Buku Bible afa: Kozo buku so e yeke mû ti manda na Bible na azo

¹ A mû na e ngia mingi tongana a sigigi na fini buku Bible afa nyen biani? na Kota Bungbi ti District “E mä yanga ti Nzapa”. Na hunzingo ti kapa ti samedi, azo so aga ayeke lani na ngia ti wara buku ti ala mveni. E yeke sara ande kusala na fini gbakuru ti fango na ye so tongana nyen? A sigigi na ni ti tene a ga kozo buku so e yeke mû ti manda na Bible na azo. Atâa so e yeke fa fini buku so ti kozoni na mars na fango tënë, a wa awafango tënë kue ti ku pëpe ti to nda ti a-étude na ti ngbâ ti sara ni na yâ ti fini buku so.

² A-étude so e ngbâ ti sara: A yeke nzoni awafango tënë so ayeke sara a-étude na yâ ti buku Hingango ye wala brochure Ahunda asara ye na ndara ti bâ tongana nyen nga lawa si ala lingbi ti to nda ti sara kusala na fini buku so na ngoi ti étude ni. Tongana mo to nda ti mbeni étude ade ti ninga mingi pëpe, mo lingbi ti kiri na zo ni na yâ ti fini buku so na kozo chapitre ni. Tongana mo sara étude ni ague ayo awe na yâ ti buku Hingango ye, mo lingbi peut-être ti kiri na zo ni na yâ ti fini buku so na chapitre so asara tënë na ndo ti oko tënë so ala ye ti bâ na yâ ti ngbene buku ni. Ka tongana mo ga nduru ti hunzi étude ni na yâ ti buku Hingango ye awe, mo lingbi ti ngbâ ti sara ni juska mo hunzi buku ni.

³ Kite ayeke dä pëpe so e kue e hinga azo mingi so alingbi ti wara aye ti nzoni na lege ti mandango buku Bible afa. Mo lingbi ti tisa azo oko oko kue ti manda Bible na yâ fini buku so afa ye so Bible afa biani na mbeni lege so asara si hingango ye ti zo ayeke gue lakue na li ni. Na tapande, azo so amanda brochure Ahunda wala buku Hingango ye me ala gue na li ni pëpe ti mû tere ti ala na Jéhovah na ti wara batême alingbi peut-être ti yeda ti kiri ti manda Bible na yâ ti fini buku so. Ababâ na mama alingbi ti sara kusala na fini buku so ti fa tâ hingango ye na ndo ye so bê ti Nzapa aye na amolenge ti ala.​—aCol. 1:9, 10.

⁴ Manda mbeni use buku: A leke mbeni ye ti tene azo so ahunzi ti manda buku Bible afa nyen biani? amanda mbeni use buku? Ën. Tongana a yeke polele so wamandango ye ni ayeke gue na li ni, atâa gi yeke yeke, na lo fa bê ti kiri singila ndali ti aye so lo yeke manda, mo lingbi ti ngbâ ti manda Bible na lo na yâ ti buku Voro oko tâ Nzapa. E hinga na bê ti e kue so fade e yeke sara kusala nzoni mingi na buku Bible afa na ngoi so e yeke sara ye alingbi na yanga so a mû na e ti sara adisciple.​—Mat. 28:19, 20.