Sala kue si azo mingi amä tënë ni
1. Ye wa akozo Chrétien asala kusala na ni lani ti fa nzo tënë na azo mingi?
1 Akozo disciple ti Jésus asala ngangu kue ti kangbi nzo tënë ti Royaume. Ala sala kusala na anzoni gbakuru ti sala si azo mingi amä nzo tënë. A-Chrétien so asû lani Bible asala ni lani na yanga ti Grec so asenge zo kue ayeke tene ni. Yanga ti Grec ni so ayeke lani yanga ti kodoro so amû ndo kue na kodoro-togbia ti Rome. Nga, a londo na ngu 100 ti si na ngu 300 ti ngoi ti e, awafango tënë so ayeke na wâ ayeke lani akozo zo so asala kusala na Tënë ti Nzapa so a sû ni na ndo akugbe-mbeti so a fü tele ni tongana ti abuku ti laso. A yeke ngangu pëpe ti sala kua na ala tongana a haka ni na Tënë ti Nzapa so a sû ni na ndo akugbe-mbeti so a yeke rule ni rulengo.
2, 3. (a) Na lege wa Esaïe 60:16 aga tâ tënë na ngoi ti e laso? (b) Na lege wa a yeke sala kusala na aye ti senda-kode ti maï na vorongo so ayeke na sioni oko pëpe?
2 A mû aye ti senda-kode: Jéhovah atene giriri na lege ti prophète Esaïe, lo tene: “Fade mo nyon dulait ti amara.” (Es. 60:16). Laso, na gango tâ tënë ti prophétie so, awakua ti Jéhovah ayeke sala kusala na afini ye ti senda-kode ti maï na kusala ti fango tënë. Na tapande, na ngu 1914, kozoni ti tene alimon so a yeke mä go ti azo ti yâ ni asigigi na lê ti gala, awamandango Bible ato nda ti fa kozoni awe na azo mbeni limon so a yeke mä go ti azo ti yâ ni; iri ni ayeke “Photo-Drame de la Création.” Limon ni so ayeke ninga ngbonga miombe, afoto ti yâ ni ayeke pendere mingi nga a sala ni na apendere nzoroko. Limon so afa lani mbeni kpengba tënë ti témoin na azo kutu mingi.
3 Laso, ti sigigi na aBible nga na ambeti ti Nzapa, azo ti Nzapa ayeke sala kusala na a-ordinateur nga na amasini so ayeke pete gbâ ti ambeti gi na yâ ti kete ngoi na ayanga ti kodoro ngbangbo mingi. Ala yeke sala kusala na alapara, atrain, abateau nga na akota kutukutu ti tokua na ambeti ti Nzapa na yâ ti akodoro so ayo. Na salango tongaso, azo na yâ ti akodoro 235 amä nzo tënë. Na lege ti yingo ti lo, Jéhovah apusu awakua ti lo ti sala kusala nzoni na agbakuru ti senda-kode so ti sala si azo mingi amä tâ tënë ti Bible ahon ti kozo.
4. Ti wara lege ti fa nzo tënë na azo mingi, aye wa ambeni zo agbian na yâ fini ti ala?
4 Ala gbian aye na yâ fini ti ala: Bê ti atâ wavorongo Nzapa ayeke pusu ala ti gbian aye na yâ fini ti ala tongaso si ala wara lege ti fa nzo tënë na azo mingi. Ti wara lege ti bi tele ti ala mingi na yâ kusala ti fango tënë, gbâ ti ala azi ambeni ye so ayeke ne ala gi senge senge na yâ fini ti ala. Ambeni azia ndo ti ala ti gue na ambeni ndo so bezoin ti awafango tënë ayeke dä mingi. Ambeni nde akono yâ ti kusala ti ala na mandango mbeni yanga ti kodoro nde.
5, 6. Mo lingbi ti sala nyen si azo mingi so ayeke na yâ territoire ti mo amä nzo tënë?
5 E lingbi nga ti sala kue si azo mingi amä nzo tënë tongana e yeke sala kusala ni na angoi so azo ayeke na yanga-da ti ala nga tongana e yeke gue na ando so e lingbi ti wara azo dä. Na yâ ti territoire ti mo tongana mo yeke wara azo lakue pëpe na yanga-da ti ala, mo lingbi ti leke ngoi ti fa tënë na lakui, ni la pëpe? Ambeni ndo ayeke dä so azo ayeke gue dä mingi, na so mo lingbi ti gue kâ ti fa tënë? Mo tara ti fa tënë na lege ti téléphone awe? Mo tara awe fango tënë na ando ti dengo buze nga na yâ ti abiröo? Mo yeke gi alege kue ti fa tënë?
6 Laso a yeke fa iri ti Jéhovah nga na Royaume ti lo na ndo kue. So tâ pendere matabisi si e yeke na ni ti mû mbage ti e dä nga! Zia e ngbâ lakue ti sala si azo mingi amä tâ tënë so ayeke mû fini na ala, tâ tënë so alondo na yâ Mbeti ti Nzapa.—Mat. 28:19, 20.