Kuda so a lingbi e kiri ni na azo
1 Bazengele Paul abâ lani so lo yeke na kungba ti fa tënë na azo. Lo hinga lani so Jéhovah asala ti tene azo nde nde kue asö kuâ na lege ti mênë ti ngele ngangu ti Molenge ti lo (1 Tim. 2:3-6). Ndani la Paul atene lani: “Mbi yeke wakuda ti aGrec na ti azo ti ngonda, ti awandara na ti azo so ahinga ye pëpe.” Na wâ lo woko pëpe ti sala kusala ti fango tënë ngangu ti zi kuda ti azo na li ti lo.—aRom. 1:14, 15.
2 Na tapande ti Paul, laso aChrétien ayeke gi alege kue ti fa tënë na azo so ayeke ndulu na ala. Teti so “kota ye ti vundu” ayeke ndulu mingi ti si, a lingbi e gi azo ti bê ti mbilimbili hio. Zia tâ ndoye so e yeke na ni teti azo apusu e ti sala kusala so ayeke sö fini ti ala.—Mat. 24:21; Ezéch. 33:8.
3 Lege ti zi kuda ni na li ti e: Tâ nzoni lege ti wara azo ti fa tënë na ala ayeke ti gue da na da. Tongana a yeke ngangu na e ti wara azo na yanga-da ti ala, zia e sû adresse ti ala nzoni na ndo mbeni mbeti na e kiri na ambeni ngoi nde so e lingbi ti wara lege ti tingbi na ala (1 aCor. 10:33). E lingbi nga ti wara azo ti fa tënë na ala na ando ti dengo buze nga na yâ ti abiröo, na ndo ti alege, na ando so azo aye ti duti dä mingi, ando ti lutingo ti akutukutu nga na lege ti fango tënë na téléphone. E lingbi ti hunda tele ti e mveni: ‘Mbi yeke sala kue ti mû alege kue so azi na mbi ti fa na azo tënë so amû fini?’—Mat. 10:11.
4 Mbeni ita-wali pionnier abâ lani so lo yeke na kota kungba ti tingbi na azo kue so ayeke na yâ territoire ti lo. Na mbeni da, lo bâ so lakue afenêtre ni ayeke gi na kangango ni. Mbeni lâ, pionnier ni ayeke na fango tënë pëpe. Me lo bâ mbeni kutukutu aluti na yanga ti da so lakue lo yeke bâ afenêtre ni gi na kangango ni so. Lo ye pëpe ti zia si lege so azi na lo ahon gi tongaso, ni la lo pika yanga-da ni. Mbeni koli asigigi, na ita-wali ni ato nda ti mbeni lisoro na lo. Lisoro ni amû lege na ita pionnier ni na koli ti lo ti kiri ti sala avizite fani mingi na koli ni so. Na nda ni, koli ni ayeda ti manda Bible, na fadeso lo wara batême awe. Lo kiri singila mingi so ita-wali ni abâ lani so lo mveni lo yeke na kuda na li ti lo, kuda ti fango tënë na azo kue.
5 Teti so ngoi ni ayeke gue ndulu mingi ti si na nda ni, fadeso a yeke ngoi ti zi kuda so e yeke na ni na li ti e. Tongaso, zia e fa tënë na ngangu ti e kue.—2 aCor. 6:1, 2.