Tongana nyen ti fa tënë na ando ti dengo buze
1. Ambeni ye ti nzoni wa e lingbi ti wara na fango tënë na ando ti dengo buze?
1 Mo ye ti fa tënë na mbeni ndo so a yeke ngangu pëpe ti wara azo, na mingi ti ala ni ayeke yamba agene nzoni? Mo lingbi peut-être ti sala ni na yâ territoire ti kongregation ti mo. Tongana nyen? Na lege ti fango tënë na yâ ti amagazin so ayeke dä. Awafango tënë so ayeke fa tënë lakue na yâ ti amagazin ayeke wara aye ti nzoni na pekoni.
2. Tongana nyen a lingbi ti leke fango tënë na ando ti dengo buze?
2 Ambeni kongregation ayeke na ando ti dengo buze na yâ territoire ti ala. A lingbi ita so ayeke bâ lege ti aterritoire azia nde ando so azo mingi ayeke dë buze dä. Me ti ando ti dengo buze so ayeke na popo ti ada ti lango, a lingbi a fa ni polele na lê ti carte ti territoire ti tene a fa tënë dä pëpe tongana a yeke sala territoire ni. Na yâ ti ambeni territoire, a lingbi ti fa tënë na ando ti dengo buze legeoko na ada ti lango ni. Tongana ade mo sala ni lâ oko pëpe, ti to nda ni, tara ti fa tënë na akete magazin.
3. Na ngoi so e yeke fa tënë gi na yâ ti amagazin, ye wa ayeke mû maboko na e ti wara lengo ni?
3 Na kode so akpengba pëpe: Na ngoi ti fango tënë gi na yâ ti amagazin, a yeke nzoni mingi ti yü bongo tongana ti angoi ti bungbi na Da ti Royaume. A yeke nga nzoni ti soro mbeni ngoi so kua ayeke mingi na yâ ti magazin ni pëpe. Tongana lege ayeke dä, linda na ngoi so aclient ayeke dä pëpe. Hunda ti sala tënë na zo so ayeke bâ ndo na ndo ti magazin ni. Sala kue ti sala tënë gi ndulu. Mo lingbi ti tene nyen?
4-6. E lingbi ti tene nyen tongana e yeke fa tënë na mbeni zo ti kango ye wala na wayinda ti magazin ni?
4 Tongana mo yeke sala tënë na zo ti kango ye ni wala na wayinda ni, mo lingbi ti tene tongaso: “A yeke ngangu ti wara azo so ayeke dë buze na da ti ala ngbanga ti ngoi so atia ala, ni la e ga ti bâ ala na ndo ti kusala ti ala. Apériodique ti e amû maboko ti bâ so aye so ayeke si na ngoi ti e andu sese kue.” Na pekoni, fa mbeni ndulu tënë na yâ périodique ni.
5 Wala mo lingbi ti tara kode so: “Mingi ti azo aye ti hinga ye mingi na ndo ti Bible, me ala yeke na ngoi gi kete. Tract so afa so mbeni kapa ti mandango ye senge senge ayeke dä, so alingbi ti mû maboko na mo ti wara akiringo tënë na ahundango tënë ti mo na ndo Bible.” Na pekoni, fa atënë so ayeke na lembeti 4 na 5 ti tract Mo Ye ti Hinga Ye Mingi Ahon na ndo Bible?
6 Tongana mo bâ so zo so ayeke bâ ndo na ndo magazin ni ayeke na kua mingi, mo lingbi ti mû gi na lo tract ni, na mo tene: “Fade mbi yeke zia mo ti kiri na ngoi so mo yeke na kua mingi pëpe. Mbi ye gi ti hinga ye so mo tene ti mo na ndo tract so.”
7. Tongana nyen e lingbi ti maï nzara ti tënë ni na yâ aterritoire so a yeke dë buze dä?
7 Bi bê na ndo nzara ti zo ni: Mo lingbi même ti sala mbeni étude ti Bible na yâ territoire so a yeke dë buze dä. Mbeni pionnier spécial ayeke mû ka apériodique lakue na mbeni koli so ayeke dë buze. Na ngoi so koli ni afa tongana nyen aye so lo diko anzere na lo, pionnier ni afa na lo tongana nyen ala lingbi ti leke ti manda Bible na lege ti brochure Ahunda. Ala leke ti sala étude ni tâ gi na ndo ti kango ye ti koli ni. Teti a yeke ndo ti kusala, lakue pionnier ni asala étude ni gi apenze-ngbonga 10 wala 15. Zia e nga kue e ngbâ ti gi azo so alingbi, na fango tënë na aterritoire so ando ti dengo buze ayeke dä.