Dango bê teti Kota Bungbi ti District
◼ Angbonga ni: Na yâ ti alango ota ni kue, kapa ni ayeke to nda ni na 7:50 ti ndapre. Na ngoi so mozoko ti Royaume ayeke to nda ni, a yeke nzoni e kue e duti tongaso kapa ni alingbi ti to nda ni na lege so ayeke nzoni. Kapa ni ayeke hunzi na 15:05 na lango ti vendredi na samedi. Ti dimanche, a yeke hunzi na 14:10.
◼ Ndo ti lutingo ti akutukutu: Na ndo ti akota bungbi kue so a yeke bata ndo ti ziango kutukutu dä, zo alingbi ti zia kutukutu ti lo kâ senge, na a yeke fa place ti ziango ni alingbi na molongo ti gango ti akutukutu ni oko na oko. Badge ti kota bungbi ni si ayeke zi lege na kutukutu kue ti lï. Teti so mingi ni ndo ti lutingo ti akutukutu ayeke mingi pëpe, a yeke nzoni aita amä tere ti mû kutukutu oko. A yeke nzoni e sara kusala maboko na maboko na aita so abâ lege ti ndo ti lutingo ti akutukutu si ndao asi pëpe.
◼ Ndo ti duti: A yeke nzoni ti bata ndo ti duti gi teti azo so mo na ala aga legeoko na kutukutu wala so mo na ala alango da oko.
◼ Kobe ti bekombite: A yeke nzoni mo ga na kobe ti te ahon ti zia ndo ti kota bungbi ni na ngoi ti wungo tere ti gue ti gi kobe na mbeni ndo nde. Mo lingbi ti ga na mbeni kete ye ti batango kobe so mo lingbi ti zia na gbe ti ye ti duti. A yeda pëpe ti tene zo aga na sämba, asakpa so akono mingi nga na averre na ando so a yeke sara kota bungbi dä.
◼ A-offrande: A mû nginza mingi ti futa na aye so a leke teti kota bungbi. E lingbi ti fa bê ti kiri singila ti e teti aye so a leke na ziango na bê kue a-offrande na yâ ti asanduku so ayeke na Da ti Royaume ti e wala so ayeke na ando nde nde ti kota bungbi ti ni. A yeke nzoni a zia iri ti bungbi ti e so ndia ahinga ni na yâ kodoro so e yeke dä na ndo chèque wala mbeti ti nginza kue so e ye ti zia na yâ sanduku. Na tapande, na Centrafrique, a lingbi ti sara mbeti ti nginza ni na iri ti Association “Les Témoins de Jéhovah”. Bâ aita so ayeke bâ lege ti nzoni tambelango ti kota bungbi so ti wara ambeni sango na ndo ni.
◼ Andao na akpale so ahunda ti mû yorö hio: Tongana tere ti mbeni zo aso hio tongaso na ngoi ti kota bungbi ni, sara tënë ni na mbeni ita ti ndokua ti yambango azo so ayeke nduru na mo. Fade ita ni ayeke gue hio ti sara tënë ni na ndokua ti mungo yorö. Aita ti ndokua ni ayeke bâ wala kobela ni ayeke ngangu wala pëpe, na ala yeke mû maboko so alingbi. A yeke nzoni azo so ayeke na kpale ti seni agirisa pëpe ti ga na ayorö ti ala na kota bungbi ni.
◼ Amasini: A lingbi mbeni zo azia ye tongana masini ti mungo go wala ti mungo limon ti lo na ndo akamba ti kuran ti ndo ti kota bungbi ni pëpe, nga a lingbi lo kanga lê ti azo pëpe wala lo gboto lê ti ala pëpe.
◼ Yombo: A yeke sara ambeni kota bungbi na ando so gbagba ayeke na tere ni kue na a lingbi aga na pupu na lege ti amasini. Tongaso, a yeke nzoni nzobe apusu e ti pete angangu yombo mingi pëpe, si aga na kpale na ambeni zo so ayeke na kpale ti wungo pupu wala so aye fion ti yombo pëpe.—1 aCor. 10:24.
◼ Kete mbeti Veuillez suivre l’intérêt (S-43): A lingbi ti sara kusala na kete mbeti so ti mû asango na ndo ti mbeni zo so asara nzara ti tënë ni na peko ti so a fa na lo tënë na ngoi ti kota bungbi ni. A lingbi awafango tënë aga na mbeti ni oko wala use na ngoi ti kota bungbi ni. A lingbi nga ti wara mbeti so na Ndokua ti ambeti. Tongana mo sû ye na lê ti mbeti so awe, mo lingbi ti zia ni na oko ndokua so wala mo lingbi ti mû ni na secrétaire ti kongregation ti mo tongana mo kiri na kongregation ti mo.—Bâ Kusala ti Royaume ti février 2005, lembeti 8.
◼ Téléphone ti maboko: A lingbi abata si atéléphone ti maboko na ambeni ye tongaso agboto lê ti azo pëpe.
◼ Mungo foto: Tongana mo ye ti mû foto, sara kusala na wâ ni pëpe.
◼ Ahôtel: (1) Bata gi wungo ti achambre so mo ye, na mû azo mingi pëpe ahon ti so hôtel ni afa teti chambre oko oko. (2) Tongana mo ye ti tene hôtel ni abata na mo ndo ti lango mbeni pëpe, sara tënë ni na ala hio. (3) Mû puse ti yongo na akungba gi tongana mo yeke nduru ti sara kua na ni, na kiri na ni hio ti tene ambeni zo nga asara na kua. (4) Tö kobe na yâ ti chambre pëpe tongana a yeda pëpe. (5) Tongana lege ayeke dä, zia lakue mbeni kete matabisi teti zo ti kua ti chambre ni. (6) Teti e yeke aChrétien, a lingbi e sara ye na lege ni na aye so a hunda ti te gi na hôtel (aye tongana dutëe, café wala a-glason). (7) Fa na gigi na ngoi kue lengo ti yingo vulu ti Nzapa na mbage ti awakua ti hôtel ni kue. (8) Ngere ti achambre so a zia na yâ molongo ti ahôtel so a fa ayeke ngere ti lango oko oko, taxe ayeke na ndo ni pëpe. Tongana ala hunda na mo ti futa mbeni ye nde so mo hunda pëpe wala mo sara, ke ti futa ni na gi ti sara tënë ni hio na ndokua ti kota bungbi ni so abâ tënë ti ando ti lango. (9) Tongana mo wara kpale na chambre ti hôtel ni, ku pëpe ti sara tënë ni na ndokua ti ndo ti lango ti kota bungbi ni tongana mo si kâ.
◼ Ambeni ndo ti lango: Na ando kue so mo lango dä, fa sarango ye ti aChrétien na mbage ti azo kue so ayeke na ndo ni so. Tongana mo lango na da ti mbeni zo, mû mbage na akua ti da ni nga futa ambeni ye. Kozo ti tene mo kiri na ndo ti mo, gi ti bâ wala ndo ti lango so a mû na mo angbâ nzoni.