Retraite: Mbeni ngoi ti sala kusala mingi?
1 Azo mingi so ayeke sala kua ngangu ayeke ku kungo lango ti retraite so ayeke zi ala ande na gbe kua ni. Ye oko, fani mingi, na pekoni azo ni asala nzara ti ye mingi pëpe, ala hinga ye so ala lingbi ti sala pëpe, na ala ga mbakoro hio. Tongana zo ayeke na nzoni kusala ti sala pëpe, a lingbi ti sala si lo bi bê ti lo mingi na ndo lo mveni. Mbeni mbeti-sango ti Brésil atene so azo ti kua ti Letäa so ague na retraite ayeke na akpale tongana ‘nzerengo tele pëpe, salango ngonzo hio hio, dutingo nzoni pëpe, na ala bâ so ala yeke ye oko pëpe na lê ti azo. Na mbage, ala yeke na kota vundu na nzara ti gigi asigigi na yâ ti ala.’
2 Me aChrétien mingi abâ ye ni tongaso pëpe. Ti ala, fini mbage ti gigi ti ala so azi lege na ala ti sala gbâ ti akusala ti yingo. Mbeni ita-koli so ato nda ti kua ti pionnier ayenga use na peko ti so lo wara ngu 65 atene: “Mbi mû kua ti pionnier asala angu bale-oko awe, na mbi wara adeba nzoni dä mingi. Na yâ gigi ti mbi kue, mbi de mbi wara mbeni ngoi ti lingbi na ni pëpe.” Mbeni koli na wali ti lo asû na mbeti: “Tâ nzoni ngoi ti fini ti e alondo na ndembe so e mû kua ti pionnier.” Biani, ti azo mingi, retraite amû na ala nzoni ngoi ti kono kusala ti ala ti fango tënë, na ti wara gbâ ti adeba nzoni ti Jéhovah.
3 Duti na kua mingi na lë lengo: Azo mingi so ayeke fadeso na retraite akono lani pëpe na yâ gbâ ti apendere ye so amû ndo kue laso, nga ala manda lani ti sala ngangu kua na ngoi so ala de kete mingi. Atâa so ala yeke na ngangu ti ala ti maseka mbeni pëpe, ala ngbâ lakue azo so ahinga ti sala kua biani. Na yâ territoire ti mbeni filiale, na popo ti gbâ ti apionnier, aita-koli na aita-wali 20 000 ayeke dä, so zo oko oko alingbi ti duti na ngu 60. Ambakoro so amû ngangu mingi na kusala ti fango tënë. Ye so ala hinga na yâ fini nga apendere lengo ti ala akpengba akongregation so ala yeke sala kua dä.—Jacq. 3:17, 18.
4 Ti duti na kua mingi na yâ fango tënë asala si zo ayeke na nzoni seni mingi, nga gigi ti lo aga nzoni mingi. Mbeni ita-wali ti ngu 84, so ato nda ti kua ti pionnier na peko ti retraite ti lo, atene: “Mandango Bible na azo mingi asala si li ti mbi angbâ lakue ti sala kua. Mbi yeke na kutukutu pëpe, na tongaso mbi yeke tambela na gere mingi. Ye so abata seni ti mbi.” Mbeni mbakoro-koli na wali ti lo so ayeke apionnier atene: “Kusala ti e asala si li ti e nga na mitele ti e asala kua nzoni. E yeke lakue gi use use. E yeke he ngia mingi, na gigi anzere na e.”
5 Na ndo so a hunda awakua dä mingi: Ambeni Chrétien so ayeke na retraite, na so nginza ti ala amû lege na ala ti sala ni, ague na ndo so a hunda awakua dä mingi. Ambeni akono yâ ti kusala ti ala ti fa tënë na mbeni yanga ti kodoro nde. Legeoko tongana bazengele Paul, aChrétien so ayeke na wâ ayeke “sala ye kue teti Tene-nzoni, si [ala] lingbi wara ye ti Tene-nzoni legeoko na ambeni zo.”—1 aCor. 9:23.
6 Mbeni koli na wali ti lo ato nda ti kua ti pionnier na pekoni so ala hunzi ti bata amolenge ti ala ti koli use. Na peko ti angu mingi, ala to nda ti manda yanga ti Chinois. Ngu ti ala ahon fadeso 70 awe, na ade ti ninga pëpe ala wara ngia ti bâ groupe ti yanga ti Chinois so ala yeke sala kusala dä aga mbeni kongregation. Mara ti akoli na wali tongaso ayeke biani mbeni deba nzoni!
7 Retraite ti fango tënë ayeke pëpe: Atâa so mingi ti azo ayeke kaï kua ti nginza ti ala biaku biaku, Chrétien ayeke kaï ti sala na Nzapa pëpe. A lingbi azo kue angbâ ti duti be-ta-zo “juska na nda ni”. (Mat. 24:13, 14). Tâ tënë, teti so ala yeke mbakoro mingi, ambeni alingbi ti sala kua na Jéhovah mingi pëpe tongana ti giriri. Me so ye ti mungo ngangu na zo ti bâ ala na salango ye alingbi na ngangu ti ala nga na bê kue! Tënë ti Nzapa adë bê ti ala so fade Jéhovah ayeke girisa kua ti ala pëpe, nga ndoye so ala fa teti iri ti lo.—Luc 21:1-4; aHéb. 6:10.
8 Tongana ngu ti mo aga ndulu na retraite, a yeke nzoni mo bâ na yâ sambela tongana nyen mo lingbi ti sala kusala nzoni na gbiango ti ye so. Na lege ti maboko ti Nzapa, mo lingbi ti bâ so retraite azi lege na mo ti kono kusala ti mo so ayeke ga na gonda na ndo Jéhovah nga na adeba nzoni mingi.—Ps. 148:12, 13.