E gi azo so alingbi
1 Awango-tene so Jésus amû na ndo kusala ti fango tënë alingbi ti duti ngangu na e kete. Lo tene: “Na kota kodoro wala kete kodoro kue so i lï dä, i gi mbeni zo ti kodoro ni so alingbi.” (Mat. 10:11). Teti so laso a yeke ngangu ti wara azo na yanga-da, tongana nyen e lingbi ti sala kusala so nzoni?
2 Gi ti hinga territoire ti mo: Kozoni kue, gi ti hinga territoire ti mo. Na ngoi wa si mingi ti azo ayeke na yanga-da? Na kota lâ, a lingbi ti wara ala na ndo wa? Mbeni lango na yâ ti yenga ni wala mbeni ngoi na yâ ti lango ni ayeke dä so peut-être ala lingbi ti mä e nzoni? Lekengo ngoi ti salango kusala ti mo ti fango tënë ti lingbi na ngoi ti salango ye ti lâ oko oko nga na dutingo ti azo ti territoire ti mo, alingbi ti mû maboko na mo ti wara aye ti nzoni mingi.—1 aCor. 9:23, 26.
3 Mingi ti awafango tënë ayeke wara ye ti nzoni na mungo ngoi ti fa tënë kete kozo si lâ akui. Na mara ti angoi tongaso, ambeni zo ayeke duti kpô na ala yeke ndulu ti mä tënë. Fango tënë na téléphone (na ando so a yeda na ni) na lakui alingbi ti lë lengo. Ti fa tënë na yâ avaka ti dengo buze nga na ando so azo mingi ayeke gue dä ayeke nga ambeni lege ti ndu azo na nzo tënë.
4 Na yâ mbeni nze ti kusala so ayeke nde, mbeni kongregation aleke lani mbeni kapa ti fango tënë na tongo nda ti lakui ti lango ti samedi na dimanche, nga fango tënë na lakui na lango ti mercredi na vendredi. Ala leke nga fango tënë na lege ti téléphone, nga ti sala kusala na ando ti dengo buze. Teti so alekengo ye so amû na ala wâ mingi teti kusala ti fango tënë, kongregation ni asoro ti bata akapa ti fango tënë so.
5 Sala kue ti kiri ti bâ azo ni: Tongana a yeke ngangu na yâ territoire ti mo ti wara azo na yanga-da na ngoi so mo kiri ti sala afini vizite, na hunzingo ti vizite oko oko tara ti leke mbeni mbilimbili rendez-vous ti kiri mbeni ti bâ zo ni. Na sala tongaso nga na kozo vizite ni. Kiri biani ti bâ zo ni na ngbonga so mo fa na lo (Mat. 5:37). Tongana a yeke na lege ni, mo lingbi ti hunda numéro ti téléphone ti zo ni. Ye so alingbi nga ti mû maboko na mo ti kiri ti wara tele na lo.
6 Ngangu so e yeke sala na bê kue ti gi azo so alingbi na ti kono nzara ti tënë ni na yâ bê ti ala, ayeke ga na e ande biani deba nzoni ti Jéhovah.—aProv. 21:5.