alingbi ti duti tongana ti so a fa ge na yâ ti versê so?”
4 Ka tongana zo ni asara ngonzo wala lo ye ti papa na e? A yeke nzoni e ngbâ lakue ti sara ye na nzobe na yâ ti sarango ye ti e nga na sarango tënë ti e (2 Tim. 2:24, 25). Tongana tokua ti Royaume ni anzere na zo ni pëpe, na kode e lingbi ti zia lo.—Mat. 7:6; 10:11-14.
5 Aye ti nzoni so aga na pekoni: Mbeni lâ, mbeni ita-wali atara ti fa tënë na mbeni wali so alango nduru na lo, me na ngonzo wali ni ato nda ti sara asioni tënë na lo. Na nzobe, ita ti e so atene na lo: “Pardon, mbi ye fade ti so bê ti mo pëpe. Mo ngbâ nzoni.” Yenga use na pekoni, wali ni ague apika yanga-da ti ita ni, lo hunda pardon ndali ti ye so lo sara na lo tene so lo yeke nduru ti mä tënë so ita ni aye lani ti tene na lo. Mingi ni, ti kiri tënë na nzobe ayeke ga na aye ti nzoni!—aProv. 15:1; 25:15.
6 Zia e gi ti zia ingo na yâ ti tënë ti e tongana e yeke fa tënë. Atâa zo ni amä e pëpe, mbeni lâ lo lingbi ti mä aTémoin ti Jéhovah so aga na ndo ti lo.
[Ahundango tënë ti manda na ye]
1. Ti ‘leke tënë ti yanga ti e na ingo’ aye ti tene nyen?
2. Tongana nyen Jésus awara lege ti fa tënë na mbeni wali ti Samarie?
3. Tongana nyen e lingbi ti mû tapande ti Jésus na ngoi so e yeke fa tënë?
4. Ye wa ayeke nzoni ti sara tongana zo ni asara ngonzo?
5. Tongana nyen mbeni ita-wali awara ye ti nzoni na peko ti so lo kiri tënë na nzobe?
6. Ngbanga ti nyen a yeke kota ye ti zia ingo na yâ ti tënë ti e na ngoi so e yeke fa tënë?