‘Sala na Jéhovah na ngia’
1. Ye wa alingbi ti duti mbeni lingu ti kota ngia teti awakua ti Jéhovah?
1 Bazengele Paul asû na mbeti: “I duti na ngia lakue na yâ Seigneur; mbi tene na i mbeni, i duti na ngia.” (aPhil. 4:4). Matabisi ti e so ayeke ti kangbi nzo tënë na ti mû maboko na azo so ayeke tongana angasangbaga ti voro Jéhovah ayeke mbeni lingu ti kota ngia (Luc 10:17; Kusala 15:3; 1 aThes. 2:19). Ye oko, tongana e bâ so ngia atia e na yâ kusala ni, e lingbi ti sala nyen?
2. Tongana nyen ngbango lakue ti bata lê na ndo zo so amû na e kusala ni alingbi ti ga na e ngia?
2 Mbeni kusala so alondo na Nzapa: E dabe ti e so kusala ti e ti fango tënë alondo na Jéhovah. Biani, so matabisi si e yeke na ni ti duti “afon Nzapa na kusala” na yâ fango tokua ti Royaume nga na salango adisciple! (1 aCor. 3:9). Christ Jésus ayeke na e na yâ kusala so a yeke kiri ti sala ni mbeni pëpe (Mat. 28:18-20). A-ange nga kue ayeke mû mbage dä na wâ, nga ala yeke sala kusala legeoko na e na yâ kota kongo le-kobe na lege ti yingo so a yeke sala ni fadeso (Kusala 8:26; Apoc. 14:6). Bible, nga na aye so asi na azo ti Nzapa, amû fä so ayeke polele so Jéhovah si a yeke na peko ti kusala so. Ni la, tongana e yeke fa tënë, “e fa tënë ti Nzapa [legeoko na] Christ . . . na lê ti Nzapa.” (2 aCor. 2:17). So mbeni kpengba nda ti tënë teti e ti duti na ngia!
3. Ti bata ngia ti e na yâ kusala ti Nzapa, kusala wa sambela ayeke sala?
3 Ti bata ngia ti e na yâ kusala ti Nzapa, sambela ayeke kota ye (aGal. 5:22). Teti so e lingbi ti sala kusala ti Nzapa gi na lege ti ngangu ti lo, a yeke kota ye teti e ti hunda mingi ti wara yingo ti lo; na Lo yeke ndulu ti mû ni na bê kue na ala so ahunda lo (Luc 11:13; 2 aCor. 4:1, 7; aEph. 6:18-20). Ti sambela teti kusala ti e ayeke mû ande maboko na e ti bata nzoni bibe tongana e tingbi na asalango ye so ayeke nzoni pëpe. A yeke mû ande maboko na e ti ngbâ ti fa tënë na mbito pëpe nga na ngia.—Kusala 4:29-31; 5:40-42; 13:50-52.
4. Na lege wa nzoni lekengo tele ayeke mû maboko na e ti kono ngia ti e na yâ fango tënë? Na ambeni lege so e lingbi ti leke na tele ti e ayeke so wa?
4 Leke tele ti mo nzoni: Mbeni nzoni lege ti kono ngia ti e tongana e yeke mû mbage na fango tënë ayeke ti tene e leke tele ti e nzoni (1 Pi. 3:15). Mara ti lekengo tele tongaso ahunda pëpe gbâ ti ngoi. A hunda gi ambeni kete penze-ngbonga ti kiri ti bâ akode ti fango tënë so a mû teti apériodique so e yeke na ni wala ambeti so e leke ti kangbi. Ti wara mbeni kozo tënë so alingbi, e lingbi ti bâ buku Comment raisonner wala mbeni ngbele Kusala ti Royaume. Ambeni wafango tënë abâ so a yeke nzoni ti sû ambeni ndulu fango ye na lê ti mbeni ndulu mbeti. Ngoi na ngoi, ala yeke bi lê ti ala dä ti dabe na ni. Ye so ayeke mû maboko na ala ti hon ndo ti gingo bê, na ayeke mû na ala ngangu ti fa tënë na mbito pëpe.
5. Na lege wa tâ ngia ayeke ga na e ye ti nzoni nga na ambeni zo?
5 Tâ ngia ayeke ga na aye ti nzoni mingi. Mbeni dutingo so ayeke na ngia ayeke kono nzara ti azo teti tokua ti e. Tâ ngia ayeke kpengba e ti gbu ngangu (Néh. 8:10; aHéb. 12:2). A hon kue, kusala ti e so e sala na ngia amû gloire na Jéhovah. Ni la, zia e “sala na L’Eternel na ngia”.—Ps. 100:2.