Mo yeke na territoire ti mo mveni?

1. Territoire ti mo mveni ayeke nyen?

¹ Territoire ti mo mveni ayeke territoire so a mû na mo. A lingbi ti duti mbeni ndo so mo lingbi ti si dä hio, so mo lingbi ti fa tënë dä mo oko wala na mbeni mba ti mo wafango tënë. Atâa so a yeke nzoni ti mû maboko na aye so kongregation aleke teti fango tënë na groupe tongana lege ayeke dä, ti duti na territoire ti mo mveni ti sara kua dä na ambeni ngoi nde alingbi ti mû lege na mo ti fa tënë nzoni, mbilimbili na yâ ti akongregation so ayeke na aterritoire mingi.​—Kus. 10:42.

2. Ambeni ye ti nzoni wa zo ayeke wara tongana lo yeke na territoire ti lo mveni?

² Aye ti nzoni ni: Ambeni ita awara aye ti nzoni mingi tongana ala fa tënë na yâ ti territoire ti ala mveni so ayeke nduru na ndo ti kusala ti ala na ngoi ti wungo tere wala fade fade na peko ti so ala hunzi kusala. A nzere na ambeni ti fa tënë na sewa na yâ avaka so ayeke nduru na ala teti ngbonga oko tongaso kozoni si ala gue na Mandango Buku ti Kongregation. Ye ti pekoni ayeke so, afini vizite na a-étude so ala wara ayo na ala pëpe, ye so asara si ala tambela mingi pëpe, a mû ngoi ti ala mingi pëpe nga ala futa nginza mingi pëpe. Teti so e lingbi ti sara kusala mingi na yâ ti kete ngoi, dutingo na territoire ti e mveni alingbi ti mû maboko na e ti mû kusala ti pionnier auxiliaire ngoi na ngoi, wala même ti ga pionnier permanent. Na ndo ni, ti fa tënë na yâ territoire ti e mveni na ti hinga tere na azo ti yâ ti territoire ni alingbi ti pusu azo ni ti zia bê ti ala na e na ti leke si afango ye ti e alingbi na dutingo ti ala, tongaso fango tënë ti e aga nzoni.

3. Ye wa asi na mbeni pionnier so ayeke na territoire ti lo mveni?

³ Mbeni ita-wali pionnier so surveillant ti circonscription awa lo ti duti na territoire ti lo mveni atene: “Mbi yeda na wango so na kete na pekoni mbi na azo ti territoire ti mbi e hinga tere nzoni. Mbi gbian angoi ti sarango avizite ti mbi ti lingbi na dutingo ti ala. Ye ti pekoni ayeke so, wungo ti afini vizite ti mbi alondo na 35 asi na 80 na yâ ti nze oko, na mbi wara a-étude mbasambala.”

4. Tongana nyen mo lingbi ti wara territoire ti mo mveni na ti sara kusala dä?

⁴ Lege ti wara ni: Tongana mo ye ti wara territoire ti mo mveni, sara tënë ni na ita so ayeke bâ lege ti territoire. Mo lingbi ti tisa mbeni wafango tënë ti sara kusala na tere ti mo, na ti sû na mbeti ada so mo wara azo ni pëpe. A lingbi mo tara ti hunzi territoire ni na yâ ti nze osio. Tongana mo lingbi ti sara ni pëpe, mo lingbi ti hunda na surveillant ti Mandango Buku ti Kongregation wala ambeni ita ti mû maboko na mo. Tongana na nda ti nze osio ni mo hunzi territoire ni awe, mo lingbi ti kiri na ni wala ti hunda ti kiri ti sara kusala dä. Ye oko, a yeke nzoni mo bata gi oko territoire so biaku biaku pëpe, me kiri na ni tongaso si ambeni zo alingbi ti hunda ti sara kusala dä. Tongana mo yeke na yâ ti mbeni kongregation so ayeke na territoire mingi pëpe na a yeke ngangu na mo ti wara ti mo mveni, peut-être mo lingbi ti hunda na surveillant ti Mandango Buku ti mo ti sara kusala na mbeni mbage ti territoire so a mû na ala.

5. Ti sara kusala ti e ti fango tënë, ye wa a hunda na e ti sara?

⁵ Kusala so a mû na e ti fa tënë “na sese so kue” ayeke kete kusala pëpe (Mat. 24:14). A hunda ti sara kusala maboko na maboko. Nde na fango tënë na groupe, ti fa tënë na yâ territoire ti e mveni alingbi ti mû lege na e ti fa nzo tënë na azo mingi tongana lege azi na e.