Mbeti-kapa ti sewa: Abungbi ti kongregation
1 Tongana mo yeke mbeni babâ wala mama so ayeke Chrétien, mo ye ti tene amolenge ti mo akono aga abiazo so andoye Jéhovah na ala sala na lo; nga ti tene na nda ni ala wara fini ti lakue lakue na yâ fini sese so Nzapa amû lani zendo ni. Na lege wa mo lingbi ti mû maboko na amolenge ti mo ti zia vorongo ti Jéhovah na kozo ndo na yâ fini ti ala? Tapande ti mo mveni ayeke kpengba lege ti sala ni (aProv. 20:7). Na dango bê na tapande ti mama ti lo so ayeke Chrétien, mbeni ita-wali atene: “E hunda tele ti e lâ oko pëpe so wala e yeke gue na bungbi laso wala e yeke gue pëpe.” Ye so agirisa lo oko pëpe.
2 Asewa ti mo ahinga ngbanga ti nyen ala yeke gue na abungbi ti kongregation? Afango ye so e yeke wara ni na ngoi ti abungbi so ayeke mû ngangu na e ti ngbâ ti sala ye so bê ti Nzapa aye nga ti duti legeoko na aita ti e. A yeke mbeni pendere lingu ti kpengbango zo so mara ni ayeke pëpe (Es. 54:13; aRom. 1:11, 12). Ye oko, kozo nda ti guengo na abungbi so ayeke ti sepela Jéhovah na “yâ bungbi ti azo.” (Ps. 26:12). Abungbi ti aChrétien ayeke mû lege na e ti fa na gigi ndoye ti e teti Jéhovah na ti voro lo.
3 ‘Sala hange’: Bango na nene ni nda ti guengo na abungbi ti e so ayeke ti nzoni-kue ayeke pusu e ti ‘sala hange’ si yeke yeke e maï pëpe sioni ngobo ti mankengo abungbi ndali ti ambeni kete kete ye (aEph. 5:15, 16, Fini Mbuki, 2001; aHéb. 10:24, 25). Na ngoi so mo yeke leke mbeti-kapa ti sewa ti mo, mo lingbi ti sû na ndo ni kozoni angoi ti abungbi ti kongregation. Na pekoni, sala kue si a zia pëpe lege na ambeni kusala ti mû place ni. Bâ mbilimbili si guengo na abungbi aga na kozo ndo na yâ sewa ni.
4 A nzere na e tongana e diko so aita ti e ayeke hon ndo ti angangu kpale ti gue na abungbi nga na assemblée, ni la pëpe? Ti mo peut-être a yeke ngangu tongaso pëpe, me kite ayeke pëpe so mo yeke na gbele ambeni kpale. Satan ayeke sala si akpale ayeke gue na li ni ti kanga lege na azo ti voro Jéhovah. Ye oko, hinga biani so amolenge ti mo ayeke bâ nzoni mingi angangu so mo yeke sala ti tene sewa ti mo ague na abungbi ti kongregation. Biani, na salango tongaso, mo lingbi ti mû na ala mbeni matabisi na lege ti yingo, ye so ala yeke girisa ni ande lâ oko pëpe.