I yü tâ be-ti-molenge
1 Mbeni berger so ade maseka azia bê kue na Jéhovah na lo fâ mbeni ngangu walombe (1 Sam. 17:45-47). Mbeni koli so ayeke na mosoro mingi agbu ngangu na be-nze-pepe na yâ ye ti vundu (Job 1:20-22; 2:9, 10). Molenge ti Nzapa amû gonda kue ti fango ye ti lo na Babâ ti lo (Jean 7:15-18; 8:28). Na yâ atapande oko oko so kue, tâ be-ti-molenge asala kota kusala. Legeoko nga laso, tâ be-ti-molenge ayeke kota ye teti aye nde nde so e yeke luti na gbele ni.—aCol. 3:12.
2 Na fango tënë: Teti so e yeke awakua Chrétien, na be-ti-molenge, e yeke kangbi nzo tënë na mara ti azo nde nde kue, na fango ngbanga kozoni pëpe na ndo mara ti ala, ngobo ti salango ye ti ala, wala ndo so ala londo dä (1 aCor. 9:22, 23). Tongana ambeni zo asala ye na ngangu wala na fandara, ake ti yeda na tokua ti Royaume, e yeke sala ye pëpe tongana ti ala, me na be-nze-pepe e yeke gue ti gi azo so alingbi (Mat. 10:11, 14). Ahon ti gi ti pika bê ti azo teti hingango ye wala hingango mbeti ti e, e yeke gboto lê ti ala na ndo Tënë ti Nzapa, na hingango so ni la alingbi ti ndu bê ti azo ahon ambeni ye so e lingbi ti tene (1 aCor. 2:1-5; aHéb. 4:12). Na tapande ti Jésus, e yeke mû gonda ni kue na Jéhovah.—Marc 10:17, 18.
3 Na yâ kongregation: A lingbi aChrétien nga ‘ayü tâ be-ti-molenge na popo ti ala tongana bongo’. (1 Pi. 5:5). Tongana e bâ ambeni zo tongana azo so ayeke kota ahon e, fade e yeke gi lege ti sala na aita ti e ahon ti tene e ku si ala sala na e (Jean 13:12-17; aPhil. 2:3, 4). Fade e yeke bâ tele ti e pëpe so e yeke kota na e lingbi pëpe ti sala ambeni kusala tongana sukulango yâ ti Da ti Royaume.
4 Tâ be-ti-molenge ayeke mû maboko na e ti ‘zingo na ambeni zo na popo ti e fade fade pëpe’ na ayeke maï siriri na beoko na yâ kongregation (aEph. 4:1-3). A yeke mû maboko na e ti mä yanga ti ala so a hiri ala ti mû li ni (aHéb. 13:17). A yeke pusu e ti yeda na awango wala asengo ndo so a lingbi ti mû na e (Ps. 141:5). Nga tâ be-ti-molenge ayeke pusu e ti zia bê kue na ndo Jéhovah tongana e yeke yô akungba so e lingbi ti wara na yâ kongregation (1 Pi. 4:11). Na tapande ti David, e hinga so hongo na ngangu aga na lege ti mungo maboko ti Nzapa, pëpe na lege ti ngangu ti e.—1 Sam. 17:37.
5 Na gbele Nzapa ti e: A hon ye kue, a lingbi e ‘sala e mveni kete na gbe ti tïtî ngangu ti Nzapa’. (1 Pi 5:6). Tongana e luti na gbele akpale si mbeni ye nde ti sala ayeke pëpe, e lingbi gi ti sala nzara ti dengo bê so fade Royaume aga na ni. Me na tâ be-ti-molenge, e yeke kanga bê ti e ti ku ngoi so Jéhovah adiko ti sala si azendo ti lo aga tâ tënë (Jacq. 5:7-11). Legeoko tongana ti tapande ti Job so abata be-biani ti lo, kozo gingo bê ti e ayeke ti tene ‘a sala lakue tënë nzoni na iri ti Jéhovah.’—Job 1:21.
6 Prophète Daniel ‘asala tele ti lo mveni kete na gbele Nzapa’ na lo wara deba nzoni teti Jéhovah ayeda na lo nga Lo mû na lo gbâ ti amatabisi ti kusala (Dan. 10:11, 12). Zia e nga kue e yü tâ be-ti-molenge, na hingango so “futa ti tâ be-ti-molenge na kpengo mbito ti L’Eternel ayeke mosoro, na yango-iri, na fini.”—aProv. 22:4.