Kota Bungbi ti lango oko: fini programme ni

Laso a yeke wara asango mingi na ndo batango nzoni seni ti bê ti e si e lingbi ti wara fini so amû ngia mingi nga aninga. Ye ti kota ahon so ayeke dutingo ti bê ti e na lege ti fä. Ni la, kota li ti tënë ti kota bungbi ti lango oko so ayeke to nda ni ande na nze ti septembre ngu 2003 alingbi biani na ni: “E sala na Jéhovah na bê ti e kue.” (1 Chron. 28:9). Aye wa e lingbi ti ku ti manda ni?

Surveillant ti circonscription ayeke mû ande diskur “E mû maboko na ambeni zo ti sala na Jéhovah na âme so ayeke na ngia.” Hundango tënë na azo ayeke gboto lê na ndo ngia so ayeke ga na lege ti maïngo nzara ti tënë ni na bê ti azo, nga na mungo li ni na yâ amandango Bible na azo so aye ti sala na Jéhovah. Kite ayeke dä pëpe so azo kue so ayeke gue ande na kota bungbi so ayeke wara dengo bê na lege ti kozo diskur so wamungo diskur so aga gango ayeke mû ande ni, “E bata bê ti e na yâ mbeni sese ti wusuwusu.” Programme ti ndapelele ayeke ko nda ni ande na lege ti diskur ti batême.

Na peko ti hungo tele, diskur “E mû maboko na ambeni zo nde” ayeke fa ande tongana nyen e lingbi ti sala tongaso. Ababâ na mama alingbi ti sala nyen ti bata bê ti amolenge ti ala yongoro na asioni bibe nga ti mû maboko na ala ti ga ndulu na Jéhovah? Diskur “Mû maboko na amolenge ti mo ti wara ngia na yâ Jéhovah”, ayeke mû ande awango so alingbi, nga ayeke fa lege so a lingbi ti sala kusala na awango ni.

E yeke wara ye ti nzoni na lege ti gbâ ti aye so Jéhovah aleke ti kpengba nga ti bata nzoni seni ti bê ti e na lege ti fä? Diskur ti nda ni ti wamungo diskur so aga gango, “Ngbâ ti sala na Jéhovah na bê kue”, ayeke luti ande na ndo akota mbage osio ti aye so e yeke sala ka lakue ti bata dutingo ti e na lege ti yingo. Ngangu wa nga ngoi oke e yeke mû ti sambela na bê kue, ti manda Tënë ti Nzapa, ti fa tënë na wâ, nga ti duti legeoko na ambeni Chrétien? E lingbi ti sala si ambage oko oko so aga nzoni ahon ti kozo?

Jéhovah amû tisango ndo so: “ Zia bê ti mo na wango tënë, na zia mê ti mo amä tënë ti hingango ye.” (aPr. 23:12). Leke tele ti mo fadeso ti duti dä na ngoi ti fango ye ti Mbeti ti Nzapa so. Salango tongaso ayeke mû ande ngangu na mo ti ngbâ ti sala na Jéhovah na bê ti mo kue nga na âme so ayeke na ngia.