Kota Bungbi ti Circonscription: fini programme ni
1 Jésus afa kozoni awe so adisciple ti lo ayeke wara ande ye ti ngangu (Mat. 24:9). Tongana nyen a lingbi e bâ atara? Ye nyen alingbi ande ti mû lege na e ti gbu ngangu na yâ ye ti ngangu? Programme ti Kota Bungbi ti Circonscription ti ngu ti kusala 2004 ayeke kiri ande tënë na ahundango so. Kota li ti tënë ni ayeke: “I duti na ngia na yâ beku; bê ti i azia pëpe na yâ ye ti pono”.—aRom. 12:12.
2 Adiskur use so ayeke na ambage ota: Li ti tënë ti kozo diskur na ambage ota ni ayeke “Kanga bê ti lë anzoni lengo”, ayeke bâ ande mbilimbili alege so na yâ ni e yeke lë lengo. A yeke hunda ande tënë na ambeni wafango tënë na ndo lege so ala yeke fa tënë nga ala yeke fa ye na bibe ti sala ye fade fade. Ababâ na mama ayeke ye ande mbilimbili ti dengi mê na diskur “Tongana Jéhovah ase e”, so ayeke fa ande lege so ababâ na mama alingbi ti fa nda ti tënë na amolenge ti ala. Ndangba wamungo diskur na ambage ota so ayeke gboto ande lê na ndo ye so a lingbi e sala ti kanga lege si sese asala ngangu na ndo ti e si e lë pëpe.—Marc 4:19.
3 “Kpe loro ti mandako na bê so azia pëpe” ayeke kota li ti tënë ti use diskur na ambage ota ni. A yeke fa ande polele na lege wa si gigi ti e ayeke tongana mbeni mandako. Ngbanga ti nyen a yeke nzoni e kpe loro ni na lege ti ndia ni? Tongana nyen e lingbi ti wara lege ti zi akungba kue so ane e na ti woko pëpe na yâ loro teti fini? Fade wango ti Mbeti ti Nzapa so a mû na tâ ngoi ni ayeke mû maboko na e kue ti ngbâ ti kpe loro na bê so azia pëpe.
4 Bê so azia pëpe asala si Nzapa ayeda na e: Fade adiskur so asurveillant so ague na ndo nde nde ayeke mû, ayeke duti ande ye ti kpengba mabe teti ala so amä na asala ye alingbi na awango ni. Li ti tënë ti mbeni oko ti adiskur ti surveillant ti district ayeke “Kangango bê asala si Nzapa abâ e tongana azo so alingbi.” Fade kota diskur ayeke kiri tënë na ahundango tënë: A lingbi amara aduti na beku na yâ iri ti zo wa? Ti sala ni andu nyen? Diskur ti nda ni, “Fade i wara fini ti i na lege ti gbungo ngangu”, ayeke bâ ande lege so Jésus agbu ngangu lani na gbele fango ngbanga ti kirikiri na vundu na bê pëpe.
5 Girisa pëpe ti ga na buku Ekole ti Kusala nga na Tour ti Ba Ndo so ayeke manda ande na yenga ni so. Sungo andulu tënë ayeke mû maboko na e ti zia li na ndo atënë so ayeke fa nga ti kiri ti sala kusala na ni. Na pekoni, fade a yeke sala mbeni dango bê na ndo programme ni na yâ kongregation.
6 Jéhovah mveni si aleke matanga ti kobe ti yingo so. Zia e ga, e te ye! Fade e yeke dekongo na ngia tongana e ga na e mä programme ni kue.—Es. 65:14.