Ala lë lengo atâa so mbage ti tele ti ala abuba
1 Tongana mo yeke na popo ti aTémoin ti Jéhovah mingi so mbeni mbage ti tele ti ala abuba, lege ayeke lakue na mo ti lë lengo na yâ fango tënë. Biani, adutingo ti mo alingbi ti mû na mo alege so ayeke nde mingi ti fa tënë na azo na ti wa ala.
2 Alege ti fa na tënë: Azo mingi so mbeni mbage ti tele ti ala abuba ayeke mû mbage kue na yâ fango tënë. Na tapande, mbeni ita-wali so tambelango ti lo nga na salango tënë ti lo aga ngangu na peko ti so awanganga asuru lo, abâ so lo lingbi ti kangbi apériodique tongana koli ti lo azia kutukutu ti ala aluti na tele ti mbeni lege so azo ayeke hon dä mingi. Mbeni lâ, lo kangbi apériodique 80 gi na yâ ti angbonga use! Dutingo ti mo so ayeke nde alingbi nga ti sala si mo tingbi na ambeni zo so a yeke ngangu ti wara ala na mbeni lege nde. Tongana a yeke tongaso, bâ ala tongana territoire ti mo.
3 Fango tënë ti mo alingbi ti lë lengo mingi! Na ngoi so azo ayeke bâ salango ye ti mo na bê kue nga nzoni ye so tâ tënë ti Bible asala na ndo fini ti mo, tënë ti Royaume alingbi ti nzere na ala. Na ndo ni, tongana mo tingbi na azo so ayeke na kpale, ye so asi na mo alingbi ti mû lege na mo ti dë bê ti ala na lege ti Tënë ti Nzapa.—2 aCor. 1:4.
4 Kpengba azo: Laurel Nisbet angbâ gi na yâ masini ti hungo na pupu teti angu 37, me lo mû maboko na azo 17 ti hinga tâ tënë ti Bible. Mbaï ti fini ti lo so amû ngangu na mo pëpe? Legeoko nga, tapande ti mo alingbi ti pusu amba ti mo wamabe ti sala ngangu ti ala kue na yâ kusala ti Jéhovah.—g93 22/1 al. 18-21.
5 Atâa tongana dutingo ti mo akanga lege na mo ti sigigi na fango tënë mingi tongana ti so mo ye, mo lingbi lakue ti kpengba azo. Mbeni ita-koli atene: “Mbi manda so même mbeni zo so mbage ti tele ti lo abuba ngangu alingbi ti mû maboko mingi na amba ti lo. Mbi na wali ti mbi e mû maboko na azo nde nde na yâ kongregation. Ndali ti dutingo ti e, e yeke lakue dä nga ndulu ti mû maboko.” Ye oko, e hinga so mo lingbi lakue pëpe ti sala ye alingbi na wâ ti mo. Me tongana a mû maboko na mo, mo lingbi ti fa tënë lakue. Tongaso, tongana mo ye ti wara maboko, ku pëpe ti sala tënë ni na a-ancien wala na ambeni zo nde na yâ kongregation.
6 Jéhovah ayeke bâ ye oko oko kue so mo yeke sala ti voro lo. Kusala so mo sala na âme ti mo kue anzere na lo (Ps. 139:1-4). Na ngoi so mo yeke zia bê ti mo na lo, lo lingbi ti mû ngangu na mo ti fa tënë mingi na ti lë lengo.—2 aCor. 12:7-10.