A-ange ayeke mû maboko na e
1 “Bâ, Mbi yeke na i lakue, même juska na nda ti ngoi so.” So tâ ngangu si atënë so amû na azo so abata wango ti Jésus so: “I gue, i fa tënë na amara kue si ala ga adisciple”! (Mat. 28:18-20). Jésus ayeke duti na atâ Chrétien na mbeni kpengba lege: a-ange ti lo (Mat. 13:36-43). So tâ ye ti mungo ngia na bê ti fa “Tene-nzoni ti lakue lakue” legeoko na a-ange be-ta-zo so!—Apoc. 14:6, 7.
2 Na yâ fango tënë ti e: Bible afa so a tokua a-ange ti “sala kusala teti azo so fade ala ga ahéritier ti salut.” (aHéb. 1:14). Na ngoi ti akozo Chrétien, a-ange amû mbage na fango lege na adisciple ti Jésus ti wara azo so alingbi (Kus. 8:26). Laso, awakua ti Nzapa angbâ ti hinga biani so a-ange ayeke fa lege na ala. Fani mingi, azo atene so ala yeke sambela fade ti tene a mû maboko na ala, na mo ye ti bâ, mbeni Témoin aga na yanga-da ti ala. So ngia si e na a-ange e yeke na ni tongana mara ti azo tongaso ayeda na tokua ti Royaume!—Luc 15:10.
3 Na gbele kengo ndo: Jéhovah, na lege ti a-ange ti lo so ayeke “na ngangu”, abata Da niel, amba ti lo maseka Hébreu ota, bazengele Pierre nga na ambeni zo mingi so ahon na yâ ti akota tara (Ps. 103:20; Dan. 3:28; 6:21, 22; Kus. 12:11). Atâa so a si na ambeni ngoi e lingbi ti bâ so e yeke na ngangu pëpe na gbele kengo ndo, e lingbi ti wara ngangu na lege ti ye so asi na wakua ti Elisée, tongana lo ga ti hinga so “ala so ayeke na e ayeke mingi ahon ala so ayeke na ala.” (2 aGbia 6:15-17). Atâa tongana a gbu e na ngangu ti kangbi e na aita ti e Chrétien, zia bê ti e awoko kue pëpe. Tënë ti Nzapa adë bê ti e: “Ange ti L’Eternel ase kando ti ngoro ala so akpe mbito ti Lo.”—Ps. 34:8.
4 Na yâ ngoi kete, a-ange ayeke ga ande ti lungula azo kue so ayeke ke dutingo ti Christ tongana Gbia (Apoc. 19:11, 14, 15). Na ndembe so e yeke ku lango ni so, zia e ngbâ lakue ti sepela Jéhovah na mbito pëpe, na ziango bê ti e kue na ndo mungo maboko ti angangu turugu ti yayu so ayeke na gbe ti komandema ti Christ.—1 Pi. 3:22.